SİYASƏT
Çexiya parlamentinin binasında ölkələrimizin qarşılıqlı münasibətlərinə həsr olunan seminar keçirilib
Bakı, 14 mart, AZƏRTAC
Azərbaycan Respublikasının Çexiyadakı səfirliyinin dəstəyi ilə Avropa-Azərbaycan Ticarət Palatası tərəfindən Çexiya parlamentinin binasında “Azərbaycan və Çex Respublikası: qarşılıqlı münasibətlər hazırda və gələcəkdə” adlı seminar keçirilib. Tədbir Çex Respublikası Deputatlar Palatasının üzvü, “ANO 2011” hərəkatının sədrinin birinci müavini Yaroslav Faltinekin himayəsi altında təşkil olunub.
Səfirlikdən AZƏRTAC-a bildiriblər ki, seminarda “Azərbaycan və Çexiyanın enerji təhlükəsizliyi”, “Çexiya və Azərbaycan arasında ticarət sahəsində əməkdaşlıq”, “Azərbaycanda siyasi vəziyyət”, “Çex-Azərbaycan münasibətlərinin gələcəyi” və digər mövzularda müzakirələr aparılıb.
Tədbirdə Azərbaycanın multikulturalizm ənənələri, dinlər və mədəniyyətlərarası dialoqun təşviqinə verdiyi töhfələr, ölkəmizin təşəbbüsü ilə 2008-ci ildə mədəniyyətlər və sivilizasiyalar arasında səmərəli və effektiv dialoqun qurulması məqsədilə irəli sürülmüş “Bakı prosesi” barədə ətraflı məlumat verilib, Azərbaycanın belə bir qlobal hərəkatın təşəbbüskarı kimi çıxış etməsinin əsasında ərazisində tarixən fərqli dini mənsubiyyəti olan icmaların, milli-etnik qrupların və zəngin mədəni müxtəlifliyin olmasının dayandığı vurğulanıb.
Seminarı açan Azərbaycanın Çexiyadakı səfiri Fərid Şəfiyev ikitərəfli əlaqələrin keçmişi və gələcək potensialından bəhs edib, habelə qarşılıqlı münasibətləri şərtləndirən amillərə toxunub. O, həmçinin Ermənistanın Azərbaycana qarşı hərbi təcavüzü nəticəsində bir milyondan çox qaçqın və məcburi köçkünün etnik təmizləməyə məruz qaldığını, Ermənistanın dünya birliyinin rəyinə və BMT Təhlükəsizlik Şurasının məsələ ilə bağlı qəbul etdiyi 4 qətnaməyə məhəl qoymadığını diqqətə çatdırıb.
“Ekspo-2025” Ümumdünya Sərgisinə Bakı şəhərinin namizədliyi haqqında məlumat verən səfir F.Şəfiyev Cənubi Qafqaz iqtisadiyyatının 75 faizinin Azərbaycanın payına düşdüyünü, “Moravia Steel” və digər çex şirkətlərinin ölkəmizdə fəaliyyət göstərdiyini, hazırda Azərbaycanın “Şahdəniz” qazının Qərbə nəqlini nəzərdə tutan TANAP və Çin ilə Avropanı əlaqələndirən nəqliyyat dəhlizi layihələrinin həyata keçirilməsi istiqamətində çalışdığını bildirib.
Çex Respublikası parlamentinin üzvü, “ANO 2011” hərəkatının sədrinin birinci müavini Yaroslav Faltinek çıxışında diplomatik əlaqələrin qurulmasının 25 illiyi tamam olan ölkələrimiz arasında paralellər aparıb, istər Azərbaycan, istərsə də Çexoslovakiyanın müstəqilliklərini 1918-ci ildə bir neçə ay fərqlə əldə etdiklərini, Çexoslovakiyadan fərqli olaraq cəmi 2 il ömür sürən respublikamızın müsəlman Şərqində ilk demokratik dövlət olduğunu vurğulayıb. Bildirib ki, hər iki ölkə qədim tolerantlıq ənənələrinə sahibdir və 1991-ci ildə yenidən müstəqilliyini bərpa edən Azərbaycanda xristian və yəhudi icmalarının azad fəaliyyətinə şərait yaradılır. İkitərəfli iqtisadi münasibətlərə toxunan Y.Faltinek Çexiyada Azərbaycan, Azərbaycanda isə Çexiya kapitalının təmsil olunduğunu qeyd edib, eləcə də Çexiyanın ölkəmizə qida sahəsində texnologiyalar təqdim etməyə hazır olduğunu deyib.
Azərbaycan-Avropa Ticarət Palatasının rəhbəri David Snaşel Azərbaycan-Çexiya biznes əlaqələrinin mövcud vəziyyəti və perspektivləri barədə söz açıb, ölkələrimiz arasındakı iqtisadi və biznes əlaqələrinin yaxşı nümunəsi kimi Çexiyanın “Tatra” şirkətinin Gəncə Avtomobil Zavodu ilə əməkdaşlığını, habelə Çexiyanın bir sıra şirkətlərinin Azərbaycanda infrastruktur və logistika layihələrində uğurla iştirak etdiyini xatırladıb.
Daha sonra Karl Universitetinin Xəzər və Azərbaycan üzrə Araşdırmalar Mərkəzinin rəhbəri, professor Eduard Qombar və “Azərbaijan Student Network” təşkilatının Praqa ofisinin direktoru Eldar Vəliyev çıxış edərək, Azərbaycanın zəngin tarixi və mədəniyyəti haqqında ətraflı məlumat veriblər.
Tədbirin sonunda seminar iştirakçılarını ölkəmiz barədə maraqlandıran suallar cavablandırılıb.