ELM VƏ TƏHSİL
“Blackboard” şirkətinin nümayəndələri Azərbaycan Dövlət İqtisad Universitetində olmuşlar
Bakı, 20 fevral (AZƏRTAC). ABŞ-ın təhsildə informasiya texnologiyalarının tətbiqi sahəsində dünya lideri olan “Blackboard” şirkətinin Yaxın Şərq, Afrika və Türkiyə üzrə regional direktoru Toni Lteif və şirkətin qlobal strateji məsələlər və təhsil üzrə eksperti Pol Qrist Azərbaycan Dövlət İqtisad Universitetində (ADİU) olmuşlar.
ADİU-dan AZƏRTAC-a bildirmişlər ki, görüşdə universitetin rektoru, Milli Məclisin elm və təhsil komitəsinin sədri, professor Şəmsəddin Hacıyev rəhbərlik etdiyi ali təhsil ocağı və universitetdə informasiya-kommunikasiya texnologiyalarından (İKT) geniş istifadə olunması haqqında ətraflı məlumat vermişdir. O, 2013-cü ilin Azərbaycanda “İKT ili” elan olunması, ölkəmizdə “Elektron hökumət” konsepsiyasının reallaşdırılması və İKT-nin iqtisadi siyasətin əsas prioriteti olması barədə geniş söhbət açmışdır.
Universitetdə “Virtual universitet” layihəsinin uğurla reallaşdırıldığını bildirən Ş.Hacıyev bütün imtahanların kompyuterlər vasitəsilə keçirildiyini, hər bir tələbənin elektron məlumat bazasına fərdi girişinin mümkün olmasını və tədrislə bağlı istənilən informasiyanın tələbə və valideynlər üçün açıq olduğunu söyləmişdir.
Toni Lteif “Blackboard” şirkəti, onun fəaliyyəti və təqdim etdiyi xidmətlər haqqında məlumat vermiş, şirkətin İKT-nin təhsildə tətbiq edilməsi sahəsində dünyada lider mövqeyə sahib olmasını vurğulamışdır. O, eyni zamanda, ABŞ-ın ilk onluqda olan 9 universitetinin və dünyanın ilk ikiyüzlükdə olan 150 universitetinin məhz “Blackboard” şirkətinin elektron təhsil xidmətlərindən istifadə etdiyini bildirmişdir.
ADİU-da İKT-dən istifadənin yüksək səviyyədə olmasını söyləyən Pol Qrist təmsil etdiyi şirkət tərəfindən təklif olunan xidmətlərin böyük əksəriyyətinin bu ali məktəbdə tətbiq edilməsini və ADİU-nu “Blackboard” şirkəti üçün mühüm yerli tərəfdaş hesab etdiklərini diqqətə çatdırmışdır.
Sonra ADİU ilə “Blackboard” şirkəti arasında gələcək əməkdaşlığın konkret istiqamətləri barədə ilkin razılıq əldə olunmuşdur.
Görüşdə, həmçinin qarşılıqlı maraq doğuran digər məsələlər də müzakirə olunmuşdur.