İQTİSADİYYAT


Böyük Britaniya Dövlət Gömrük Komitəsinə təhlükəsiz axtarış avadanlıqları hədiyyə edib

Bakı, 23 noyabr, AZƏRTAC

Dövlət Gömrük Komitəsi (DGK) ilə Böyük Britaniyanın Sərhəd Mühafizəsi Direktoratlığının birgə həyata keçirdiyi “Hunter” layihəsi çərçivəsində Cənub Ərazi Baş Gömrük İdarəsinin Biləsuvar və Astara gömrük postlarının əməkdaşları üçün “Nəqliyyat vasitələrinin axtarışı” mövzusunda britaniyalı ekspertlərin iştirakı ilə təlimlər keçirilib.

Komitənin Mətbuat və İctimaiyyətlə Əlaqələr İdarəsindən AZƏRTAC-a bildirilib ki, təlimlərin keçirilməsində əsas məqsəd yük nəqliyyat vasitələrinin təhlükəsiz və effektiv şəkildə axtarışı üzrə Böyük Britaniya təcrübəsini bölüşməkdən ibarət olub.

Tədbirin açılışında çıxış edən Cənub Ərazi Baş Gömrük İdarəsinin rəisi Mirmahmud Miratayev Böyük Britaniyanın Sərhəd Mühafizəsinin nümayəndələrini salamlayaraq, “Hunter” layihəsi çərçivəsində həyata keçirilən təlimlərin gömrük əməkdaşlarının potensialının gücləndirilməsinə, sərhəd təhlükəsizliyinin təmin olunmasına dair fikir mübadiləsinin aparılmasına və yeni müasir texnologiyaların tətbiqi sahələri üzrə əməkdaşlığın inkişafına böyük töhfə verəcəyinə əminliyini ifadə edib.

İnteraktiv qaydada keçirilən təlim nəzəri və praktiki hissələrdən ibarət olub. Nəzəri məşğələlər zamanı şassinin və soyuducu qoşqunun konstruksiyası və komponent hissələri, treylerin növləri, tankerlərin tikintisinə dair məlumatlar verilib, tədbir iştirakçılarına nəqliyyat vasitələrinin konstruksiyalarına dair müxtəlif sənədlər paylanılaraq qrup şəklində fikir mübadiləsi aparılıb. Bundan əlavə Böyük Britaniyanın mütəxəssisləri tərəfindən gizlətmə üsulları barəsində videogörüntülər nümayiş olunub.

Astara və Biləsuvar gömrük-sərhəd buraxılış məntəqələrində keçirilmiş praktiki məşğələlər zamanı britaniyalı ekspertlər tərəfindən gömrük əməkdaşlarına yük nəqliyyat vasitələrinin axtarışı ilə bağlı praktiki tapşırıqlar verilib. Eyni zamanda, DGK ilə Böyük Britaniyanın Sərhəd Mühafizəsi Direktoratlığının birgə həyata keçirdiyi “Hunter” layihəsi çərçivəsində sözügedən təlimlərin bir hissəsi olaraq, Böyük Britaniyanın Sərhəd Mühafizəsi Direktoratlığının nümayəndələri tərəfindən Komitəyə əvəzsiz olaraq təhlükəsiz axtarış avadanlıqları hədiyyə edilib və təlimlərdə iştirak edən əməkdaşlara sertifikatlar təqdim olunub.

Qeyd edək ki, sözügedən təlimin noyabrın 24-25-də “Beynəlxalq Dəniz Ticarət Limanı” gömrük postunun əməkdaşları üçün davam etdirilməsi nəzərdə tutulur.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.