CƏMİYYƏT
Bu ilin altı ayında narkotiklərlə bağlı 2553 fakt aşkarlanıb
Bakı, 17 iyul, AZƏRTAC
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası 2019-cu ilin altı ayı ərzində ölkədə narkotik vasitələrin və psixotrop maddələrin qanunsuz dövriyyəsinə qarşı mübarizənin nəticələrinə dair məlumatı açıqlayıb.
Komissiyadan AZƏRTAC-a bildiriblər ki, ilin birinci yarısında narkotiklərlə mübarizə sahəsində hüquq-mühafizə orqanları tərəfindən 2553 fakt aşkar edilib. Onlardan 707-si satış, 1675-i saxlama, 141-i qanunsuz olaraq narkotik xassəli bitkiləri kultivasiya etmə, 30-u isə digər hallarla bağlı olub. Aşkarlanan faktlar üzrə ümumi çəkisi 1 ton 650 kiloqram 749,322 qram təşkil edən müxtəlif növ narkotik vasitələr və psixotrop maddələr, o cümlədən 25 min 701 çətənə kolu qanunsuz dövriyyədən çıxarılıb. Bundan əlavə, 330 kiloqram 374,986 qram prekursorlar, 12 kiloqram 714 qram güclü təsiredici xüsusiyyətə malik zəhərli maddə qanunsuz dövriyyədən götürülüb.
Müsadirə olunan narkotik vasitələrin və psixotrop maddələrin 510 kiloqram 846,029 qramını marixuana (30,9 faiz), 224 kiloqram 864,575 qramını tiryək (13,6 faiz), 763 kiloqram 160,068 qramını heroin (46,23 faiz), 14 kiloqram 71,106 qramını həşiş (0,8 faiz), 4 kiloqram 9,185 qramını kokain (0,2 faiz), 80 kiloqram 130,229 qramını psixotrop maddələr (4,8 faiz), 53 kiloqram 668,13 qramını digərləri (3,2 faiz) təşkil edib.
Həmçinin Daxili İşlər Nazirliyinin təşkilatçılığı, Ekologiya və Təbii Sərvətlər, Kənd Təsərrüfatı nazirlikləri, Dövlət Sərhəd Xidməti və digər aidiyyəti qurumların nümayəndələrinin iştirakı ilə 2273 hektar ərazi üzrə 73 ton 892 kiloqram (150 min 201 ədəd) narkotik tərkibli bitkilər yaşıl kütlə halında məhv edilib.
İlin birinci yarısında cinayət məsuliyyətinə 1687 nəfər cəlb edilib. Onlardan 5-i 16-18 yaşadək, 130-u 18-25, 253-ü 26-29 yaşlarında, 1299-u isə 30 yaşdan yuxarı olanlardır. Məsuliyyətə cəlb olunanlardan 160-ı fəhlə, 2-si maddi məsul şəxs, 1-i orta ixtisas tələbəsi, 412-si əvvəllər cinayət törətmiş, 5-i əvvəllər xüsusi qeydiyyatda olan, 1141-i işləməyən, 1636-sı kişilər, 38-i qadın, 56-sı isə xarici ölkə vətəndaşı olub. Əcnəbilərdən 40-ı İran, 5-i Gürcüstan, 4-ü Rusiya, 2-si Türkiyə, 2-si Ukrayna, 2-si Pakistan, 1-i Braziliya vətəndaşıdır. Xarici ölkə vətəndaşlarından ümumilikdə 585 kiloqram 840,908 qram narkotik vasitə götürülüb.
Səhiyyə Nazirliyi Respublika Narkoloji Mərkəzinin 2018-ci il 31 dekabr tarixinə olan məlumatına əsasən, mərkəzdə 31 min 432 nəfər qeydiyyatda olub. Onlardan 26 min 346 nəfəri dispanser, 5086 nəfəri profilaktik qeydiyyatda olanlardır. Həmin şəxslərdən 626 nəfəri qadın, 227-si toksikoman, 21 min 872-si (501 qadın) inyeksion narkotik istifadəçisidir.
Hesabat dövründə 2557 nəfər narkotik vasitələrin istifadəsinə görə müayinə olunub. Onlardan 1276 nəfərdə narkotikdən istifadə aşkarlanıb və həmin şəxslər müvafiq qeydiyyata götürülüb.
Səhiyyə Nazirliyi QİÇS-lə Mübarizə Mərkəzinin məlumatına əsasən, Azərbaycan vətəndaşları arasında ilin birinci yarısında İİV-ə yoluxma hallarının 9,9 faizi, ümumilikdə isə 1992-ci ildən bu il iyulun 1-dək yoluxma hallarının 42,2 faizi inyeksion narkotik istifadəsi nəticəsində baş verib. Ümumilikdə 1988-ci ildən İİV infeksiyası aşkarlanan 7762 nəfərdən 3222-si inyeksion narkotik istifadəçisi olub. Onların da 2556 nəfəri (79,3 faizi) dispanser qeydiyyatına götürülüb.
Ölkədə İİV-ə narkomanların yeni yoluxma hadisələrinin sayında azalma müşahidə edilir. İlin birinci yarısında İİV-ə yoluxmuş 343 nəfər Azərbaycan vətəndaşının 34 (9,9 faiz) nəfəri inyeksion narkotik istifadəçisi olub.