İQTİSADİYYAT


Bir qrup Azərbaycan aviatorlarına dövlət və müəssisədaxili mükafatlar təqdim edilib

Bakı, 28 iyun, AZƏRTAC

İyunun 28-də bir qrup Azərbaycan aviatorlarına dövlət və müəssisədaxili mükafatların təqdim edilməsi, habelə fəxri adların verilməsi mərasimi keçirilib. Azərbaycanın 50-dən çox mülki aviasiya işçisi medal, orden və fəxri adlara layiq görülüb.

2022-ci il 1 iyun tarixində Azərbaycan Respublikasının Prezidenti İlham Əliyev mülki aviasiya sahəsində bir qrup işçinin 3-cü dərəcəli “Əmək” ordeni, “Tərəqqi” medalı ilə təltif edilməsi, həmçinin bu sahədə səmərəli fəaliyyətinə görə “Əməkdar mühəndis” və “Əməkdar pilot” fəxri adlarına layiq görülməsi haqqında sərəncamlar imzalayıb.

“Azərbaycan Hava Yolları”nın mətbuat xidmətindən AZƏRTAC-a bildirilib ki, AZAL-ın prezidenti Cahangir Əsgərov mülki aviasiya işçilərini dövlət və müəssisədaxili mükafatlarla təltif edilmələri münasibətilə təbrik edib. Onların yüksək peşəkarlığını, fədakarlığını və öz vəzifələrinin icrasına məsuliyyətlə yanaşdıqlarını qeyd edib.

Cahangir Əsgərov görüşdə Prezident İlham Əliyevin Azərbaycanın mülki aviasiyasına göstərdiyi daimi diqqətini vurğulayıb və bu sahəyə göstərdiyi xüsusi qayğısına görə dövlətimizin başçısına minnətdarlığını bildirib.

“Azərbaycan aviatorlarının gərgin əməyi və peşəkarlığı ölkənin inkişafına mühüm töhfədir və Azərbaycan Respublikasının Prezidenti İlham Əliyev tərəfindən yüksək qiymətləndirilir. Prezidentin bu diqqəti hər bir mülki aviasiya işçisi üçün mühüm motivasiyadır. Dövlətimizin başçısı ölkənin mülki aviasiyasına hər zaman xüsusi münasibət göstərir, onun rəhbərliyi ilə bu sahədə mühüm və ciddi dəyişikliklər baş verib, ölkənin mülki aviasiyası üzrə böyük perspektiv layihələr həyata keçirilib. Azərbaycan xalqının ümummilli lideri Heydər Əliyev qeyd edib: “Azərbaycan Hava Yolları”nın ən vacib vəzifəsi uçuşların təhlükəsizliyini təmin etməkdir. Ölkənin hər bir mülki aviasiya işçisi bu nəsihətə əməl edir”, - deyə Cahangir Əsgərov bildirib.

AZAL prezidenti qeyd edib ki, gələn il Azərbaycanın mülki aviasiyası 85 illiyini qeyd edəcək.

Tədbirdə, həmçinin “Azərbaycan Hava Yolları” aviaşirkətinin pilotlarının pensiyaya yola salınması da keçirilib. Pilotlara mülki aviasiyada çoxillik əməyinə və sədaqətinə görə təşəkkür edilib, onlara təşəkkürnamələr və qiymətli mükafatlar təqdim olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.