ELM VƏ TƏHSİL


Bilik Fondu Azərbaycan dilinin qorunmasında dövlət siyasətinə dair bölgələrdə silsilə tədbirlər təşkil edib

Bakı, 10 noyabr, AZƏRTAC 

Prezident İlham Əliyevin “Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı tədbirlər haqqında” 2018-ci il 1 noyabr tarixli Fərmanı Azərbaycan Respublikasının Prezidenti yanında Bilik Fondunun “Dilimiz - sərvətimizdir” layihəsinin daha geniş şəkildə həyata keçirilməsinə təkan verib.

Fonddan AZƏRTAC-a bildirilib ki, Fərmanın bölgələrdə şərhi ilə əlaqədar Bilik Fondunun təşkilatçılığı ilə Yevlax, Bərdə, Tərtər və Kürdəmir rayonlarında “Azərbaycan dilinin qorunmasında dövlət siyasəti” mövzusunda “dəyirmi masa”lar keçirilib.

Yeni Azərbaycan Partiyasının Yevlax rayon təşkilatının inzibati binasında gerçəkləşən tədbirdə Bilik Fondunun yerli nümayəndəsi, 5 nömrəli məktəbin direktoru, Əməkdar müəllim Zərxanım Əhmədova dil məhfumunun xalqın və dövlətin həyatında müstəsna əhəmiyyətə malik olduğunu deyib.

Fondun ölkədaxili layihələr sektorunun baş məsləhətçisi, filologiya üzrə fəslsəfə doktoru Nüşabə Hüseynova təmsil olunduğu qurumun Azərbaycan dilinin saflığının qorunması və təbliği istiqamətində həyata keçirdiyi “Dilimiz - sərvətimizdir” layihəsindən söz açıb. Bildirib ki, layihə çərçivəsində Dilçilik İnstitutu alimlərinin bir neçə televiziyada jurnalistlər üçün silsilə təlimləri təşkil olunub. Təlimlərin nəticəsi olaraq, Fondun dəstəyi ilə “Ekran və efirdə ədəbi dil normaları” kitabı nəşr edilib. Dilçi alimlərin məqalələrinin toplandığı nəşr jurnalistlərə paylanılıb.

Azərbaycan Milli Elmlər Akademiyası Nəsimi adına Dilçilik İnstitutunun monitorinq şöbəsinin müdiri, filologiya üzrə elmlər doktoru Sevinc Əliyeva təmsil etdiyi elmi–tədqiqat müəssisəsinin bu istiqamətdə gördüyü işləri diqqətə çatdırıb. O, texniki inkişafın nəticəsində dilimizə daxil olan sözlərdən düzgün istifadə edilməsinin vacibliyini vurğulayıb, əksər alınma sözlərin Azərbaycan dilində qarşılığı olduğunu söyləyib. Bildirib ki, doğma dilin saflığının qorunması xüsusən KİV-lərin üzərinə düşən müqəddəs missiyadır və dövlət dilinə qarşı peşəkar münasibət jurnalistlərin vəzifə borcudur.

Yevlax rayonunda çıxan “Kür” qəzetinin baş redaktoru, Əməkdar jurnalist Əminə Yusifqızı isə mətbuatın dilimizin təbliğindəki rolu ilə bağlı fikirlərini söyləyib. “Dəyirmi masa” müəllimlərin qatıldığı müzakirələrlə davam edib.

Bərdə rayonundakı S.Vurğun adına Mərkəzi Kitabxanada təşkil edilən tədbirdə rayon icra hakimiyyəti ictimai-siyasi və humanitar məsələlər şöbəsinin baş məsləhətçisi Asif Abbasov bölgədə Azərbaycan dilinin təbliği sahəsində mövcud vəziyyət barədə məlumat verib. N.Hüseynova “Ekran və efirdə ədəbi dil normaları” kitabında əksini tapan məqalələrin mahiyyətindən danışıb. S.Əliyeva isə mətbuatda işlənən söz və ifadələrdə daha çox hansı pozuntulara yol verildiyini, yanlışlıqların səbəblərini və aradan qaldırılma yollarını diqqətə çatdırıb.

“Dəyirmi masa”da müəllimlərin sualları cavablandırılıb.

Növbəti tədbir Tərtər rayonundakı Qarabağ Regional Bilik Evində gerçəkləşib. Tədbiri Bilik Evinin müdiri, İ.Məmmədov adına 2 nömrəli məktəb-liseyin direktoru Gülarə Əkbərova açıb. N.Hüseynova və S.Əliyevanın çıxışlarından sonra müəllimlər Azərbaycan dilinin təbliği istiqmətində üzləşdikləri neqativ hallardan, xüsusilə mətbuatda dilin saflığına xələl gətirən məqamlar ətrafında fikir mübadiləsi aparıblar.

Eyni mövzuda “dəyirmi masa” Kürdəmirdə yerləşən Heydər Əliyev Mərkəzində də təşkil olunub. Bilik Fondunun yerli nümayəndəsi, Kürdəmir rayon 1 nömrəli tam orta məktəbin direktoru Vüqar Nəsirov tədbirdə mövzunun aktuallığından bəhs edib. S.Əliyeva və N.Hüseynovanın “Azərbaycan dilinin qorunmasında dövlət siyasəti” mövzusunda çıxışlarından sonra Mərkəzin direktoru Dürriyə Seyidova yerli müəllimlərin, ziyalıların bu istiqamətdə fəaliyyətindən danışıb. Tədbirdə iştirakçıların çoxsaylı sualları cavablandırılıb.

Bilik Fondu ölkə başçısının Fərmanından irəli gələn tələblər əsasında Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı silsilə tədbirlərini davam etdirir.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.