Sumqayıt, 18 avqust, Ətrabə Rzayeva, AZƏRTAC

Qubadlı sakinləri Birinci Qarabağ müharibəsində eyni gündə - avqustun 18-də şəhid olmuş dörd polis əməkdaşı - İsayev Kamal İnqilab oğlu, Bayramov İlqar Telman oğlu, Paşayev Ziyəddin Cəlal oğlu və Süleymanov Habil Yusif oğlunun xatirəsini anıblar. Sumqayıt şəhərində yerləşən Q.İlyasov adına Qubadlı şəhər 1 saylı tam orta məktəbdə təşkil olunan mərasimdə rayon icra hakimiyyətinin məsul işçiləri, idarə, müəssisə, təşkilat rəhbərləri, şəhidlərimizin ailə üzvləri, yaxınları, Qubadlı rayon Polis Şöbəsinin əməkdaşları, keçmiş polis işçiləri, ictimaiyyət nümayəndələri iştirak ediblər.

AZƏRTAC xəbər verir ki, əvvəlcə Dövlət Himni səsləndirilib, sonra Vətənimizin ərazi bütövlüyü uğrunda canından keçmiş igid oğulların xatirəsi bir dəqiqəlik sükutla yad olunub.

Mərasimdə çıxış edən rayon icra hakimiyyəti başçısının müavini Allahverdi Haqverdiyev qeyd edib ki, Birinci Qarabağ müharibəsində Qubadlı rayonundan 238 nəfər şəhid olub. Onlardan 11 nəfəri Azərbaycanın Milli Qəhrəmanı adına layiq görülüb. Şəhidlərimizdən 12 nəfəri polis əməkdaşı olub.

Vurğulanıb ki, Vətən müharibəsində qəhrəmancasına döyüşmüş, Azərbaycan bayrağını işğaldan azad edilən torpaqlarımızda dalğalandırmış, ölkəmizin ərazi bütövlüyü uğrunda canlarını fəda etmiş əsgər və zabitlərimizin qəhrəmanlığı, xalqın birliyi və ədalətli mövqeyi “dəmir yumruq”da birləşərək işğalçıya sarsıdıcı zərbə vurdu. Ali Baş Komandan, Prezident İlham Əliyevin rəhbərliyi altında Müzəffər Ordumuzun rəşadəti, qəhrəmanlığı sayəsində torpaqlarımız, o cümlədən 30 ilə yaxın həsrətində olduğumuz Qubadlı rayonu 2020-ci ilin oktyabrın 25-də işğaldan azad olundu. 44 günlük Vətən müharibəsində Qubadlı rayonundan 11 şəhid və 40-dan çox qazi, həmçinin yüzlərlə qəhrəman öz adlarını tarixə yazdılar. Şəhidlərimizin qisası alındı, qanı yerdə qalmadı.

Digər çıxış edənlər- keçmiş polis işçiləri, mayor Azim Abbasov, Cavid Bədəlov, Qubadlı rayon Polis İdarəsi rəisinin müavini, polkovnik-leytenant İlham Rəsulov şəhidlərimizlə bağlı xatirələrini bölüşüblər. Bildirilib ki, şəhidlərimizin ailələri həmişə dövlət tərəfindən diqqət mərkəzində olub. Son illər respublikamızda şəhid ailələrinin sosial müdafiəsinin gücləndirilməsi, onların mənzil-məişət şəraitinin yaxşılaşdırılmasına yönəlmiş tədbirlər bunun bariz nümunəsidir.

Şəhid Kamal İsayevin həyat yoldaşı Fəridə Yaqubova, şəhid Habil Süleymanovun qardaşı Salman Süleymanov, şəhid Ziyəddin Paşayevin həyat yoldaşı Hicran Paşayeva və şəhid İlqar Bayramovun xalası oğlu Şəmsi Bayramov göstərdikləri diqqət və qayğıya görə Ali Baş Komandan, Prezident İlham Əliyevə, Birinci vitse-prezident Mehriban xanım Əliyevaya minnətdarlıqlarını bildiriblər.

Sonda Sumqayıt Regional Mədəniyyət İdarəsinin Qubadlı rayon nümayəndəliyi tərəfindən vətənpərvərlik mövzusunda və şəhidlərimizə həsr olunmuş şeirlər və muğam parçaları səsləndirilib.