İDMAN
Birinci kanal: Bakı Olimpiya Stadionu birinci Avropa Oyunlarını möhtəşəm atəşfəşanlıqla yola salıb VİDEO
Moskva, 29 iyun, AZƏRTAC
Fişəng partlayışına bürünən Bakı Olimpiya Stadionu birinci Avropa Oyunlarını gurultulu atəşfəşanlıqla yola saldı. Ənənə və innovasiyaların, keçmiş və gələcəyin qovuşuğunda şou: rok-musiqiçiləri milli musiqi alətləri müşayiət edir, xalq rəqslərinin ifaçıları müasir rəqqaslarla bir yerdə rəqs edirlər. Bütün bunlar qədim Bakının rəmzi olan, daha sonra isə müasirliyin rəmzinə - "Alov qüllələri"nə çevrilən Qız qalasının qarşısında baş verir. Rusiya televiziyasının Birinci kanalının xüsusi müxbiri Munisə Usmanovun Bakıda birinci Avropa Oyunlarının bağlanış mərasimindən olan reportajında belə deyilir.
Birinci kanalın müxbiri təəssüratlarını bölüşərək deyir: "İştirakçı ölkələrin sayına uyğun olaraq 50 göyərçin Olimpiya stadionu üzərində uçuşur. Onlar Şərq nağıllarında insanların müdafiəçisi olan mifik simurq quşunu yalnız birgə tuta bilər. Rəssam Atəşgah məbədinin damında qum üzərində Simurq quşunun şəklini çəkəndə - odsaçan quş Avropa Oyunlarının məşəlinin alovlandırıldığı yerdə peyda olur və uçub gedən zaman Olimpiya alovunu da özü ilə aparır.
İndi birinci Avropa Oyunları tarixin rəsmi hissəsidir. Birbaşa Xəzərdən atılan minlərlə yaylım atəsi17 günlük idman bayramının final akkordudur.
Oyunların gələcəyi hələlik məlum deyil... Amma ilk Avropa Oyunlarına ev sahibliyi edən Bakı tezliklə "Formula-1" yarışlarını, İslam Həmrəyliyi Oyunlarını və 2020-ci ildə futbol üzrə Avropa çempionatının matçlarını qəbul edəcək. Axı, onları keçirmək üçün həm idman
obyektləri, həm də yeni təcrübə var".
Fəridə Abdullayeva
AZƏRTAC –ın xüsusi müxbiri
Moskva