CƏMİYYƏT
Bu ilin doqquz ayında 2,2 tona yaxın müxtəlif növ narkotik vasitə müsadirə olunub
Bakı, 23 oktyabr, AZƏRTAC
Bu ilin doqquz ayında ölkədə narkotik vasitələrin qanunsuz dövriyyəsinə qarşı mübarizənin nəticələri Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının İşçi qrupunda ümumiləşdirilib.
Dövlət Komissiyasının İşçi qrupundan AZƏRTAC-a bildiriblər ki, doqquz ayda narkotiklərlə mübarizə sahəsində hüquq-mühafizə orqanları tərəfindən 2641 fakt aşkar edilib. Onlardan 834-ü narkotik vasitələri, psixotrop maddələri və ya onların prekursorlarını satış məqsədilə qanunsuz əldə etmə, saxlama, daşıma, göndərmə və ya satma, 1527-si satış məqsədi olmadan narkotik vasitələri, psixotrop maddələri və onların prekursorlarını qanunsuz olaraq əldə etmə və saxlama, 229-u qanunsuz olaraq narkotik xassəli bitkiləri kultivasiya etmə, 51-i isə digər hallarla bağlı olub. Aşkarlanmış faktlar üzrə qanunsuz dövriyyədən ümumi çəkisi 2 ton 179 kiloqram 111,716 qram müxtəlif növ narkotik vasitələr, o cümlədən 10 min 140 çətənə kolu müsadirə edilib.
Müsadirə olunan narkotik vasitələrin, psixotrop maddələrin və onların prekursorlarının 628 kiloqram 66,092 qramını marixuana (28,9 faiz), 316 kiloqram 395,602 qramını tiryək (14,5 faiz), 1 ton 72 kiloqram 475,986 qramını heroin (49,2 faiz), 56 kiloqram 526,795 qramını həşiş (2,6 faiz), 96 kiloqram 456,2 qramını digərləri (4,4 faiz), 4 kiloqram 345,299 qramını psixotrop maddələr (0,2 faiz), 4 kiloqram 845,732 qramını prekursorlar (0,2 faiz), o cümlədən 2 kiloqram 184,1 qramını güclü təsir edən maddə, 1 kiloqram 533,2 qramını zəhərli maddələr, 0,01 qramını Lizerqit (LSD) (0,7x0,7 ölçülü 140 karton lövhə), 397 flakon “Mydrax 100 faiz” və 1878 həb təşkil edib.
Həmçinin Daxili İşlər Nazirliyinin təşkilatçılığı, Ekologiya və Təbii Sərvətlər, Kənd Təsərrüfatı nazirliklərinin, Dövlət Sərhəd Xidmətinin və digər aidiyyəti qurumların iştirakı ilə 421 hektar 46 sot ərazidən 132 ton 165 kiloqram 418 qram (248 min 802 ədəd) narkotik tərkibli bitkilər yaşıl kütlə halında yığılaraq məhv edilib.
Bu dövrdə cinayət məsuliyyətinə 1841 nəfər cəlb olunub. Onlardan 48 nəfəri xarici ölkə vətəndaşları olublar. Həmin şəxslərdən ümumilikdə 100 kiloqramdan çox müxtəlif növ narkotik vasitələr götürülüb. Əcnəbilərdən 34-ü İran, 4-ü Rusiya, 5-i Gürcüstan, 2-si Türkiyə, 2-si Ukrayna, 1-i isə Türkmənistan vətəndaşı olub.
Səhiyyə Nazirliyi Respublika Narkoloji Mərkəzinin 2017-ci il dekabrın 31-dək olan məlumatına əsasən, Mərkəzdə 30 min 131 nəfər qeydiyyatda olub. Onlardan 25 min 139-u dispanser, 4992 nəfəri profilaktik qeydiyyatda olanlardır. Həmçinin 595 nəfəri qadın, 212 nəfəri toksikoman, 21 min 38-i (470 qadın) inyeksion narkotik istifadəçisidir. Ötən il 2115 nəfər yeni qeydiyyata götürülüb, 1432 nəfər isə qeydiyyatdan çıxarılıb.
Cari ilin üçüncü rübündə Daxili İşlər Nazirliyi tərəfindən Səhiyyə Nazirliyinin Respublika Narkoloji Mərkəzinə göndərilmiş şəxslərin sərxoşluq hallarının bütün növlərinin təyini məqsədilə aparılan tibbi müayinədən 22 min 986 nəfər keçib. Onlardan 2751-i narkotik vasitələrin istifadəsinə görə müayinə olunub, 1396 istifadəçi aşkarlanaraq qeydiyyata götürülüb.
Həmçinin hesabat dövründə 2971 nəfər stasionar müalicəyə qəbul olunub. Onlardan 748 nəfəri “Alkoqol qəbulu nəticəsində psixi və davranış pozuntuları” (F10), 2216-sı “Opioidlərin qəbulu nəticəsində psixi və davranış pozuntuları” (F11) diaqnozu ilə müalicəyə qəbul edilənlərdir. Eyni zamanda, digər müalicə proqramı üzrə fəaliyyət göstərən dörd məntəqədə proqram çərçivəsində 289 xəstə müalicə alır. Onlardan 130-u Respublika Narkoloji Mərkəzində, 70 nəfər QİÇS-lə Mübarizə Mərkəzində, 12 nəfəri Sumqayıt Şəhər Rayonlararası Narkoloji, 77 nəfəri isə Bakı Şəhər Narkoloji dispanserlərindədir.
Səhiyyə Nazirliyi QİÇS-lə Mübarizə Mərkəzinin məlumatına əsasən, cari ilin doqquz ayında Azərbaycanda İİV-ə yoluxması yeni aşkarlanan şəxslərin sayı 497 nəfər təşkil edib ki, onlardan 482-si (96,9 faiz) Azərbaycan vətəndaşı, 15-i (3,1 faiz) isə əcnəbilərdir.
Ümumilikdə, Azərbaycanda ilk dəfə İİV infeksiyasının aşkarlandığı 1987-ci il oktyabrın 1-dən 2018-ci ilədək Respublika QİÇS-lə Mübarizə Mərkəzində İİV infeksiyası təsdiq olunmuş 7249 nəfər qeydiyyata götürülüb. Onlardan 7014-ü Azərbaycan vətəndaşı, 235-i isə əcnəbidir. İİV-ə yoluxmuş insanların 5271-i kişi, 1978-ü qadındır.
İİV-ə yoluxması təsdiq olunmuş 7249 nəfərdən 3144-də İİV-ə yoluxma inyeksion narkotik istifadəsi nəticəsində baş verib. Onlardan 2262-si nəfər dispanser qeydiyyatındadır. 2018-ci il oktyabrın 1-dək antiretrovirus terapiyaya (ART) cəlb olunmuş İİV-li xəstələrin ümumi sayı 4757 nəfər təşkil edib. Onların da 1901 nəfəri inyeksion narkotik istifadəçisi (İNİ) olub. Cari ilin doqquz ayında isə ART-yə cəlb olunan 550 pasiyentdən 96 nəfərində inyeksion narkotik istifadəsi aşkarlanıb.