REGİONLAR


Bu günə qədər 3 minə yaxın vətəndaş mineral gübrələrin səyyar satış xidmətindən yararlanıb

Bakı, 24 noyabr, AZƏRTAC

“Aqroservis” ASC tərəfindən rayon mərkəzindən uzaq məsafədə yerləşən kəndlərdə payızlıq əkin mövsümü ilə əlaqədar olaraq fosforlu və kaliumlu gübrələrə olan tələbata əsasən ammofos, kükürdlü ammofos və nitroammofoska gübrələrinin səyyar satışı prosesi davam etdirilir. Əlavə olaraq digər təyinatlı gübrələrə tələbat olduğu təqdirdə, fermerlər həmin gübrələrlə də təmin edilir.

AZƏRTAC xəbər verir ki, bu günə qədər səyyar satışdan 600-ə yaxın kənd üzrə ümumilikdə 3 minə yaxın vətəndaş yararlanıb. Daxil olan müraciətlərə əsasən, hər gün 5-6 qrup olmaqla respublikanın müxtəlif kənd və qəsəbələrində paralel olaraq səyyar xidmət göstərilir. Səyyar satışla yanaşı, ASC-nin rayon bölmələri də mövsümlə əlaqədar olaraq şənbə günləri daxil olmaqla fermerlərin mineral gübrəyə olan tələbatının ödənilməsi üçün fəaliyyət göstərirlər. Bir çox hallarda satılan gübrələrin evlərə pulsuz çatdırılmasını təmin edirlər.

Fermerlər səyyar satış təşkil edən “Aqroservis” ASC-nin əməkdaşlarına yaxınlaşaraq yeni subsidiya qaydalarına əsasən heç bir əlavə sənəd təqdim etmədən, yalnız “Fermer kartı” və şəxsiyyət vəsiqəsi təqdim etməklə, güzəştli şərtlərlə mineral gübrə əldə edə bilirlər. Yeni qaydalara əsasən, gübrənin dəyərinin 70 faiz hissəsi fermerin “Fermer kartı”nda olan subsidiya məbləğindən, 30 faiz hissə isə fermerin şəxsi vəsaiti hesabına, pestisidlər üçün isə tam dəyəri “Fermer kartı”nda olan subsidiya məbləğindən ödənilir. Ödəniş pos-terminal və səyyar bank terminalları vasitəsilə yerindəcə, uzaq məsafə qət etmədən yerinə yetirilir.

Qeyd edək ki, səyyar satışın həyata keçirilməsində əsas məqsəd gübrələrin alışı zamanı vətəndaşların sərf etdikləri zaman, məsafə itkisinin və əlavə məsrəflərin qarşısının alınması, həmçinin vətəndaşlara cəmiyyətin əlçatanlığını, yaxınlığını təmin edərək vətəndaş məmnuniyyətinə nail olmaqdır.

Vətəndaşlar mineral gübrələrin səyyar satış xidmətinin yaşadıqları kənd və qəsəbələrdə təşkil edilməsi üçün Kənd Təsərrüfatı Nazirliyin 1652 Çağrı Mərkəzinə və (+99451) 229-32-07 nömrəsinə müraciət edə bilər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.