Tərtər, 7 mart, AZƏRTAC

Tərtərdə “Heydər Əliyev İli” çərçivəsində “Heydər Əliyev və Azərbaycanda qadın siyasəti” mövzusunda tədbir keçirilib. Tərtər Rayon İcra Hakimiyyətinin və Yeni Azərbaycan Partiyası (YAP) rayon təşkilatının birgə təşkilatçılığı ilə keçirilən tədbirdə hüquq-mühafizə orqanlarının rəhbərləri, Vətən müharibəsi şəhidlərinin anaları və həyat yoldaşları iştirak ediblər.

AZƏRTAC-ın bölgə müxbiri xəbər verir ki, əvvəlcə Ümummilli Lider Heydər Əliyevin və torpaqlarımızın bütövlüyü uğrunda canından keçmiş şəhidlərimizin xatirəsi bir dəqiqəlik sükutla yad edilib.

Rayon icra hakimiyyətinin başçısı Müstəqim Məmmədov şəhid analarının timsalında tərtərli qadınları 8 Mart – Beynəlxalq Qadınlar Günü münasibətilə təbrik edib, onlara cansağlığı, səadət və gələcək işlərində uğurlar arzulayıb. Bildirilib ki, şəhid anaları Vətənə olan sevgilərini 44 günlük Vətən müharibəsinə igid oğullar yola salmaqla sübut ediblər. Vətənə məhəbbətlərini övlad məhəbbətindən də üstün tutublar.

Diqqətə çatdırılıb ki, qədim zamanlardan Azərbaycanda qadına – anaya daim böyük ehtiram və hörmət bəslənilib, ana həmişə müqəddəs olmuş, namus, qeyrət rəmzi sayılıb. Müdrik hökmdar, cəsur sərkərdə, istedadlı şair və sənətkar qadınlarımızın adları çoxəsrlik tariximizin səhifələrinə qızıl hərflərlə yazılıb.

Qeyd edilib ki, Azərbaycanda qadınların hüquqlarının qorunması, onların ictimai fəallığının təşkili məsələsi Ulu Öndər Heydər Əliyev tərəfindən hər zaman diqqət mərkəzində saxlanılıb.

Müasir dövrdə qadınlarımız müstəqil Azərbaycanın inkişafına öz dəyərli töhfələrini verir, beynəlxalq qadın hərəkatında fəal iştirak edirlər. Ümummilli Lider Heydər Əliyev qadınların bu xidmətlərini – gənc nəslin sağlam, vətənpərvərlik ruhunda böyüməsində sərf etdikləri əməyi yüksək qiymətləndirir, onlara daim böyük diqqət və qayğı göstərirdi.

Bildirilib ki, qadınlara yüksək diqqət və qayğı, onlar üçün yaradılan bütün imkanların daha da genişləndirilməsi bu gün Ulu Öndərin siyasi kursunun layiqli davamçısı Prezident İlham Əliyevin dövlət siyasətində müəyyən etdiyi prioritet istiqamətlərdəndir. Bu gün Azərbaycanın birinci xanımı, Azərbaycan Respublikasının Birinci vitse-prezidenti Mehriban xanım Əliyeva istər ölkəmizdə, istərsə də Vətəndən uzaqlarda öz işi, bacarığı və əvəzsiz keyfiyyətləri ilə Azərbaycan xanımlarını ən yüksək səviyyədə təmsil edir və Azərbaycan qadınının nələrə qadir ola biləcəyini gördüyü işlərin sanbalı ilə sübut edir.

Tədbirdə şəhid Ceyhun Hacıyevin anası Qətibə Hacıyeva, şəhid Rəşad Mirzəlinin anası Afiqə Mirzəyeva, şəhid Nurlan Şirinlinin anası Esmira Şirinova, şəhid Aysənan Abbasovun anası Rəna Abbasova çıxış edərək, ölkəmizdə şəhid ailələrinin və qazilərinin problemlərinin daim diqqətdə saxlanıldığını, şəhidlərin doğum və anım günləri tədbirlərinin yüksək səviyyədə təşkil olunduğunu, şəhid adlarının əbədiləşdirildiyini qeyd edərək, onlara göstərilən diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya öz minnətdarlıqlarını bildiriblər.

Tədbirin sonunda şəhid analarına təşəkkürnamələr və hədiyyələr təqdim olunub.