SİYASƏT
Birləşmiş Ərəb Əmirlikləri ictimaiyyəti tarixi Qələbəmiz, 10 noyabr Bəyanatı haqqında məlumatlandırılıb VİDEO
Bakı, 12 noyabr, AZƏRTAC
Azərbaycanın Birləşmiş Ərəb Əmirliklərindəki (BƏƏ) səfiri Mahir Əliyev İsrailin “İ24 (Arabic)” televiziya kanalının xəbərlər proqramında təşkil edilmiş çoxtərəfli görüşdə iştirak edib.
Ölkəmizin BƏƏ-dəki səfirliyindən AZƏRTAC-a bildiriblər ki, Dağlıq Qarabağ münaqişəsi zonasında bütün hərbi əməliyyatların tam dayandırılması barədə Azərbaycanın Prezidenti, Ermənistanın baş naziri və Rusiyanın Prezidenti tərəfindən noyabrın 10-da imzalanmış Bəyanata həsr edilmiş görüşdə səfir Mahir Əliyevlə yanaşı, rusiyalı siyasi şərhçi Yevgeni Sidorov və beynəlxalq münasibətlər üzrə fransalı ekspert Yunis Bəlfələh də iştirak ediblər.
Səfir M.Əliyev qeyd edib ki, Dağlıq Qarabağ münaqişəsi zonasında hərbi əməliyyatların tam dayandırılması barədə Bəyanat 3 tərəf arasında imzalanıb. Azərbaycan illərdir ki, vasitəçi dövlətlərin, həmçinin dünya ictimaiyyətinin çağırışları əsasında münaqişənin sülh yolu ilə, BMT Təhlükəsizlik Şurasının müvafiq dörd qətnaməsinə uyğun həllini gözləyirdi. İndi Azərbaycan 27 il əvvəl qəbul edilmiş həmin qətnamələri özü icra edir. Münaqişənin aktiv fazaya keçməsinə əsas səbəb Ermənistan ordusunun Azərbaycan Silahlı Qüvvələrinin mövqelərini, ölkəmizin münaqişə zonasından uzaqda yerləşən yaşayış məntəqələrini atəşə tutması və dinc əhalimizə qarşı mütəmadi hücumları olub. Bununla yanaşı, Ermənistan baş nazirinin qeyri-adekvat çıxışları, işğalçı ölkənin müdafiə nazirinin “biz yeni torpaqlar işğal edəcəyik” kimi bəyanatları da əsas səbəblərdəndir.
Səfir qeyd edib ki, bu gün Azərbaycan Ordusu Ali Baş Komandanın rəhbərliyi ilə bütün cəbhəboyu Ermənistan silahlı qüvvələrini darmadağın etdi. İşğal altında olan torpaqlarımızda ermənilər 30 il ərzində hərbi istehkamlar inşa etmişdi ki, Ordumuz həmin istehkamları yerlə-yeksan etdi. Bütün bunları Azərbaycan əsgəri etdi. Bu Qələbə Azərbaycan Ordusuna, Azərbaycan xalqına məxsusdur.
Fransanın bir vasitəçi kimi rolu və bu ölkənin son bəyanatları ilə əlaqədar sualı cavablandıran M.Əliyev deyib ki, Fransa Minsk qrupunun həmsədr ölkəsidir, amma Azərbaycan ərazisinin 20 faizinin işğal olunmasına, əhalisinin 1 milyonundan çoxunun qaçqın və məcburi köçkünə çevrilməsinə göz yumaraq işğalçı dövləti müdafiə etməyə qalxır. Fransa 30 ilə yaxın susub, indi isə biz beynəlxalq hüquqa, BMT Təhlükəsizlik Şurasının qətnamələrinə uyğun olaraq öz ərazilərimizi işğaldan azad etməyə başladıqda qeyri-konstruktiv bəyanatlarla sıxış edir. Bu torpaqlar bizim əcdadlarımızın torpağıdır. Ermənilərin isə bizim torpaqlarda tarixi 200 ildən artıq deyil.
Səfir son proseslərdə Türkiyə və Rusiyanın rolunu xüsusilə qeyd edib.
Proqramın digər iştirakçıları Azərbaycanın haqlı mövqeyini dəstəkləyiblər.
Proqram ərzində Azərbaycanda keçirilən izdihamlı Qələbə nümayişlərini, həmçinin İrəvanda etirazçıların mitinqlərini, Ermənistan parlamenti və Nazirlər Kabinetinin binalarına hücumları əks etdirən kadrlar nümayiş etdirilib.