Şamaxı, 16 noyabr, Rəşad Türkoğlu, AZƏRTAC

Şamaxıda arı ailələrinin sayı 17 min 200-ə çatıb. Maraqlı, gəlirli və heç də asan olmayan bu işlə 624 ailə məşğuldur. Rayonun təbii iqlim şəraiti də arıçılıq təsərrüfatı üçün əlverişlidir. Builki mövsümdə bölgədə 140 tonadək bal, 13 ton mum, 93 kiloqram çiçək tozu, 60 kiloqramdan çox vərəmum, 9 kiloqramadək arı südü istehsalı gözlənilir.

AZƏRTAC xəbər verir ki, rayonda arıçılıqla məşğul olub gəlir əldə edənlərdən biri də Hümbətovlar ailəsidir. Gənclik dövründən əməksevərliyi, işgüzarlığı, bacarığı və qabiliyyəti ilə seçilən arıçı Brilyant Hümbətova Şamaxı rayonunun Meysəri kəndində yaşayır. Arıçılıq təsərrüfatına böyük marağı və həvəsi olduğundan 15 ildir bu sahədə çalışır. Uşaqlıqdan arıçılığa olan həvəsini reallaşdırmaq üçün xeyli öyrənib və təcrübə qazanıb.

“On beş ilə yaxındır ki, arıçılıqla məşğulam. Bu peşəyə bir qutu arı ailəsi ilə başlamışam, arıxanamı xeyli böyüdərək 150 qutuya çatdırmışam. Fikirləşdim ki, evdar xanım olmaqla, evdə oturmaqla, ev işləri görməklə ailəmə maddi dəstək ola bilməyəcəm. Uşaqlarımız böyüyür, onları oxutmalıyıq, cəmiyyətimizə layiqli bir vətəndaş kimi yetişdirməliyik. Bir sözlə, əlavə gəlirlərə ehtiyac olduğundan bu peşə ilə məşğul olmağa başladım”, - deyə o bildirib.

Daha çox yerli arı cinslərinə üstünlük verdiklərini deyən Brilyant xanım deyib ki, yerli arıların xortumu uzun olur və çiçəklər arasında seçim etmədən nektarı bitkinin dərinliyindən götürür. Həmçinin gün ərzində nektar ardınca uçuşa tez başlayır, ailəsinə də gec qayıdır. Digər arı cinsləri ilə müqayisədə daha çox bal toplayır. Havanın yağışlı, çiskinli vaxtında belə soyuqdan qorxmayaraq nektar dalınca uçur. Yerli arıların məhsuldarlığının əsas əlamətləri, üstünlükləri məhz onun fəal həyat tərzidir.

Azərbaycanda bu peşə qadınlar üçün qeyri-adi hesab olunsa da, arıçılıqla bağlı seminar və təlimlərdə iştirak etdiyini, müxtəlif sertifikatlara layiq görüldüyünü söyləyən Brilyant Hümbətova zəhmətinin dövlət tərəfindən də yüksək qiymətləndirildiyini bildirir və Prezidentin Sərəncamına əsasən kənd təsərrüfatının inkişafında xidmətlərinə görə 3-cü dərəcəli "Əmək" ordeninə layiq görüldüyünü qürur hissi ilə vurğulayır.

Təsərrüfatını inkişaf etdirdiyini deyən müsahibimiz qadınları bu gəlirli və səmərəli sahəyə yönəlməyə səsləyir: “Təhsil önəmlidir, qadınlarımızın təhsilli olmağı yaxşıdır. Amma təhsil ala bilməyən xanımlarımız da hər hansı bir peşə seçməklə öz işlərini qura bilərlər. Əsas odur ki, o peşədə özlərini görsünlər, o peşəni sevsinlər. Bu peşələrdən biri də arıçılıqdır. Nə qədər desələr ki, arıçılıq ağır peşədir, şəxsən mən belə düşünmürəm. İnşallah, peşəmi böyük biznesə çevirmək istəyirəm. Allahın izni, dövlətimizin köməyi ilə buna nail olacam”.

Fermer kimi nəinki Şamaxıda, eləcə də regionda yetərincə tanınan Brilyant Hümbətova ictimai-siyasi fəallığı ilə də seçilir. Kənd Təsərrüfatı Nazirliyinin Kənd Assosiasiyası Qadınlar Birliyinin Milli Məsləhət Şurasının və rayon icra hakimiyyətində İctimai Şuranın da üzvüdür, rayonda fermerlər şurasına ikinci dəfə sədr seçilib.

Bir qədər ağır, həm də gəlirli sahənin öhdəsindən gəlməkdə ona həyat yoldaşı Faiq Hümbətov da dəstək olur. Axı arı qutularının bir ərazidən digər əraziyə köçürülməsi, daşınması, həmçinin bəzi fiziki işlərin görülməsi o qədər də asan başa gəlmir. “Gəlirli sahədir, amma eyni zamanda zəhmət tələb edən işdir. 30-35 dərəcə günün altında arılarla işləmək, onlara qulluq etmək hər adamın işi deyil. Düzdür, çətindir, amma biznes tərəfindən baxanda dolanışıq mənbəyidir”, - deyə o vurğulayıb.

Xatırladaq ki Şamaxıda onlarca peşəkar arıçı fəaliyyət göstərir. Arıçılara göstərilən dövlət dəstəyi bu sahənin inkişafına kömək edir. “Arıçılıqla məşğul olan fiziki və hüquqi şəxslərə saxladıqları hər arı ailəsinə (pətəyə) görə subsidiya verilməsi Qaydası”na uyğun olaraq, bu il Şamaxı rayonunda arıçılıqla məşğul olan təsərrüfatçılara dövlət büdcəsinin vəsaiti hesabına hər arı ailəsinə 10 manat hesabı ilə ümumilikdə, 170 min 600 manat subsidiyanın ödənilməsi nəzərdə tutulur.