London, 14 iyun (AZƏRTAC). Britaniyanın nüfuzlu “The Portsmouth News” qəzeti Azərbaycanın zəngin tarixindən bəhs edən “Odlar Yurdunun əzəmətli tarixi var” sərlövhəli məqalə dərc etmişdir.

Məqalədə, “Atəşgah”, “Yanardağ” və başqa tarixi abidələrimiz haqqında məlumat verilmiş, onların qədim tarixindən bəhs edilmişdir.

Ölkəmizi ziyarət edən müəllif, bu abidələri gördükdən sonra Azərbaycanın niyə məhz “Odlar Yurdu” adlandırıldığını başa düşdüyünü diqqətə çatdırmışdır.

Məqalədə həmçinin ölkəmizin 3 min 5 yüz illik dini inanc tarixinin olduğu vurğulanmışdır.

Yazıda həmçinin ölkəmizin neft və qaz sənayesindən bəhs edilmiş, ulu öndər Heydər Əliyevin uzaqgörən siyasəti nəticəsində imzalanan “Əsrin müqaviləsi” haqqında məlumat verilmişdir.

Bakının müasirliyi və gözəlliklərindən bəhs edən müəllif, dünyanın nadir memarlıq nümunələrindən hesab edilən Heydər Əliyev Mərkəzi, UNESCO-nun siyahılarına düşmüş İçərişəhər, Qobustan kimi milli mədəni və tarixi abidələrimizdən söz açmışdır.

Azərbaycanın bura gələn turistlər üçün müasir və dəbdəbəli mehmanxana şəbəkəsinə malik olduğu diqqətə çatdırılır.

Məqalənin tam mətnini aşağıdakı linkdən oxumaq mümkündür: http://www.portsmouth.co.uk/life/travel-review/there-s-lots-of-history-in-the-land-of-fire-1-6118814

Orxan İsmayılov

AZƏRTAC-ın xüsusi müxbiri

London