MƏDƏNİYYƏT


Borçalının havası, suyu kimi təmiz olan insan

Bakı, 12 yanvar, Zərəngiz Mansurova, AZƏRTAC

Yanvarın 12-də Əməkdar Elm Xadimi, fəlsəfə elmləri doktoru, professor Camal Mustafayevin xatirəsi yad edilib.

AZƏRTAC xəbər verir ki, anma mərasimində alimin ömür yolundan, elmi axtarışlarından, insani keyfiyyətlərindən və Azərbaycan elminə verdiyi dəyərli töhfələrdən söhbət açılıb.

Bildirilib ki, dərin düşüncəli mənəviyyat adamı idi Camal Mustafayev. O hələ sağlığında “Dədə Camal” adlandırılaraq mənəviyyat heykəli kimi böyük hörmət və nüfuz qazanmışdır. Onun “Əxlaq dərsi vermək, ağıl öyrətmək görünməmiş hünər deyil. Ən çətini əxlaqa, həqiqətə uyğun yaşamaqdır” fikirləri indi də yaddaşlarda özünə əbədiyaşarlıq qazanıb.

Vurğulanıb ki, alimin Borçalının havası, suyu qədər saf, təmiz, insanı duyğulandıran unudulmaz səmimi söhbətləri, elmi məqalələri, sanballı kitabları gənclər üçün bir örnək, həyat dərsidir.

Çıxış edənlər Qədim Şərq, yunan və Avropa mədəniyyətinə, tarixinə və fəlsəfəsinə dərindən bələd olan Camal müəllimin özlüyündə geniş elmi düşüncəyə, təfəkkürə malik bir fəlsəfə məktəbi olduğunu söyləyiblər. Onun fikirlərinin uzun illər çalışdığı Bakı Dövlət, Xarici Dillər, Xəzər universitetlərinin və digər təhsil ocaqlarının tələbələrinin mənəvi tərbiyəsində böyük rol oynadığı bildirilib. Filosofun “İdrakın şeriyyəti” və “Fəlsəfi-tarixi araşdırmalar” kitabları və yüzdən çox elmi məqaləsi, tezisləri böyük bir erudisiyaya, təfəkkürə malik olan ağılın, düşüncənin və bənzərsiz idrakın məhsulu olduğu bildirilib.

Tədqiqatçı filosofun çağdaş ədəbi proseslə bağlı vaxtaşırı qələmə aldığı dəyərli elmi məqalələri ədəbi, elmi fikrin inkişafına əvəzsiz töhfə kimi dəyərləndirilib.

Mərasimdə “Borçalı” qəzetinin görkəmli filosofun xatirəsinə həsr etdiyi “Xüsusi buraxılış”ı iştirakçılara təqdim olunub.

Qeyd edilib ki, görkəmli alimin yazdığı əsərlər heç zaman aktuallığını itirməyəcək və onun xatirəsi daima qəlblərdə yaşayacaq.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.