MƏDƏNİYYƏT


Bu il “Azərbaycanfilm” kinostudiyası üçün məhsuldar olub

Bakı, 4 dekabr, AZƏRTAC

Bu il Cəfər Cabbarlı adına “Azərbaycanfilm” kinostudiyası üçün məhsuldar olub. Kinostudiya cari il ərzində 3 tammetrajlı və 1 qısametrajlı bədii film, 1 bədii televiziya filmi (5 hissəli), 1 serial, 9 sənədli film istehsal edib, 2 radio və televiziya layihəsi həyata keçirib.

Kinostudiyadan AZƏRTAC-a bildirilib ki, cari il ərzində Mədəniyyət Nazirliyinin sifarişi ilə Elçin Musaoğlunun “Məryəm”, (“Sinema Evi” şirkəti ilə birgə), Xalq artisti Vaqif Mustafayevin 44 günlük Vətən müharibəsinə həsr olunmuş “Həyat, deyəsən, gözəldir” (Fəryad II) – (“MuğanBank”ın dəstəyi ilə), Asif Rüstəmovun “Mərmər soyuğu” (“İctimai TV”, Bakı Media Mərkəzi və “Arizona Productions” ilə birgə) tammetrajlı bədii filmlərinin istehsalı həyata keçirilib. Hər üç ekran əsəri növbəti il ərzində tamaşaçılara təqdim ediləcək.

Bununla yanaşı, 44 günlük Vətən müharibəsində əsl qəhrəmanlıq dastanı yazmış ordumuzun müxtəlif qoşun növlərinin müharibədəki şanlı döyüş yolunu, şücaətini və zəfərimizi əks etdirən “Görünməyən qəhrəmanlar” (“İctimai TV” ilə birgə) adlı silsilə 5 sənədli filmi istehsal edilərək tamaşaçılara təqdim olunub. Bu silsiləyə daxil olan filmləri televiziyadan izləyə bilməyən tamaşaçılar “Azerbaijanfilm Studio”nun rəsmi yutub kanalından müvafiq pleylisti açaraq izləyə bilərlər. Bakı Media Mərkəzi ilə birgə “Biz” sənədli filmi istehsal edilib, il ərzində iki dəfə təqdimatı keçirilib. Film “İctimai TV”nin efirində yayımlanıb. Artıq bu ekran əsərini yutubda izləmək mümkündür.

Daha sonra 5 hissəli “Köşk” bədii televiziya filmini “İctimai TV”nin efirində tamaşaçılara təqdim edilib. Bununla yanaşı, Mədəniyyət Nazirliyinin sifarişi ilə dahi Azərbaycan mütəfəkkiri Nizami Gəncəvinin 880 illik yubileyinə həsr olunmuş “Xosrov və Şirin” (“İctimai TV” ilə birgə) 12 bölümdən ibarət bədii teleserial istehsal olunub. Qeyd edək ki, serial qısa zamanda “İctimai TV”nin efirində yayımlanmağa başlayacaq.

Bu il Mədəniyyət Nazirliyinin elan etdiyi “Böyük Qayıdış” qısametrajlı bədii, sənədli və animasiya film layihələri müsabiqəsində seçilmiş 2 sənədli film layihəsindən “Fulya” (“Dada Yapım” ilə birgə) filmi istehsal edilib, Türkiyə və Azərbaycan premyeraları keçirilib, həmçinin kinoteatrlarda təqdim olunub. Müsabiqənin ikinci qalibi “Müharibənin uşaqları” sənədli filminin isə istehsalı yekunlaşmaq üzrədir. Daha sonra “Quyu” qısametrajlı bədii filmi istehsal edilib və hazırda xarici distribusiyası həyata keçirilir.

İlin əvvəlindən etibarən Azərbaycan kinosuna həsr edilmiş “Bizim Kino” (“İctimai TV”nin media dəstəyi ilə) 24 hissəli kinojurnalı tamaşaçılara təqdim edilib və izləyə bilməyənlər üçün hazırda da yutub kanalında müvafiq pleylistdə yerləşdirilib. “Avto FM 107.7” ilə birgə yubilyar filmlərimizə nəzər salınaraq olduqca maraqlı “Kinostudiya” rubrikası hazırlanıb yayımlanb və qeyd edək ki, bu layihə də sosial media kinostudiyanın kanallarında müvafiq pleylistlərdə yerləşdirilib.

Bütün il boyu diqqət və marağını bizdən əsirgəməyən bütün tamaşaçılarımıza, kinosevərlərə dərin minnətdarlığımızı bildirir və bir-birindən maraqlı layihələrimizdən xəbərdar olmaq üçün növbəti ildə də bizi izləmədə qalın deyirik! Hər kəsə təşəkkürlər!

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.