Bakı, 9 iyul (AZƏRTAC). Braziliyada futbol üzrə XX dünya çempionatı davam edir.

AZƏRTAC xəbər verir ki, iyulun 8-də Belo Horizonte şəhərində mundialin yarımfinal mərhələsi çərçivəsində Braziliya və Almaniya milli komandaları qarşılaşmışlar.

1965-ci ildə istifadəyə verilmiş və 58 min 170 azarkeş tutumuna malik “Estadio Mineirao” stadionunda keçirilən oyunda Braziliya millisinin heyətində meydana Julio Sezar, David Luiz, Fernandinio, Marselo, Halk, Dante, Fred, Luiz Qustavo, Bernard, Oskar və Maicon çıxmışlar.

Almaniya yığmasının ilk on birliyində isə Manuel Neuer, Benedikt Hoevedes, Mats Hummels, Sami Xedira, Bastian Şveinşteiger, Mesut Özil, Miroslav Kloze, Tomas Müller, Filip Lam, Toni Krus və Jerome Boetenq yer almışlar.

Meksikalı baş hakim Marko Rodriqezin idarə etdiyi görüşün 11-ci dəqiqəsində almaniyalı futbolçu Tomas Müller hesabı açmışdır. On iki dəqiqə sonra Miroslav Kloze ikinci topu Braziliya millisinin qapısından keçirməklə yeni rekord müəyyənləşdirmiş və dünya çempionatları tarixinin ən sərrast futbolçusu olmuşdur. Belə ki, dünya çempionatlarında 16-cı qolunu vuran Miroslav Kloze əfanəvi braziliyalı futbolçu Ronaldonun (15 qol) rekordunu yeniləmişdir.

Görüşün 25 və 26-cı dəqiqəsində dubl edən Almaniya millisinin üzvü Toni Krus hesab arasındakı fərqi artırmışdır. Matçın 29-cu dəqiqəsində Sami Xedira beşinci topu rəqib qapısından keçirmişdir.

Qarşılaşmanın 69-cu dəqiqəsində almaniyalı futbolçu Andre Şürrle fərqlənmiş və on dəqiqə sonra dubl etmişdir. Görüşün 90-cı dəqiqəsində braziliyalı futbolçu Oskar komandasının ilk qolunu vurmuşdur.

Beləliklə, rəqibini 7:1 hesabı ilə məğlub edən Almaniya millisi dünya çempionatının final mərhələsinə yüksəlmişdir. Həlledici mərhələdə Almaniya yığması Argentina – Niderland görüşünün qalibi ilə qarşılaşacaqdır.

Bu görüşlə Almaniya millisi dünya çempionatları tarixində vurduğu topların sayını 223-ə çatdırmış və birinci pilləyə yüksəlmişdir. Hesabında 221 qol olan Braziliya millisi ikinci yerə enmişdir.

Bu görüş Braziliya millisi üçün dünya çempionatları tarixində anti-rekord olmuşdur. Braziliya millisi ilk dəfə qapısından 7 top buraxmışdır. 1938-ci ildə Fransada keçirilmiş dünya çempionatında Polşa millisi ilə oyunda Braziliya yığması qapısından 5 top buraxsa da, rəqibini 6 dəfə məyus etməyi bacarmışdı. Komanda mundialda böyük hesablı məğlubiyyəti 1954-cü ildə İsveçrədə keçirilmiş çempionatda Macarıstan millisi ilə oyunda yaşamışdır – 2:4.