Ağsu, 18 oktyabr, AZƏRTAC 

Son yüz ildə Azərbaycan xalqı iki dəfə öz müstəqilliyinə qovuşmaq imkanı qazanıb. 1918-ci ildə Azərbaycan ilk dəfə özünün müstəqilliyini elan edib. Həmin il mayın 28-də Azərbaycan Milli Şurası İstiqlal Bəyannaməsini qəbul etsə də, cəmi müstəqil dövlət kimi 23 ay yaşayıb.

AZƏRTAC xəbər verir ki, bu sözlər oktyabrın 18-də Ağsuda dövlət müstəqilliyimizin 26-cı ildönümünə həsr olunan tədbirdə səsləndirilib.

Tədbirdən öncə iştirakçılar Heydər Əliyev parkına gələrək Ümummilli Liderin abidəsini ziyarət edib, önünə çiçəklər qoyublar.

Rayon icra hakimiyyətində təşkil olunan tədbirdə icra hakimiyyətinin başçısı Ənvər Seyidəliyev və müavin Sevil Mirzəliyeva çıxış ediblər.

Çıxışlarda bildirilib ki, 1991-ci ildə Sovetlər birliyinin dağılması nəticəsində Azərbaycan xalqı öz müstəqilliyini yenidən bərpa edib. Həmin il oktyabrın 18-də Azərbaycan Respublikasının Ali Soveti Dövlət Müstəqilliyi haqqında Konstitusiya aktı qəbul edib. Konstitusiya Aktı 1991-ci il dekabrın 30-da ümumxalq səsverməsi ilə bəyənilib. 26 il əvvəl qəbul edilən müstəqillik haqqında Konstitusiya Aktı tariximizin ən şanlı səhifəsində öz layiqli yerini tutub. O vaxtkı ağır tarixi şərait, dağılmaqda olan sovet imperiyasının ermənilərə havadarlıq etməsi, bunun nəticəsində torpaqlarımızın işğalı, törədilən təxribatlar, yarıtmaz idarəetmə müstəqilliyimizin ilk illərində ölkəmizdə ciddi problemlərə səbəb olub. 1993-cü ildə xalqın təkidi ilə ikinci dəfə hakimiyyətə qayıdan görkəmli dövlət və siyasi xadim Heydər Əliyev Azərbaycanın müstəqilliyini əbədi və dönməz edib.

Məruzə və çıxışlarda vurğulanıb ki, Ulu Öndərin müstəqilliyimizin qorunub saxlanması və möhkəmləndirilməsi istiqamətində yorulmaz səyləri bu gün onun layiqli davamçısı, Prezident İlham Əliyev tərəfindən uğurla davam etdirilir. Azərbaycan yerləşdiyi bölgədə baş verən strateji, siyasi və iqtisadi proseslərin gedişinə təsir göstərməyə qadir ölkəyə çevrilib.

X X X

Yeni Azərbaycan Partiyası (YAP) Kürdəmir rayon təşkilatının inzibati binasında Azərbaycanın dövlət müstəqilliyinin 26-cı ildönümü münasibətilə “Müstəqilliyimiz əbədidir, dönməzdir” mövzusunda konfrans keçirilib. 

AZƏRTAC xəbər verir ki, tədbir iştirakçıları əvvəlcə Ulu Öndərin binanın foyesindəki büstü önünə gül dəstələri düzüblər.

Konfransı rayon icra hakimiyyətinin başçısı Ceyhun Cəfərov açaraq, ümummilli lider Heydər Əliyevin qurub yaratdığı müasir Azərbaycanın parlaq uğurlarından danışıb.

Tədbirdə səsləndirilən məruzələrdə qeyd olunub ki, 1991–ci il oktyabrın 18–də müstəqillik haqqında Konstitusiya Aktının qəbul edilməsi ilə XX əsr Azərbaycan tarixinin yeni mərhələsi başlanıb. Ötən əsrin 90-cı illərinin əvvəllərində xalqın təkidi ilə yenidən hakimiyyətə gələn ulu öndər Heydər Əliyev tərəfindən həyata keçirilən milli dövlətçilik, azərbaycançılıq ideologiyasının formalaşdırılması siyasətinin nəticəsi olaraq qısa dövrdə dövlətimizin hüquqi-sosial bazası yaranıb, müstəqilliyi möhkəmlənib, dünya birliyinə inteqrasiyası istiqamətində ciddi addımlar atılıb. Ulu Öndərin əsasını qoyduğu siyasi və iqtisadi kursun, cəmiyyət həyatının bütün sahələrini əhatə edən islahatların Prezident İlham Əliyev tərəfindən uğurla davam etdirilməsi nəticəsində son illər Azərbaycan dünyada qabaqcıl ölkələr sırasına çıxıb, iqtisadi inkişaf tempinə görə lider ölkələrdən birinə çevrilib. Əlbəttə, bütün bu nailiyyətlər, qazanılan uğurlar asanlıqla əldə olunmayıb.

X X X

İsmayıllıda “Heydər Əliyev idarəetmə məktəbi”nin növbəti məşğələsi müstəqilliyimizin 26-cı ildönümünə həsr edilib və məşğələdə “Azərbaycanın dövlət müstəqilliyi əbədi və dönməzdir” mövzusu tədris olunub.

AZƏRTAC xəbər verir ki, rayon ziyalılarının, müəllimlərin, ağsaqqalların, gənclərin, idarə və müəssisə rəhbərlərinin iştirak etdiyi məşğələdə əvvəlcə müstəqilliyimizə həsr olunan film nümayiş etdirilib.

Sonra rayon icra hakimiyyəti başçısının birinci müavini Rövşən Ağayevin məruzəsi dinlənilib, çıxışlar olub. Qeyd edilib ki, 1918-ci il mayın 28-də müsəlman Şərqində ilk olaraq Azərbaycan dövlət müstəqilliyi əldə edib, demokratik cümhuriyyət qurub. Təəssüf ki, demokratik dövlətimiz cəmi 23 ay yaşadı. Lakin uzun illər xalqın azadlıq, müstəqillik arzuları sarsılmadı. Nəhayət, 70 il sonra, 1991-ci il oktyabrın 18-də Azərbaycan yenidən müstəqillik qazandı. İlk vaxtlar ciddi problemlər yaşayan Azərbaycanda xalq ulu öndər Heydər Əliyevi təkidlə yenidən hakimiyyətə gətirdi və dövlətimiz dahi rəhbərin düşünülmüş və uzaqgörən siyasəti nəticəsində yenidən müstəqillik yoluna qədəm qoydu.

Məşğələyə yekun vuran rayon icra hakimiyyətinin başçısı Mirdaməd Sadıqov Azərbaycanın dövlət müstəqilliyinin əbədi və dönməz xarakter aldığını, Prezident İlham Əliyevin Ulu Öndərin yaratdığı əsaslar üzərində ölkəmizi regionda aparıcı dövlətə çevirdiyini, beynəlxalq miqyasda söz sahibi etdiyini diqqətə çatdırıb.