İDMAN


Bu gün “Qarabağ” komandası UEFA Avropa Liqasının qrup mərhələsində son ev oyununu keçirəcək

Bakı, 29 noyabr, Nicat Məmmədov, AZƏRTAC

Noyabrın 29-da Ağdamın “Qarabağ” futbol klubu UEFA Avropa Liqasının qrup mərhələsinin beşinci turunda Portuqaliyanın “Sportinq” klubu ilə qarşılaşacaq.

AZƏRTAC xəbər verir ki, görüş Bakı vaxtı ilə saat 21:55-də başlayacaq. Bakı Olimpiya Stadionunda keçiriləcək matçı Fransadan olan hakimlər briqadası idarə edəcək. Görüşün baş hakimi Fransua Leteksiye olacaq. Ona yan xətt hakimləri Siril Münyö və Mehdi Rahmuni kömək edəcəklər.

Qrupun digər oyununda “Arsenal” səfərdə Ukraynanın “Vorskla” komandasının qonağı olacaq.

Bu, Qurban Qurbanovun yetirmələrinin sonuncu ev oyunudur. Ağdamlılar ilk görüşdə Lissabonda “Sportinq”ə məğlub olublar - 0:2. “Qarabağ” ardıcıl iki ev oyununda əvvəlcə “Arsenal”a (0:3), daha sonra “Vorskla”ya (0:1) uduzub. Lakin Ağdam təmsilçisi dördüncü turda “Vorskla”nı səfərdə minimal hesabla məğlub etməyi bacarıb.

Dörd turdan sonra E qrupuna 10 xalla “Arsenal” liderlik edir. “Sportinq”in 7, “Vorskla” və “Qarabağ”ın aktivlərində 3 xal var.

Lissabondakı matç Portuqaliya və Azərbaycan klublarının ilk dueli kimi tarixə düşüb. “Qarabağ” pley-off mərhələsinə yüksəlmək üçün bu görüşdə mütləq qələbə qazanmalıdır. Əgər qonaqlar qalib gələcəkləri təqdirdə qrupdan çıxmağı təmin edəcəklər.

“Qarabağ”da əsas problem İnnosent Emeqaranın yoxluğudur. Əcnəbi forvard Azərbaycan Premyer Liqasının XII turunda “Sabah” ilə oyundan əvvəl isinmə hərəkətləri zamanı zədələnib. Lissabon təmsilçisinin baş məşqçisi Marsel Kayzer isə 11 oyunçunun xidmətindən yararlana bilməyəcək.

Rodriqo Battalya və Stefan Ristovski zədəli olduqlarına görə görüşü buraxacaqlar. Fredi Montero və Rafinya matça hazır deyillər. UEFA Avropa Liqasının dördüncü turunda səfərdə “Arsenal” ilə qolsuz heç-heçəyə nail olduqları qarşılaşmada Markos Xavyer Akunya sarı vərəqə limitini keçib, Jeremi Matyö isə qırmızı vərəqə alıb. Komandanın sabiq baş məşqçisi Joze Pezeyru Bruno Sezar, Marselo Ferreyra, Lük Kastanyos, Lumor Aqbenyenu və Yosip Mişiçi Avropa Liqasının iştirak ərizəsinə daxil etməyib. Belə vəziyyətdə “Sportinq” Bakıya 19 futbolçu ilə gəlib. Onlardan dördü əvəzedici komandanın üzvləridir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.