İDMAN


Bu gün İngiltərə Premyer Liqasında ilk tura start veriləcək

Bakı, 10 avqust, Nicat Məmmədov, AZƏRTAC

Avqustun 10-da 130-cu İngiltərə Premyer Liqasına start veriləcək.

AZƏRTAC xəbər verir ki, üç günü əhatə edəcək ilk tura “Mançester Yunayted”-“Lester Siti” oyunu ilə start veriləcək.

Birinci turda azarkeşlərin səbirsizliklə gözlədiyi oyun avqustun 12-də keçiriləcək. Son çempion “Mançester Siti” “Arsenal”ın qonağı olacaq. Digər qarşılaşmalar isə bunlardır:

“Nyukasl”-“Tottenxem”,

“Bormunt”-“Kardiff”,

“Fulxem”-“Kristal Palas”,

“Haddesfild”-“Çelsi”,

“Votford”-“Brayton”,

“Vulverxempton”-“Everton”,

“Liverpul”-“Vest-Xem”,

“Samupqenton”-“Börnli”.

Futbolun beşiyi olaraq qəbul edilən İngiltərədə futbol 1885-ci ildə professionallaşmağa başladı.

İlk liqa 1888-ci ildə “Aston Villa” klubunun prezidenti Uilyam Mcqregorun təşəbbüsü ilə təşkil olundu. Bu, eyni zamanda, dünyadakı ilk professional liqa olaraq tarixə düşdü. İlk mövsümün çempionu isə “Preston Nort End” oldu. “Preston Nort End” həmin mövsümü məğlubiyyətsiz başa vurdu. İnanılmaz bir rəqabətin olduğu liqada indiyədək yalnız dörd komanda üç dəfə üst-üstə çempionluğa sahib olub. Bunlar “Haddersfild Taun”, “Arsenal”, “Liverpul” və “Mançester Yunayted” komandalarıdır.

1980-ci illərə qədər Avropanın öndə gədən liqalarından biri olan İngiltərə Liqası 1985-ci ildə Heyzel faciəsindən sonra UEFA tərəfindən cəzalandırıldı. UEFA ingilis klublarını bütün avrokubok yarışmalarından uzaqlaşdırdı. Nəticədə futbol azarkeşlərin diqqəti İtaliya A Seriyasına və İspaniya La Liqasına yönəldi. 1992-ci ildə İngiltərə Futbol Federasiyası liqanı ləğv etdi və yerinə Premyer Liqa (FA Premier League) adlandırılan çempionat yaratdı. İlk mövsümündə 22 komandanın oynadığı Premyer Liqada 1995-ci ildə klubların sayı 20-yə endirildi.

İngiltərə Premyer Liqasında ən çox oyun keçirən oyunçu Qaret Baridi. O, “Everton”, “Aston Vila”, “Mançester Siti”, “Vest Bronviç” klublarına çıxış edib və ümumilikdə 653 oyun keçirib. Turnirin ən çox fərqlənən oyunçusu isə İngiltərə millisinin və “Nyukasl” klubun oyunçusu Alan Şirerdi. Hücumçu 559 oyuna 260 dəfə fərqlənib.

“Liverpul” klubu 1992-ci ilə qədər çempionatın ən uğurlu klubu hesab edilirdi. Adı dəyişdiriləndən sonra isə İngiltərə Premyer Liqasının ən titulu komandası “Mançester Yunayted” oldu. Ümumilikdə “qırmızı şeytan”lar 20 dəfə İngiltərə çempionu adı qazanıblar. 18 dəfə çempionluq adını qazanan “Liverpul” ikinci yerdədir. Üçüncü pillədə olan “Arsenal” 13, dördüncü yerdə qərarlaşan “Everton” 9 , ilk beşliyi tamamlayan “Aston Vila” isə 7 dəfə çempion adı qazanıb.

Həmçinin İngiltərə Premyer Liqası dünyanın ən gəlirli çempionatı sayılır. Rekord gəlir isə 2007/2008-ci il mövsümündə qeydə alınıb. Bu çempionatın gəliri 3,15 milyard dollar olub.

İngiltərə Premyer Liqasının kuboku “Royal Jewelers” (Garrard & Co) şirkəti tərəfindən yaradılıb. İyirmi beş kiloqram ağırlığı olan kubokun hündürlüyü 76 santimetrə çatır. Kubok 925 əyar gümüşdən hazırlanıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.