İsmayıllı, 3 sentyabr, Rəşad Türkoğlu, AZƏRTAC

Zəngin pedaqoji ənənələri olan İsmayıllı təhsili pandemiya şəraitinə baxmayaraq, bu tədris ilində də böyük nailiyyətlər əldə edib. Rayon məktəbliləri beynəlxalq, respublika və zona yarışlarında çoxsaylı uğurlara imza ataraq müxtəlif diplom, medal və sertifikatlara layiq görülüblər. Respublika fənn olimpiadalarında final mərhələyə çıxan 4 şagird qalib adını qazanıb. Ümummilli lider Heydər Əliyevin anadan olmasının 98-ci ildönümünə həsr edilmiş “Ən yaxşı təqdimat” müsabiqəsində Təzəkənd tam orta məktəbinin şagirdi Respublika üzrə ikinci yeri tutub. Bundan başqa, “Sabahın alimləri”, “Bacarıqlı əllər”, “Dəmir yumruq” və neçə-neçə nüfuzlu müsabiqələrdə iştirak edən İsmayıllı məktəbliləri diplom və hədiyyələrlə mükafatlandırılıblar. Həmçinin tanınmış alim Lütfi Zadənin 100 illiyi münasibətilə keçirilən müsabiqənin, şəhidlərin əziz xatirəsinə həsr edilən zona yarışlarının birincisi olublar.

AZƏRTAC xəbər verir ki, koronavirus pandemiyasının yaratdığı çətinliklərə baxmayaraq, 2020/2021-ci tədris ilində İsmayıllı rayonunun orta ümumtəhsil məktəblərindən ali məktəblərə qəbul olmaq üçün sənəd verən məzunlardan 21-i 600-dən yuxarı bal toplayıb. Bütün bunlar rayon təhsilinin inkişafından xəbər verir.

Rayon üzrə ən yüksək nəticəni Mollaisaqlı kənd tam orta məktəbinin məzunu İlknur Mürsəlova göstərib. 4-cü qrup üzrə 671 bal toplayan İlknur gələcəyin peşəkar həkimlərindən olacağına əmindir: “Son 2 ildə pandemiya şəraiti nəticəsində məktəblərin bağlanması bizi bir çox çətinliklərlə üz-üzə qoydu. Bundan başqa, kənd yerində yaşadığımıza görə internet problemləri ilə də çox qarşılaşırdıq. Lakin müəllimlərimin, həmçinin valideynlərimin səyi nəticəsində bu nailiyyəti qazana bildim. 671 bal toplayaraq nəinki öz məktəbimin, həmçinin rayonumuzun adını yüksəklərə qaldırdım. Azərbaycan Tibb Universitetini seçmişəm. İstəyirəm ki, gələcəyin tanınmış, təcrübəli həkimlərindən biri olum”.

Qəbul imtahanlarında ən çox bal yığan məzunlardan biri də Diyallı kənd orta məktəbinin şagirdi Rövşən Yusifovdur. O, Bakı Ali Neft Məktəbində oxumaq istəyir. “Qarışma məqsəd qoymuşdum ki, yüksək nəticə əldə edəcəyəm. Baxmayaraq ki, ötən tədris ilində pandemiya ilə əlaqədar tədrisimiz onlayn keçirildi, yenə də həvəsdən düşmədim və istədiyim nəticəni əldə etdim. Rayon üzrə 2-ci yer tutaraq 668 bal topladım. İstəyirəm ki, təhsilimi Bakı Ali Neft Məktəbində davam etdirəm”, - deyə o əlavə edib.

600-dən yuxarı bal toplayan şagirdlər arasında şəhər 2 saylı orta məktəbin məzunu Ayxan Tağıyev də var. Deyir ki, bu göstərici ilə rayonda 3-cü yeri tutub: “Xaricdə təhsil almaq istəyirəm. Bakı Mühəndislik Universiteti və Cənubi Koreya universitetinin iki diplom proqramına müraciət etdim və qəbul prosesini uğurla başa vurdum. İnşallah ölkəmiz üçün faydalı və savadlı bir kadrı kimi yetişəcəyəm”.

Altı yüzdən çox bal toplayan rayon sakinlərinin 3-ü rayon mərkəzindən xeyli aralıda olan Qalacıq məktəbliləridir. Müsahibim Xumar Salehova deyir ki, oxumaq istəyən şagird üçün şəraitin önəmi yoxdur. “Pandemiya səbəbindən son 2 ildə dərslərə onlayn qoşulmalı olduq. Kəndlərdə də internet problemi var, amma buna baxmayaraq, valideynlərimiz, müəllimlərimiz və özümüz əziyyət çəkdik, bu əziyyətin nəticəsində yüksək bal topladıq. Hesab edirəm ki, bu çətinliklər oxumaq istəyən uşaqlara əngəl olmamalıdır. Biz nümunə kimi özümüzü göstərə bilərik. Kənddə yaşamağımıza baxmayaraq, şəhərdən olan uşaqlarla eyni nəticəni göstərmişik, hətta bəzilərindən daha yüksək nəticəmiz var”, - deyə Xumar Salehova vurğulayıb.

İsmayıllı rayon Təhsil Şöbəsinin müdiri, Əməkdar müəllim Rövşən Əliyev deyir ki, əgər bu günə kimi şagirdlər arasında yüksək nəticə şəhər məktəblərində əldə olunurdusa, artıq bu uğur ucqar kəndlərdə də özünü göstərir: “Kənd məktəblərinin təhsil səviyyəsi şəhər məktəblərindən heç də fərqlənmir. Biz onların eyni səviyyədə olmasına çalışırıq və artıq buna nail olmuşuq. Pandemiyaya baxmayaraq, təhsilimizi istər onlayn qaydada, istər hibrid formasında, istərsə də əyani şəkildə yüksək şəkildə yerinə yetirmişik. Bunun sayəsində respublika üzrə bütün müsabiqələrdə yüksək nəticələr göstərmişik. Qeyd edim ki, ümumi orta təhsil səviyyəsi üzrə 28 şagirdimiz, tam orta təhsil səviyyəsi üzrə isə 31 şagirdimiz fərqlənmə attestatı alıb. Eyni zamanda, 1 şagirdimiz gümüş medala layiq görülüb”.

Xatırladaq ki, 2020-2021-ci tədris ilində rayonda 76 ümumtəhsil məktəbi, o cümlədən 46 tam orta, 21 ümumi orta, 9 ibtidai məktəb, 10 məktəbəqədər və 2 məktəbdənkənar təhsil müəssisəsi fəaliyyət göstərib. 12354 şagirdin təlim-tərbiyəsi ilə 1500-dən artıq müəllim məşğul olub. 1-ci sinfi 1081 şagird, 11-ci sinfi 700 məzun bitirib. Ümumtəhsil məktəblərini bitirən 698 məzuna attestat verilib.