ELM VƏ TƏHSİL
Bu il AMEA-nın magistraturasına 67 nəfər qəbul olunub
Bakı, 14 sentyabr, AZƏRTAC
Sentyabrın 14-də Azərbaycan Milli Elmlər Akademiyasının (AMEA) Rəyasət Heyətində Bilik gününə həsr olunmuş toplantı keçirilib.
AZƏRTAC xəbər verir ki, görüşdə AMEA-nın prezidenti, akademik Akif Əlizadə akademiyada magistratura təhsilinin təşkilinin elm və təhsilin inteqrasiyası istiqamətində atılan uğurlu addımlardan biri olduğunu qeyd edib. Elm və təhsilin inteqrasiyasının ölkəmizin inkişafında mühüm rol oynadığını diqqətə çatdıran AMEA-nın rəhbəri biliklər cəmiyyətində ixtisaslı mütəxəssislərin və elmi kadrların hazırlanmasının ölkədə təhsilin və elmi tədqiqatların səviyyəsinin artırılmasına xidmət etdiyini vurğulayıb. AMEA-da magistratura təhsilinin əsasının qoyulması ilə bağlı kompleks tədbirlərdən danışan A.Əlizadə bu sahədə görülən işlərin ölkə daxilində və beynəlxalq əməkdaşlıq səviyyəsində həyata keçirildiyini qeyd edib. Akademik iki il öncə fəaliyyətə başlayan magistratura pilləsinin AMEA-nın elmi müəssisələrində təhsil alan gənclərin gələcək fəaliyyətlərinə müsbət təsir göstərdiyini bildirib.
Sonra AMEA-nın magistraturasına qəbulun nəticələri barədə Rəyasət Heyəti Aparatının Elm və Təhsil İdarəsinin rəisi, AMEA-nın müxbir üzvü Əminağa Sadıqov məlumat verib. 2017/2018-ci tədris ili üçün 17 instituta 12 ixtisas, 39 ixtisaslaşma üzrə 67 magistrantın daxil olduğunu deyən Ə.Sadıqov bu il AMEA-nın magistraturasına qəbul olunmaq üçün müsahibədə ümumilikdə 1742 bakalavrın iştirak etdiyini diqqətə çatdırıb. Gənclərin elmə marağının artdığını qeyd edən idarə rəisi bildirib ki, müsahibə zamanı bir plan yerinə ən çox sənəd verilən İdarəetmə Sistemləri İnstitutu, qəbul zamanı ən yüksək nəticə göstərən magistrant isə İnformasiya Texnologiyaları İnstitutu olub.
Daha sonra Akif Əlizadə AMEA-nın magistrantlarına tələbə biletləri, qiymət kitabçaları, eyni zamanda, internetdən və elektron dərs vəsaitlərindən sərbəst istifadə üçün planşet təqdim edib.
Tədbirdə Dilçilik İnstitutunun məzunu Aynur İmanova, Riyaziyyat və Mexanika İnstitutunun ikinci kurs magistrantı Yetər Fərhadova, İnformasiya Texnologiyaları İnstitutunun birinci kurs magistrantı Qalib Sarayev, Molekulyar Biologiya və Biotexnologiyalar İnstitutunun birinci kurs magistrantı Reyhan Məmmədova da çıxış ediblər.