ELM VƏ TƏHSİL


Birinci sinfə qəbulla bağlı suallar cavablandırılıb

Bakı, 2 mart, AZƏRTAC 

Fevralın 22-dən martın 2-dək paytaxt məktəblərində birinci sinfə qəbulla bağlı vətəndaşları düşündürən məsələlərə geniş aydınlıq gətirmək üçün Bakı Şəhəri üzrə Təhsil İdarəsinin (BŞTİ) “Facebook” səhifəsində müvafiq suallara cavab verilib.

BŞTİ-dən AZƏRTAC-a bildiriblər ki, suallar şərhlər vasitəsilə cavablandırılıb.

BŞTİ-nin “Facebook” səhifəsində daha çox qeydiyyat prosesi, altı yaşı tamam olmayan uşaqların birinci sinfə qəbulu, mikroərazi prinsipi tətbiq olunan məktəblər, məktəbəhazırlıq qruplarında oxuyan uşaqların elektron sistem tərəfindən avtomatik birinci sinfə keçirilməsi, müəllim seçimi, lisey və gimnaziyalara müsabiqə yolu ilə şagirdlərin qəbulu, məktəbə təqdim olunacaq sənədlər və digər mövzularda suallar üstünlük təşkil edib.

Qeyd edək ki, fevralın 22-dən 2018-2019-cu tədris ili üçün BŞTİ-nin və Təhsil Nazirliyinin birbaşa tabeliyindəki ümumtəhsil müəssisələrində birinci sinfə şagirdlərin online qeydiyyatı başlanıb. Gəncə, Sumqayıt şəhərləri və Abşeron rayonunun ümumtəhsil müəssisələri üzrə uşaqların qeydiyyatı isə martın 12-də başlanacaq. Uşaqların birinci sinfə qəbulu üçün valideynin (qanuni nümayəndənin) elektron ərizəsinin sistemdə qeydiyyatı sentyabrın 15-dək mektebeqebul.edu.az saytı vasitəsilə aparılacaq.

Martın 2-nə (saat 17:00) olan məlumata əsasən, elektron sistem (mektebeqebul.edu.az) vasitəsilə paytaxt məktəblərinin birinci sinfinə qəbul üçün 35.000-dən çox sorğu yerləşdirilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.