Bakı, 13 noyabr, AZƏRTAC

Azərbaycan Respublikasının möhtəşəm qələbəsi şanlı ordumuzun sentyabrın 27-dən başladığı əks-hücumun, düşməni sülhə məcburetmə əməliyyatının məntiqi sonluğudur. Qırx dörd gün davam edən bu zəfər yürüşünün, Qarabağda itirilmiş torpaqlarımızın düşmən tapdağından sürətlə azad edilməsinin bünövrəsi ulu öndər Heydər Əliyevin hakimiyyətə qayıdışından sonra qoyulub. O dövrdə bütün istiqamətlərdə, o cümlədən ordu quruculuğu sahəsində hər şeyi yenidən başlamaq, əvvəlki iqtidarların daxili və xarici siyasətdə buraxdıqları səhvləri aradan qaldırmaq, özü də bütün bunları müharibə şəraitində gerçəkləşdirmək lazım gəlmişdi.

Ümummilli Liderimizin ali hakimiyyətə qayıdışı ilə ölkədə xaos, vətəndaş müharibəsi təhlükəsi aradan qaldırıldı, güclü dövlətçilik strukturları yaradıldı, iqtisadiyyatımızın dirçəldilməsi üçün zəruri islahatlar həyata keçirildi. Bunların zəminində hərbi sahənin inkişafına xüsusi diqqət yetirildi, möhkəm nizam-intizama malik ordu quruculuğu işlərinə təkan verildi. Azərbaycanın beynəlxalq miqyasda tanınması üçün ard-arda xarici ölkələrə səfərlər edilməsi, qonşu dövlətlərlə balanslaşdırılmış siyasət yürüdülməsi, dünyanın aparıcı dövlətlərinin nüfuzlu şirkətləri ilə “Əsrin müqviləsi”nin bağlanması nəticəsində ölkəmizin nüfuzunun artmasının təməli qoyuldu. Ermənistan-Azərbaycan Dağlıq Qarabağ münaqişəsinin dinc yolla həll edilməsi, Azərbaycanın ərazi bütövlüyünün beynəlxalq birlik tərəfindən qəbul edilən sərhədlər daxilində bərpa edilməsi üçün gərgin diplomatik mübarizə başlandı.

Bu fikirləri AZƏRTAC-a açıqlamasında tarix elmləri doktoru, professor Qabil Əliyev bildirib. Professor vurğulayıb ki, Prezident İlham Əliyev 2003-cü ildən başlayaraq dövlət strukturlarının daha effektli işləməsi, iqtisadiyyatın bütün sahələrinin, xüsusən qeyri-neft sektorunun inkişafı, Silahlı Qüvvələrin ən müasir silah və hərbi texnika ilə təchizi, informasiya-kommunikasiya sahələrində çox uğurlu addımlar atdı. Dövlətimizin başçısının 17 il ərzində bu və digər sahələrdə dərindən ölçülüb-biçilən, məqsədyönlü siyasəti sayəsində bugünkü möhtəşəm qələbəyə gəlib çatmışıq.

“Müzəffər Ali Baş Komandanımız böyük qələbə müjdəsini – xalqımızın 30 ilə yaxın səbirsizliklə gözlədiyi Şuşanın azad edilməsi xəbərini Şəhidlər xiyabanından bəyan etdi. Bu, hər iki Qarabağ müharibəsində şəhid olan hərbçilərimizə böyük hörmət və ehtiramın ifadəsi, torpaqlarımızın azadlığı uğrunda axıdılan qanların, verilən canların, Azərbaycan əsgərinin misilsiz igidliyinin yüksək qiymətləndirilməsi idi. Qarabağın müdafiəsi uğrunda döyüşlərdə həlak olanların qisasının alınması, canlarını fəda etdikləri torpaqlarımızın azad edilməsi müjdəsi idi.

Azərbaycan Prezidenti daxili və xarici siyasət sayəsində müdrik, uzaqgörən addımları ilə həm döyüş cəbhəsində, həm siyasi-diplomatik meydanda, həm informasiya mübarizəsində, həm psixoloji savaşda, həm də kəşfiyyat və təhlükəsizlik sahəsində çox böyük uğurlar qazanmağımızı təmin edib”, - deyə Q.Əliyev bildirib.

Professor qeyd edib ki, Prezident İlham Əliyevin dünyanın aparıcı informasiya agentliklərinə, televiziya kanallarına çoxsaylı müsahibələri Qarabağ müharibəsi haqqında həqiqətlərin dünya ictimaiyyətinə çatdırılması istiqamətində, informasiya müharibəsində ölkəmizə çox böyük uğurlar qazandırıb. Onun hər bir suala dəqiq, məntiqli, yoxlanıla bilən və faktlara söykənən cavabları ermənilərin və ermənipərəst qüvvələrin Azərbaycan haqqında yaydığı qərəzli, saxta məlumatları təkzib etməklə yanaşı, erməni yalanlarını yayanları da yerinə oturdub. Onun bütün addımlarımızın beynəlxalq hüququn norma və prinsipləri əsasında atılmasını, BMT Təhlükəsizlik Şurasının məlum qətnamələrini icra etmək istiqamətində mübarizə aparılmasını bəyan etməsi öz səmərəsini verib.

Azərbaycan Ordusu 44 gün böyük qəhrəmanlıq nümunəsi göstərdi. Ordumuzun bu parlaq qələbəsi noyabrın 9-da Azərbaycan, Ermənistan və Rusiya rəhbərlərinin imzaladıqları üçtərəfli bəyannamə ilə daha da möhkəmləndirilib. Azərbaycan Prezidentinin polad iradəsi, qətiyyətli mövqeyi sayəsində qan tökülmədən, əlavə resurslardan istifadə etmədən, yerdə qalan torpaqlarımızın da çox qısa müddət ərzində Azərbaycana qaytarılması məsələsi həll edilib. Beləliklə, Azərbaycan Ermənistanın XX əsrin 90-cı illərinin başlanğıcında havadarlarının hərtərəfli yardımları ilə işğal etdiyi torpaqlarımıza nəzarəti tam şəkildə bərpa etməyə nail olub.

Bu möhtəşəm qələbə çox böyük bir uğurdur. Azərbaycan Prezidenti İlham Əliyevin böyük şəxsi qələbəsidir. Müharibəni nə zaman başlamaq, nə zaman, hansı şərtlərlə dayandırmaq kimi taleyüklü qərar vermək, onun məsuliyyətini öz üzərinə götürmək çox güclü insani xarakterinin, vəziyyəti dəqiq təhlil etmək və düzgün nəticələr çıxarmaq qabiliyyətinin bariz göstəricisidir. Bu möhtəşəm qələbə Azərbaycanın beynəlxalq nüfuzunu gücləndirməklə yanaşı, onun regional lider kimi mövqeyini daha da möhkəmləndirəcək.