REGİONLAR


“Büdcə uçotu və hesabat” adlı təlim başa çatıb

Naxçıvan, 28 yanvar, AZƏRTAC

Naxçıvan Muxtar Respublikası Maliyyə Nazirliyi yanında Maliyyə Tədris Mərkəzində keçirilən “Büdcə uçotu və hesabat” adlı ikigünlük təlimə yekun vurulub.

Muxtar respublikanın Maliyyə Nazirliyinin mətbuat xidmətindən AZƏRTAC-ın Naxçıvan bürosuna bildirilib ki, təlimə Naxçıvan Muxtar Respublikasının Təhsil, Səhiyyə nazirlikləri və Dövlət Vergi Xidmətinin maliyyə və mühasibat uçotu sahəsində çalışan 12 əməkdaşı cəlb olunub.

Tədbirin ilk günündə mərkəzin direktoru Mehriban İmanova çıxış edərək iştirakçılara peşəkar mühasib sertifikatının verilməsi qaydaları haqqında məlumat verib, təlimin məqsədini və zəruriliyini diqqətə çatdırıb.

Sonra təlimçi-ekspert qismində Mehriban İmanovanın “Əməliyyatların maliyyə bərabərliyi qeydiyyatı” mövzusunda elektron materiallarla müşayiət olunan çıxışı dinlənilib. Mühasibat uçotunun mahiyyəti və funksiyaları, baş mühasibin vəzifələri, yeni hesablar planının və mühasibat hesablarının quruluşu, müxtəlif təsərrüfat əməliyyatlarının maliyyə bərabərliyi düsturuna təsiri, mühasibat uçotunda ikitərəfli yazılışın üsulu haqqında iştirakçılara slaydlar vasitəsilə ətraflı məlumat verilib.

Təlimin ikinci günündə təlimçi-ekspertin “Maliyyə hesabatı formalarının hazırlanması metodu” mövzusu ilə bağlı çıxış olub. Mövzuya müvafiq olaraq müəssisələrdə aparılmış əməliyyatların mühasibat uçotunda əks etdirilməsi, memorial orderlərin yazılması, dövriyyə kitablarının işlənilməsi və maliyyə hesabatlarının beynəlxalq mühasibat uçotu standartları əsasında hazırlanması qaydaları izah edilib.

Sonda iştirakçıların peşəkarlıq səviyyəsinin qiymətləndirilməsi üçün test imtahanı keçirilib, müvəffəqiyyət əldə edən iştirakçılara Maliyyə Tədris Mərkəzinin sertifikatları və təlimlə bağlı mərkəz tərəfindən hazırlanan bukletlər təqdim olunub.

Qeyd edək ki, təlimin əsas məqsədi mühasibatlıq sahəsində çalışan işçilərin peşə hazırlığının təkmilləşdirilməsi və biliklərinin qiymətləndirilməsindən ibarətdir.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.