CƏMİYYƏT


Bişkekdə şəhidlərimizin xatirəsi anılıb

Bişkek, 30 oktyabr, АZƏRTAC

Qırğızıstan Azərbaycanlılarının “AZƏRİ” İctimai Birliyinin təşəbbüsü ilə Bişkekdə şəhidlərimizi anma mərasimi keçirilib.

AZƏRTAC xəbər verir ki, mərasimdə paytaxtda yaşayan soydaşlarımız, qardaş qırğız xalqının nümayəndələri iştirak ediblər.

İctimai Birliyin sədri, Əməkdar hüquqşünas Əzizağa Əliyev bildirib ki, Ana Vətən çətin sınaqlardan keçir. Rəşadətli və şanlı Ordumuz Azərbaycan tarixinə yeni səhifələr yazır. Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə işğal altındakı ərazilərimiz düşmən tapdağından azad edilir. Artıq azad olunan doğma torpaqlarımızda üçrəngli bayrağımız dalğalanır. Erməni terrorçularının müharibə zonasından uzaqda olan Gəncə, Mingəçevir, Bərdə şəhərlərini, digər rayon və kəndlərimizi atəşə tutması nəticəsində ölən və yaralananlar var.

Vurğulanıb ki, Qırğızıstanda yaşayan azərbaycanlılar hadisələri böyük həyəcanla izləyirlər. Soydaşlarımız müqəddəs torpaqlarımız uğrunda canlarını fəda edənlərin və erməni terrorunun qurbanı olan dinc vətəndaşlarımızın ruhuna dualar oxuyur, onlara Allahdan rəhmət diləyirlər.

Sonra Əzizağa Əliyev milli bayram münasibətilə hər zaman Azərbaycanın yanında olan qardaş Türkiyə xalqını təbrik edib.

Mərasim iştirakçıları tezliklə Azərbaycanın işğal altındakı bütün torpaqlarının düşmən tapdağından azad ediləcəyini və bayrağımızın Şuşada dalğalanacağına əmin olduqlarını bildiriblər.

Daha sonra Bişkekdəki Azərbaycan məscidinin imamı Mərifət Şirinov, Qazaxıstandakı Azərbaycan məscidinin axundu Saleh Həsənov şəhidlərin müqəddəs ruhuna dualar oxuyublar.

Anım mərasiminin sonunda ehsan verilib.

Qulu Kəngərli

AZƏRTAC-ın xüsusi müxbiri

Bişkek

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.