QAN YADDAŞI


Böyük Britaniya və Şimali İrlandiya Birləşmiş Krallığının Lids Universitetində Xocalı soyqırımına həsr olunmuş tədbir keçirilmişdir

Bakı, 28 fevral (AZƏRTAC). Böyük Britaniya və Şimali İrlandiya Birləşmiş Krallığının Lids Universitetində təhsil alan bir qrup azərbaycanlı tələbə tərəfindən həmin ali məktəbdə Xocalı soyqırımının 20 illiyinin anılması, faciənin miqyası, nəticələri barədə həqiqətlərin müxtəlif ölkələrdən olan tələbə-müəllim heyətinə çatdırılması məqsədi ilə “Azərbaycanı tanıyaq” adlı tədbir keçirilmişdir. Azərbaycanın tarixi, mədəniyyəti, nailiyyətləri, eləcə də problemləri, Ermənistan tərəfindən məruz qaldığı təcavüz, işğalçılıq siyasətinin beynəlxalq aləmə çatdırılmasına xidmət edən tədbirdə, Birləşmiş Krallıqla yanaşı, müxtəlif ölkələrin vətəndaşları da iştirak etmişlər.

Tələbələr adından mərasimi açan Rəvan Səmədov çoxmillətli auditoriyanı zəngin tarixi-mədəni ənənələri olan, Şərq və Qərb dəyərlərinin kəsişdiyi, çoxsaylı milli-etnik qrupların vətəni, sülh mədəniyyəti və tolerantlıq nümunəsi Azərbaycanı yaxından tanımağa və sevməyə, eləcə də onun üzləşdiyi erməni təcavüzü, Xocalı soyqırımı barədə məlumatlı olmağa çağırmışdır.

“Odlar yurdu – Azərbaycan” adlı təqdimatla çıxış edən Şahin Səmədli Azərbaycanın yerləşdiyi coğrafi ərazi, sərhədləri, təbiəti, dövlət quruluşu, paytaxtı, iqtisadiyyatı, neft sənayesi, həmçinin əhalisi, çoxəsrlik tarixə malik mədəniyyəti, milli adət-ənənələri, bayramları, zəngin milli mətbəxi, xalçaçılıq, muğam sənəti, müasir dünya mədəniyyətinin inkişafına töhfələri haqda ətraflı məlumat vermiş, eləcə də “Eurovision-2012” mahnı müsabiqəsinin Bakı şəhərində keçiriləcəyini tədbir iştirakçılarının diqqətinə çatdırmışdır.

Qoşqar Qurbanlı “Azərbaycan tarixi” adlı təqdimatında Azərbaycanın ən qədim dövrlərdən bu günədək keçdiyi mürəkkəb yolu diqqətə çatdırmış, coğrafi mövqeyi və zəngin təbii ehtiyatlarına görə daim böyük imperiyaların maraqlarında olduğundan işğallarla üzləşməsi, Türkmənçay müqaviləsi, həmçinin XX əsrin əvvəllərində müstəqilliyinə son qoyularaq Sovet imperiyasının tərkibinə daxil edilməsi, əsrin sonlarında apardığı azadlıq mübarizəsi, yenidən müstəqillik əldə etdikdən sonra inkişafı, müxtəlif beynəlxalq və regional təşkilatların işində uğurlu iştirakı, habelə regionda lider dövlətə çevrilməsi kimi məsələləri qeyd etmişdir.

“Qarabağ həqiqətləri” mövzusundan bəhs edən Elvin Balacanov Qarabağın Azərbaycanın ayrılmaz tərkib hissəsi olduğunu sübut edən tarixi faktlara toxunaraq ermənilərin illər boyu Azərbaycan torpaqlarına ərazi iddiaları, Ermənistan Respublikasının XX əsrin sonlarında yeritdiyi işğalçılıq siyasəti, işğalın miqyası, fəsadları, işğal zamanı törədilmiş beynəlxalq cinayətlər haqda məlumat verərək, BMT Təhlükəsizlik Şurasının müvafiq qətnamələrinə indiyədək məhəl qoyulmadığını xüsusi vurğulamışdır.

Cahangir Cəfərov və Tural Hüseynov “Soyqırımılara son” adlı təqdimatlarında Xocalı soyqırımının tarixi, 20 il öncə dinc əhaliyə qarşı törədilmiş misilsiz vəhşiliklər və bunun acı nəticələri, ötən əsrin insanlıq əleyhinə ən ağır, amansız cinayətləri ilə müqayisəyə gələcək Xocalı soyqırımında təqsirli olanların şəxsiyyəti barədə tutarlı faktlar açıqlamışlar. Təqdimatda faciənin canlı şahidlərinin söylədikləri ilə yanaşı, Xocalı soyqırımı barədə beynəlxalq mətbuatda əksini tapmış fikirlər də tədbir iştirakçılarının nəzərinə çarpdırılmışdır.

Müvafiq videoçarxlar, həmçinin əhatəli xəritələr, zəngin fotoalbomlarla müşayiət olunan təqdimatlar tədbir iştirakçıları tərəfindən böyük maraq və diqqətlə qarşılanmışdır.

İştirakçıları maraqlandıran suallar Vusal Muradov və yuxarıda adları çəkilən natiqlər tərəfindən ətraflı cavablandırılmışdır.

Azərbaycan Respublikasının insan hüquqları üzrə müvəkkilinin (Ombudsman) Xocalı soyqırımının 20-ci ildönümü ilə əlaqədar bəyanatı və Azərbaycanın məruz qaldığı təcavüz, həmçinin Xocalı soyqırımı barədə Azərbaycan səfirliyindən təqdim olunmuş nəşrlər və köynəklər tədbir iştirakçıları arasında paylanmışdır.

Lidsdə təhsil alan azərbaycanlı tələbələr, həmçinin fevralın 25-də Londonda təşkil olunmuş, Trafalqar meydanından başlayaraq Parlament binasınadək davam edən “Xocalı – 20-ci ildönümü” adlı yürüş-mitinqdə iştirak etmişlər.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.