AZƏRTAC Britaniyanın “Faynənşl tayms” qəzetinə istinadla xəbər verir ki, bazar ertəsi ABŞ Prezidenti Corc Buş 70 min Amerika hərbi qulluqçusunun Avropa və Asiyadan çıxarılacağını elan etməlidir. Bu, İkinci Dünya müharibəsindən sonra ABŞ-ın xaricdəki hərbi qruplaşmasının strukturunda ən böyük dəyişiklikdir.

Qəzetin mənbələrinin məlumatına görə, dəyişikliklər, əsasən, Avropadakı qruplaşma ilə bağlıdır. 50 minədək hərbi qulluqçu ailələri ilə birlikdə Almaniyadan evə qayıdacaqdır. Buna baxmayaraq, AFR Amerikanın bütün dünyada ən böyük “baza”sı olaraq qalacaqdır.

Pentaqonun rəhbərləri izah etməyə çalışırlar ki, ordunun bir hissəsinin Almaniya ərazisindən çıxarılması haqqında qərar almanların İraq müharibəsində mövqelərinə görə onları cəzalandırmaq cəhdi deyildir. Hərbçilər bildirirlər ki, Corc Buş ölkənin Avropadakı qruplaşmasının say tərkibinin azaldılmasına prezidentliyinin ilk günlərindən tərəfdardır.

Dəyişikliklər Cənubi Koreyaya da aid ediləcək və oradan 3.500 Amerika hərbi qulluqçusu çıxarılacaqdır. Artıq məlumdur ki, onlar İraqa gedəcəklər.

ABŞ-ın Avropadakı ordusunun komandanlığı da dəyişikliklərdən kənarda qalmayacaqdır. İkinci Dünya müharibəsindən bəri Londonda yerləşən qərargah indi İtaliyanın Neapol şəhərinə köçürüləcəkdir.