CƏMİYYƏT
Bu ilin ilk ayında sosial elektron xidmətlərə 1,123 milyona yaxın müraciət qeydə alınıb
Bakı, 9 fevral, AZƏRTAC
2018-ci ilin yanvarında Əmək və Əhalinin Sosial Müdafiəsi Nazirliyinin elektron xidmətlərinə əvvəlki ayla, yəni 2017-ci ilin dekabr ayı ilə müqayisədə 82,8 faiz çox olmaqla, 1 milyon 123 minə yaxın müraciət qeydə alınıb.
Nazirliyin fəaliyyət sahələri üzrə elektron xidmətlər şəbəkəsi vətəndaşlara həmin sahələr üzrə dövlət xidmətlərindən məmur-vətəndaş təması olmadan, şəffaf şəkildə istifadə etməyə geniş imkanlar verib. Həmin elektron xidmətlərə əhalinin böyük maraq göstərməsi də bunun nəticəsidir və onlardan istifadə statistikası aybaay artır.
Nazirliyin ictimaiyyətlə əlaqələr şöbəsindən AZƏRTAC-a verilən məlumata görə, müraciətlərin sayında ən çox artım “Məcburi dövlət sosial sığortası üzrə hesabatların təqdim edilməsi” elektron xidməti üzrə olub. Keçən il aprelin 1-dən etibarən hesablanmış və ödənilmiş məcburi dövlət sosial sığorta haqları və fərdi uçot məlumatlarına dair yeni vahid rüblük hesabat alt sisteminin tətbiqi ilə əlaqədar istifadəyə verilən, sığortaedənlər üçün hesabatların təqdim olunması prosesinin sadələşdirilməsinə və hesabatların sayının azaldılmasına imkan verən həmin elektron xidmətə bu ilin ilk ayında ötən ilin son ayı ilə müqayisədə 16,5 dəfə çox, yəni 394,7 min dəfə müraciət olunub. Həmçinin həmin ay əvvəlki ayla müqayisədə “Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi” elektron xidmətindən 37,1 faiz çox olmaqla 310,2 min dəfə, “Sığortaolunanlara məlumatların verilməsi” elektron xidmətindən 38,9 faiz çox olmaqla 32,4 min dəfə, “Əmək müqaviləsi bildirişləri barədə məlumatların işçilər tərəfindən əldə edilməsi” elektron xidmətindən 18,9 faiz çox olmaqla 29,5 min dəfə istifadə olunub.
Əmək və Əhalinin Sosial Müdafiəsi Nazirliyinin “Pensiya kalkulyatoru”, “Sığortaedənin uçot nömrəsinin öyrənilməsi”, “Məcburi dövlət sosial sığorta vəsaitlərinin onlayn ödənilməsi”, “Sığortaolunanın onlayn uçota alınması”, “İş yerinə dair arayış”, “Pensiyaçıya məlumatların verilməsi”, “Tibbi-Sosial Ekspert Komissiyaları tərəfindən keçirilmiş müayinə barədə məlumatın verilməsi”, “Tibbi-Sosial Ekspert Komissiyasında sonuncu müayinəyə dair məlumatın verilməsi”, “Ünvanlı sosial yardımla bağlı müraciətin edilməsi”, “Uşağın üç yaşı tamam olanadək ona qulluq etməyə görə müavinətlə bağlı haqq-hesab cədvəlinin təqdim edilməsi” və digər elektron xidmətlərinə də vətəndaşlar tez-tez müraciət edirlər.