İDMAN


“Çendu-2021” universiadası ikinci dəfə təxirə salınıb

Pekin, 6 may, AZƏRTAC

Çinin Çendu şəhərində 2021-ci ildə keçirilməli olan, sonradan 2022-ci ilə təxirə salınan tələbələrin 31-ci Yay Universiadasının vaxtı ikinci dəfə dəyişdirilib.

AZƏRTAC xəbər verir ki, Beynəlxalq Universitet İdmanı Federasiyası (FISU) 31-ci Yay Universiadasının 2023-cü ildə keçirilməsinə qərar verib. Federasiyanın icraçı prezidenti Leonz Eder məsələyə dair açıqlamasında qərarın qəbul edilməsinin asan olmadığını, amma bunun atletlərin rifahı baxımından doğru addım olduğunu vurğulayıb. Ekspertlər FISU-nun açıqlamasında konkret səbəb göstərilməsə də, son vaxtlar Çində epidemik vəziyyətin ağırlaşmasının universiadanın təxirə salınmasına əsas yaratdığını güman edirlər.

“Çendu-2021” Universiadası ilə yanaşı, Çinin Hancou şəhərində cari ilin sentyabrında keçirilməsi planlaşdırılan 19-cu Asiya Oyunları da təxirə salınıb. Asiya Olimpiya Şurasının icraiyyə komitəsi müvafiq qərarı Çin Olimpiya Komitəsi və “Hancou-2021”in təşkilat komitəsi ilə məsləhətləşmələrdən sonra qəbul edib. 19-cu Asiya Oyunlarının yeni vaxtı yaxın gələcəkdə müəyyən ediləcək.

Qeyd edək ki, cədvəl üzrə 2021-ci ildə keçirilməli olan 31-ci Yay Universiadasının vaxtı “Tokio-2020”nin də ötən ilə təxirə salınması ilə əlaqədar 2022-ci ilin iyun ayına keçirilmişdi. Cədvəl üzrə 2023-cü ilin avqustunda Rusiyanın Yekaterinburq şəhərində keçirilməli olan 32-ci Yay Universiadası isə FISU-nun aprel ayında qəbul etdiyi qərarla təxirə salınıb. Federasiya Rusiya və Belarus idmançılarının təşkilatın himayəsi altında keçirilən yarışlarda iştirakını da dayandırıb. 2025-ci ildəki Yay Universiadası isə Almaniyanın Reyn-Rur bölgəsində təşkil olunacaq.

Şahin Cəfərov

AZƏRTAC-ın xüsusi müxbiri

Pekin

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.