CƏMİYYƏT


Bu gün Xocəsəndə 3 hektar ərazidə 2500-dən çox müxtəlif cinsli ağac əkilib VİDEO

Bakı, 27 noyabr, AZƏRTAC

Bu gün Binəqədi rayonunun ərazisində davam etdirilən ağacəkmə kampaniyası Azərbaycan ekoloqlarının cəmiyyətə etdiyi çağırışa verilən cavabdır. Ayrı-ayrı insanların və təşkilatların bu çağırışa həvəslə qoşulması onu göstərir ki, cəmiyyətimiz ekoloji tarazlığın qorunması işinə nə dərəcədə həssaslıqla yanaşır.

AZƏRTAC xəbər verir ki, bu fikirləri noyabrın 27-də Binəqədi rayonunun Xocəsən qəsəbəsində keçirilən növbəti ağacəkmə aksiyasında iştirak edən ekologiya və təbii sərvətlər naziri Muxtar Babayev deyib. Neçə illərdir bu kampaniyanın davam etdiyini bildirən nazir təbiətin “ağ ciyəri” hesab edilən ağaclara həssas münasibətin formalaşmasını hər bir cəmiyyət üçün başlıca göstərici hesab edildiyini xatırladır: “Bu münasibəti vətəndaşlarımızda müşahidə etmək çox xoşdur. Bu gün əkilən ağaclar haqqında isə onu deyə bilərik ki, onların seçimi zamanı Abşeronun relyefi ilə harmoniya təşkil edən ənənəvi növlərə üstünlük vermişik”.

IDEA İctimai Birliyi, Ekologiya və Təbii Sərvətlər Nazirliyinin birgə təşkilatçılığı ilə həyata keçirilən “Yaşıl Marafon” ağacəkmə kampaniyasına digər qurumların əməkdaşlarının da qoşulduğunu qeyd edən Muxtar Babayev bu kampaniya çərçivəsində ayrı-ayrı şəhər və rayonlarda idarə və müəssisələri, ictimai təşkilat və fiziki şəxsləri şəxsi təşəbbüsə səslədi.

Xocəsən qəsəbəsində uğurla keçirilən “Yaşıl Marafon”da Ekologiya və Təbii Sərvətlər və Rəqəmsal İnkişaf və Nəqliyyat nazirlikləri, Dövlət Gömrük Komitəsi, Diasporla İş üzrə Dövlət Komitəsi rəsmiləri, Binəqədi Rayon İcra Hakimiyyəti əməkdaşları və Azərbaycan Könüllü Təşkilatları İttifaqına üzv könüllülərin iştirakı ilə 3 hektar ərazidə Abşeron yarımadasının iqliminə uyğun 2500-dən çox müxtəlif cinsli ağac əkilib.

Kampaniyaya qatılan Dövlət Diaspor Komitəsinin sədri Fuad Muradov bildirib ki, bu cür tədbirlər respublikada ekoloji vəziyyətin yaxşılaşdırılmasına xidmət etdiyi kimi həm də vətəndaş həmrəyliyinin ifadəsidir. Tədbirə Niderlandda yaşayan azərbaycanlıların diaspor təşkilatı nümayəndələrinin də qatıldığını bildirən komitə sədri fikrini belə davam etdirib: “Vətəndaş birliyi milli dəyərlərin qorunması işində başlıca amildir. Bugünkü tədbirin rəmzi mənalarından biri də məhz bundan ibarətdir və hesab edirik ki, bu cür kampaniyalar təbiəti sevdirmək baxımından həm də tərbiyəvi əhəmiyyətinə görə diqqətə layiqdir”.

Əməkdaşımızla söhbət zamanı “Yaşıl Marafon”da iştirak edən Qarabağ Dirçəliş Fondunun İdarə Heyətinin sədri Rəhman Hacıyev oxşar təşəbbüslərin birmənalı olaraq təqdir ediləsi hal olduğunu deyib. 30 ilə yaxın müddətdə işğal altında qalan Azərbaycan ərazilərində təbiətə tutulan divan barədə xatırlatma verən İdarə Heyətinin sədri sözlərinə belə davam edib: “Xalqımıza möhtəşəm Zəfər hissləri yaşadan Müzəffər Ali Baş Komandanımız, Azərbaycan Respublikasının Prezidenti İlham Əliyev 44 günlük müharibənin getdiyi vaxtlardakı telemüraciətlərində müharibədə Azərbaycan tərəfinin düşmənə yanaşmasında mənəvi normaları pozmadığını dəfələrlə qeyd edib. Azad olunmuş ərazilərimizdə erməni tərəfinin insanlarımızdan əlavə, təbiətimizlə necə rəftarını isə dünya gördü. Onlar böyük bir ərazimizdə ekosid siyasəti həyata keçiriblər”.

Ekologiya və Təbii Sərvətlər Nazirliyi AZƏRTAC vasitəsilə ağacəkmə kampaniyasına yüksək fəallıqla qoşulan bütün tərəfdaşlara, dövlət və özəl qurumlara, media və ictimaiyyət nümayəndələrinə öz təşəkkürünü çatdırıb.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.