Bakı, 28 yanvar, Məmməd Məmmədli, AZƏRTAC

Nizami Kino Mərkəzində C.Cabbarlı adına “Azərbaycanfilm” Kinostudiyasının 1969-cu ildə istehsal etdiyi “Bir cənub şəhərində” bədii filmin bərpa olunmuş formatda nümayişi olub.

AZƏRTAC xəbər verir ki, filmin bərpası “Balans” Milli Rəqəmsal Bərpa Studiyası tərəfindən həyata keçirilib.

Nümayişdən əvvəl çıxış edən rejissor Vahid Mustafayev filmin bərpa işlərindən söhbət açıb. Bildirib ki, ssenari müəllifi Rüstəm İbrahimbəyov və rejissoru Eldar Quliyevin 1968-ci ildə çəkdiyi “Bir cənub şəhərində” filmi 1969-cu il yanvarın 27-də indiki Nizami Kino Mərkəzində ilk dəfə nümayiş olunub: “Bir cənub şəhərində” filmi Eldar Quliyevin ilk işidir. Bu filmdə o, gənclik vaxtlarında Azərbaycana olan sevgisini əks etdirib. Bu vaxt ərzində lentin kimyəvi tərkibi korlansa da, onu bərpa etmək mümkün olub. Bu günədək 4 filmi bərpa edən “Balans” Milli Rəqəmsal Bərpa Studiyası 2022-ci ildə daha 8 filmi təmizləmək niyyətindədir”.

O, iş adamlarını bu qrupa dəstək olmağa çağırıb və bildirib ki, Azərbaycanın milli sərvəti olan filmlərimiz yalnız birlikdə bərpa oluna bilər.

Kinoşünas Aydın Kazımzadə bildirib ki, hər filmin nümayişi, tək kino işçiləri üçün deyil, milyonlarla kinosevərlərin bayramıdır: “Bu filmə hamı baxsa da, zal yenə də doludur. Bu bayramı bizə bəxş edənlərə təşəkkür edirəm”.

Filmin tarixçəsilə bağlı danışan A.Kazımzadə bildirib ki, Sovetlər Birliyi filmlərin qırağa çıxmasını qadağa edirdi. Bu, ilk filmdir ki, SSRİ məkanından kənara çıxıb: “Film çəkiləndə ekranlara buraxılmadı. Buna səbəb SSRİ-də rüşvətin olmasını göstərən kadrlar idi. Mövzu ilə problemin əlaqəsi bu filmdə əyani şəkildə əks olunub. Bu mənada “Bir cənub şəhərində” bədii filmi Azərbaycan kinosunun dönüş nöqtəsidir”.

Xalq artisti Oqtay Mirqasımov Eldarın Quliyevin yaradıcılığı barədə danışıb. Bildirib ki, onun “Bir cənub şəhərində” filmi Azərbaycan kinosu tarixində qızıl hərflərlə yazılıb: “Bir cənub şəhərində” filmi tarixdir. Tarix olduqca əsaslı bir platformadır. Onun üzərində gündəlik həyat, yeniliklər, axtarışlar baş verir. Keçmişi olmayan millət uğurlu gələcək inşa edə bilməz”.

Xalq artisti Fəxrəddin Manafov Eldar Quliyevlə bağlı xatirələrini bölüşüb. O deyib: “Mən Eldar Quliyevi ilk dəfə canlı görəndə onu italyan hesab etmişdim. O, məni Məcnun roluna götürmək istəmirdi. O, hər dəfə kinostudiyada məni görəndə deyirdi ki, bizim filmimiz hələ qabaqdadır. Çox istərdim, Eldarın yaşıdları burada olsun. Təəssüf ki, dünya gəlimli-gedimli dünyadır. Yaxşı ki, Aydın Kazımzadə, Rasim Balayev və Eldarla birlikdə çalışan digər insanlar buradadır”.

Vaxtilə “Debüt” studiyasında rejissorla işləmiş Rüfət Həsənov Eldar Quliyevin təvazökar bir insan olduğunu söyləyib: “Sağlığında onu tərifləsəydim, mütləq məni tənbeh edərdi. Ancaq indi haqqında demək istədiklərimi çəkinmədən söyləyirəm”.

Elnarə Mahmudova təmsil etdiyi “Santral” şirkətinin fəaliyyəti ilə bağlı danışıb. Bildirib ki, şirkət dövlət layihələrində dəfələrlə iştirak edib, idman, mədəniyyət sahələrində öz köməyini əsirgəməyib. Bu dəfə də filmin bərpası işlərinə dəstəyini verib.

Sonra film nümayiş olunub.

Xatırladaq ki, “Balans” studiyası bundan əvvəl Tofiq Tağızadənin 1960-cı ildə çəkdiyi “Mateo Falkone”, Həsən Seyidbəylinin 1973-cü ildə quruluş verdiyi “Nəsimi" filmlərini rəqəmsal formatda bərpa edib.