SİYASƏT


Çətin dağ relyefinə malik olan Kəlbəcərin bir güllə atmadan, şəhid vermədən azad edilməsi çox böyük uğurdur

Bakı, 25 noyabr, AZƏRTAC

Sentyabrın 27-dən başlayaraq Azərbaycan Ordusu tarix yazır. Müzəffər Ali Baş Komandanın rəhbərliyi ilə Azərbaycan Ordusu bir-birinin ardınca ərazilərimizi işğaldan azad etdi. Hər birimiz Prezident İlham Əliyevin işğaldan azad olunan ərazilərimizin, yaşayış məntəqələrimizin adlarını elan etməsini səbirsizliklə gözləyirdik. Dövlət başçısının xalqa hər müraciəti həm bizim üçün, həm də dünya ictimaiyyəti üçün çox maraqlı idi. Azərbaycan xalqı qələbə əhval-ruhiyyəsindədir. Hamımız sevinc içindəyik.

Bu fikirləri AZƏRTAC-a açıqlamasında Milli Məclisin Kəlbəcərdən olan deputatı Aqil Məmmədov bildirib.

Deputat deyib ki, 44 gün davam edən Vətən müharibəsinin gedişində artıq Ermənistan anladı ki, güclü və rəşadətli Azərbaycan Ordusunun qarşısında duruş gətirmək qabiliyyətində deyil. Azərbaycan Prezidenti hər dəfə çıxışında silahı yerə qoyub, təslim olmağı təklif etsə də, qarşı tərəf bununla razılaşmırdı. Amma Müzəffər Ali Baş Komandan və onun rəhbərliyi altında Vətənin azadlığı və ərazi bütövlüyü uğrunda döyüşən əsgərlərimiz, zabitlərimiz düşməni diz çökməyə məcbur etdilər. Noyabrın 10-da Azərbaycan, Rusiya və Ermənistan rəhbərlərinin iştirakı ilə üçtərəfli Bəyanat imzalandı və Ermənistan təslim oldu.

A.Məmmədov qeyd edib ki, Azərbaycan Prezidenti İlham Əliyevin dediyi kimi, müharibə bir daha göstərdi kim kimdir. Ermənistan məğlub edilmiş, Azərbaycan isə zəfər çalmış ölkədir. Azərbaycan 30 illik təcavüzə və işğala son qoyaraq Vətən müharibəsi ilə öz sözünü dedi və qalib dövlət və xalq olaraq dünyada qəbul edildi. “Azərbaycan Ordusu həm düşmənə, həm də dünya dövlətlərinə sübut etdi ki, dünyada ən güclü və müasir ordular sırasındadır. Çünki bizim ordumuz müasir texnologiya və müasir silahlarla, peşəkar kadrlarla təmin olunub.

Birgə Bəyanatın əhəmiyyətindən danışan deputat qeyd edib ki, Azərbaycan Ordusu və Azərbaycan xalqı hərb tarixində öz sözünü deyərək qələbəsinə nail oldu. İkinci tərəfdən, Ağdam, Kəlbəcər və Laçın rayonları müharibə aparılmadan və qan tökülmədən bizə qaytarıldı. Noyabrın 20-də Ağdamın, noyabrın 25-də isə çətin relyefi olan Kəlbəcərin işğaldan azad edilməsi zəfərimizin davamıdır. Həmin ərazilərin işğaldan azad edilməsini məhz Ali Baş Komandanın öz dilindən eşitmək qürur verir və bizi gələcəyə ruhlandırır. İşğal altında olan Laçın rayonu da tezliklə öz azadlığına qovuşacaq və doğma sakinlərinə qucaq açacaq”.

Aqil Məmmədov bir kəlbəcərli kimi həddindən çox sevindiyini dilə gətirib: “Kəlbəcər Azərbaycanın ərazisinə görə ən böyük və ən yüksək dağ rayonudur. Relyefi çox çətin olan bu ərazinin çox hissəsi meşəlikdir. Belə bir ərazinin güllə atmadan, şəhid vermədən azad olunması çox böyük uğurdur. Sonrakı mərhələdə ərazinin minalardan təmizlənməsi, təhlükəsizlik tədbirlərinin görülməsi işləri aparılacaq. Bütün bu işlər başa çatdırıldıqdan sonra aidiyyəti qurumlar Prezident İlham Əliyevin tapşırığı əsasında müvafiq infrastruktur işlərini yerinə yetirəcəklər. Müzəffər Ali Baş Komandan İlham Əliyev və birinci xanım Mehriban Əliyeva Cəbrayıl, Füzuli və Ağdam rayonlarına səfərləri zamanı müəyyən işlərin əsası qoyuldu. Artıq Füzuli-Şuşa yolunun çəkilişinə başlanılıb. Eyni zamanda, Bərdə-Ağdam dəmir yolunun çəkilməsi ilə bağlı müvafiq tapşırıqlar verilib. Bu, artıq azad edilmiş rayonlarımızda infrastruktur işlərinin başlanması deməkdir.

Əminik ki, işğaldan azad edilmiş bütün rayonlarımızda tikinti-abadlıq işləri yüksək səviyyədə davam etdiriləcək, Azərbaycanın hər bir guşəsi abad olacaqdır. 30 il həsrətində olduğumuz yaşayış məntəqələrimizdə həyat yenidən canlanacaq, insanlar firavan yaşayacaqlar”.

A.Məmmədov təəssüfləndiyini bildirərək deyib ki, Ermənistanın uzun müddət işğal altında saxladığı torpaqlarımızda törətdiyi vandalizm aktları bizə aid olan tarixi və dini abidələrin məhv edilməsinə gətirib çıxarıb. Düşmən ölkəmizə vurduğu milyardlarla zərərə görə beynəlxalq qanun qarşısında cavab verməli, təzminat ödəməlidir. Hesab edirəm ki, vaxtında, zamanında beynəlxalq məhkəmələr vasitəsilə biz həmin təzminatı onlara ödədəcəyik. Tariximizi məhv etmək istəyən düşmənə güzəştə getmək olmaz. Onlar hərb meydanında cəzalarını aldıqları kimi, dağıtdıqları, məhv elədiklərinə görə cavab verməli olacaqlar.

“Bizə bu gözəl günləri, böyük Qələbənin sevincini yaşadan Prezident, Müzəffər Ali Baş Komandan İlham Əliyevdir. Məhz dövlət başçısının müdrik və uzaqgörən siyasətinin, qətiyyətinin sayəsində Azərbaycan öz ərazi bütövlüyünü təmin etdi. Azərbaycan xalqı dəmir yumruq kimi birləşərək öz tarixinin şanlı səhifəsini yazdı”, - deyə deputat fikirlərini yekunlaşdırıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.