ELM VƏ TƏHSİL
Bilik Fondu və Azərbaycanda Qadın Sahibkarlığının İnkişafı Assosiasiyasının əməkdaşlığı müzakirə olunub
Bakı, 9 yanvar, AZƏRTAC
Yanvarın 9-da Azərbaycan Respublikasının Prezidenti yanında Bilik Fondu və Azərbaycanda Qadın Sahibkarlığının İnkişafı Assosiasiyası arasında əməkdaşlığa dair Niyyət Protokolunda əksini tapan müddəalar əsasında hazırlanmış fəaliyyət planı müzakirə olunub. Fondun icraçı direktoru Oktay Səmədov və əməkdaşları ilə görüşən Assosiasiyanın sədr müavini, “Loqos” Psixoloji və Nitq İnkişaf Mərkəzinin rəhbəri Təranə Məmmədova və qurumun nümayəndələri gələcək fəaliyyət istiqamətlərini müzakirə ediblər.
Fonddan AZƏRTAC-a bildirilib ki, fəaliyyət planında qadın sahibkarlığının təbliği və təşviqi ilə bağlı birgə layihələrin işlənib hazırlanması, sahibkarlıq fəaliyyəti göstərən xanımların maarifləndirici görüşlərə cəlb olunması, elmi-praktik konfransların, seminar və təlimlərin, intellektual müsabiqələr və bilik yarışmalarının təşkili, müvafiq mövzuda materialların nəşri məsələləri yer alıb. Həmçinin sosialyönümlü videoçarxların hazırlanması, Assosiasiyanın təqdim etdiyi məlumatlar əsasında gənclər üçün vakant iş yerlərinə dair məlumat bankının yaradılması, xarici ölkə mütəxəssislərinin təcrübə mübadiləsi məqsədilə maarifləndirici layihələrə cəlb edilməsi ilə bağlı tədbirlər əksini tapıb.
Görüşdə son əlavə və düzəlişlərdən sonra birgə fəaliyyət planının icrasına başlanılması qərara alınıb.