CƏMİYYƏT
Çinin Azərbaycandakı səfiri Quo Min: Soyuq gecə yarısında şəfəq yaxınlaşır və sübh işıldayır
Bakı, 24 fevral, AZƏRTAC
Çin Xalq Respublikasının Azərbaycandakı fövqəladə və səlahiyyətli səfiri xanım Quo Min “Soyuq gecə yarısında şəfəq yaxınlaşır və sübh işıldayır” adlı məqalə hazırlayıb. AZƏRTAC məqaləni təqdim edir.
2020-ci ilin əvvəllərində, qəfildən Çin xalqının xoşbəxt Bahar Şənliyinə qalın bir kölgə gətirən yeni koronavirus epidemiya vəziyyəti Çin torpağında yayılaraq ölkəni viran qoydu. Virus təhlükəsi, epidemiyanın yayılma intensivliyi, əhatə dairəsinin geniş olması və bütün cəmiyyətin üzləşdiyi çağırışlar və gərginliklərin misli görünməmişdi. ÇXR-in Sədri Si Cinpinin şəxsi rəhbərliyi və göstərişi altında, mərkəzi hökumət ölkənin bütün qaynaqlarını cəlb edərək tez bir zamanda 32 dövlət qurumundan ibarət birgə müdafiə və nəzarət mexanizmi yaratdı. 1.4 milyardlıq Çin xalqı dayanıqlı şəkildə bir araya gələrək, epidemiyanın qarşısının alınması və nəzarəti üçün mübarizəyə başladı.
"Xalqın həyatı hər şeydən üstündür" prinsipinə əsaslanaraq, Çin hökuməti dərhal ən əhatəli, ən sərt və ən diqqətli bir şəkildə epidemiyanın qarşısının alınması və nəzarət üçün tədbirlər gördü. Xəstələri xilas etmək və epidemiyanın yayılmasına mane olmaq üçün səylərini əsirgəmədi. Epidemiyanın “ən güclü” təsir etdiyi Hubei əyalətinə, ölkənin 19 əyalətindən Hubei əyalətinin 16 şəhəri üçün məqsədyönlü yardımın göstərilməsi mexanizmi quruldu. Ölkənin bütün regionlarından və Çinin Xalq Azadlıq Ordusundan Uxan şəhərinə 41600 tibbi işçidən ibarət 330-dan çox tibbi qrup göndərilib. 7000-dən çox inşaat işçisi gecə-gündüz çalışdı və 10 gün ərzində 2600 çarpayıdan çox iki yeni təcili yardım üçün Huashenshan və Lieshenshan xəstəxanalarını tamamladı. Ən qısa müddətdə, Hubeidə, ümumilikdə, tutumu 20 min yataqdan çox olan 15 müvəqqəti xəstəxana tam olaraq açıldı, bu da xəstələrin tibbi yardım istəklərini asanlaşdırdı.
Yanvarın 23-dən - "Şəhərin bağlanmasından" bəri Uxanda mərkəzi Çinin 10 milyondan çox əhalisi olan bu əhəmiyyətli şəhəri üçün "fasilə" düyməsi basıldı. Bütün sakinlər şüurlu şəkildə özlərini evdə karantinə alaraq, hökumətin epidemiya əleyhinə tədbirlərinə fəal riayət edir və öz vətənləri ilə birlikdə çətinlikləri dəf edir. Fevralın 17-dən 19-na qədər Uxanda epidemiyaya “ümumi hücum” başlandı və "Diaqnozu təsdiqlənmiş xəstələrin xəstəxanaya göndərilməsi", "Bütün şübhəli şəxslərdə koronavirusun olub-olmamasını yoxlamaq üçün RNK testinin həyata keçirilməsi", "Bütün hərarəti olan xəstələrin yoxlanılması", "Yoluxmuş xəstələrlə yaxın təmasda olan şəxslərin karantinə alınması" və "Şəhərin bütün mikrorayonları və kəndlərinin gecə-gündüz qapalı idarə edilməsi” məqsədilə üçgünlük “screening” aparılıb. Bu rəqəmlər nəinki heyrətamiz "Çin sürəti"ni, nəinki sevgi və məsuliyyətlə dolu "Çin istiliyini", həm də parlaq üstünlüklərə sahib "Çin quruluşunun" göstəricisidir.
Hazırda, epidemiyanın qarşısının alınması və nəzarəti ən gərgin və kritik mərhələyə çatıb. Güclü səylərin nəticəsində vəziyyət müsbət dəyişikliklərə gətirir. Hubei bölgəsindəki epidemiya vəziyyəti təsirli şəkildə nəzarət altına alındı və Hubei xaricində yeni təsdiqlənmiş halların sayı ardıcıl olaraq 16 gün azalma tendensiyası ilə müşahidə olundu. Fevralın 19-na olan məlumata görə, ölkədə 16 mindən çox insan sağalaraq xəstəxanadan buraxıldı, bu yaxın günlərdə bir çox əyalət və şəhərdə yeni yoluxma halları aşkar olunmayıb. Ölkə üzrə ölüm nisbəti təxminən 2,2 faiz səviyyəsində təşkil etdi və Hubei xaricindəki ölüm nisbəti 0.49 faizdir. Bu SARS (10 faiz), MERS (35 faiz), EBOLA (40.4 faiz) ilə müqayisədə daha aşağıdır. Yuxarıda göstərilən göstəricilər, Çinin gördüyü tədbirlərin düzgün və təsirli olduğunu, epidemiya vəziyyətinin ümumiyyətlə idarə edilə bilən və müalicə edilə bilən olduğunun göstəricisidir. Biz epidemik vəziyyəti ən qısa müddətdə məğlub etməkdə inamlı və bacarıqlıyıq.
Dünya iqtisadiyyatının böyüməsinə 30 faizdən çox töhfə dərəcəsi ilə dünyanın ikinci ən böyük iqtisadiyyatı kimi, Çin iqtisadiyyatının epidemiyanın nəticələrinə və çağırışlarına necə cavab verməsi də bütün ölkələrin diqqət mərkəzindədir. Qısa müddətli perspektivdə epidemiya Çinin daxili turizminə, iaşə, otel, nəqliyyat və sənayenin digər sahələrinə ciddi təsir göstərib, Çinin iqtisadi fəaliyyətinə təzyiqi gücləndirib və bununla dünya iqtisadiyyatını müəyyən itkilərə məruz qoyub. Ancaq uzun müddətli perspektivdə Çinin iqtisadiyyatı dayanıqlıdır, quruluş səmərəlidir və hökumətin makroiqtisadi nəzarət imkanları kifayət qədərdir. Epidemiyanın təsiri müvəqqətidir və bu, Çinin ümumi iqtisadi artımının əsaslarını dəyişdirməyəcək. Epidemiyalara qarşı mübarizə yeni bir mərhələyə qədəm qoyduğundan Çin hökuməti epidemiyanın qarşısının alınması və nəzarəti və iqtisadi quruculuq kimi iki vəzifəni fəal şəkildə əlaqələndirir və çətinlik yaşayan müəssisələrə kömək etmək üçün ardıcıl olaraq maliyyə, vergi və material kimi çoxplanlı dəstək siyasətini tətbiq edib. Beynəlxalq Valyuta Fondu, Dünya Bankı və ABŞ Federal Ehtiyatı Çin iqtisadiyyatına tam etibar edir. Çin hökumətinin epidemiya nəticəsində yaranan iqtisadi itkiləri ödəmək, mənfi təsirləri minimuma endirmək və dünya iqtisadi artımına çox töhfələr verməyə davam edəcəyinə inanırlar.
Qloballaşma şəraitində, virusun yayılması və onun zərərləri milli sərhədləri tanımır. Beynəlxalq ictimaiyyət bu istiqamətdə birgə işləməli və bir-birinə kömək etməlidir. Bu epidemiya qarşısında Çin yalnız deyil. Hazırda 160-dan çox ölkə və beynəlxalq təşkilatın rəhbərləri Sədr Si Cinpinə müraciət edərək Çinin epidemiya ilə mübarizəsini qəti şəkildə dəstəklədiklərini ifadə etdilər. 70-dən çox ölkənin rəhbərləri və ya yüksək səviyyəli rəsmiləri açıq şəkildə Çinin epidemiyaya qalib gələcəyinə tam əmin olduqlarını bildiriblər. Müxtəlif ölkələrin hökumətləri və xalqları tərəfindən təmənnasız göndərdikləri tibbi ləvazimatlar arasıkəsilmədən Çinə gəlir. Bütün ölkələrdən Çinə edilən mənəvi dəstək və vaxtında maddi yardım bizə dərin duyğular verir və bizim qəlbimizdə qalacaqdır! Azərbaycan hökuməti və xalqı Çinin epidemiya ilə mübarizəsini tam başa düşür və dəstəkləyir.
Fevralın 1-də Prezident İlham Əliyev epidemiya ilə əlaqədar Sədr Si Cinpinə başsağlığı məktubu göndərdi. O, Çin hökumətinin epidemiyanın yayılması və insan tələfatlarının qarşısını almaq üçün həyata keçirdiyi addımları və Çin xalqının epidemiyaya qarşı inadla mübarizədə göstərdiyi qətiyyətini yüksək qiymətləndirib. Azərbaycan xalqının dost Çin xalqı ilə həmrəy olduğunu və qonşu Çinə müvəqqəti çətin günlərdə hər cür köməyi göstərməyə hazır olduğunu vurğulayıb. Sumqayıt şəhəri təcili olaraq 100 min tibbi qoruyucu papaq, 80 min tibbi cərrahi maska, 150 min cüt tibbi əlcək, 4 ton tibbi spirt və epidemiyanın qarşısının alınması üçün digər müxtəlif tibbi ləvazimatlar Xi'an və Mianyang şəhərlərinə yardım üçün göndərdi və bunun nəticəsində bu şəhərlərdə tibbi vasitələrə olan çatışmazlıq vaxtında aradan qaldırıldı. Nizami Gəncəvi Beynəlxalq Mərkəzi, Heydər Əliyev Fondu və Azərbaycanın digər ictimai təşkilatları da öz kanalları ilə Çinə səxavətli yardımlar etdilər. "Çinə Dəstək! Uxana dəstək!” kiçik video çarxlar çəkərək, Azərbaycan xalqının Çinə olan dərin dostluğunu əks etdirən mənəvi dəstək göstərdilər. Azərbaycan Respublikasının Xarici İşlər Nazirliyi bir neçə gün əvvəl Çin səfirliyinə rəsmi nota göndərib, insanların mübadiləsi və müxtəlif sahələrdə əməkdaşlığın sərbəst inkişafını təmin etmək məqsədilə, iki ölkənin hökumətləri arasında xidməti səfərlər zamanı vizasız rejimin qüvvədə olduğu bir daha təsdiqləndi.
Dost dar gündə tanınar! Beynəlxalq ictimaiyyət, o cümlədən Azərbaycanın Çinə ehtiyac zamanı əl uzatdığı xeyirxahlıq, epidemiyanın məğlub olacağına inamımızı daha da gücləndirdi. “Soyuq gecə yarısında şəfəq yaxınlaşır və sübh işıldayır!” Sədr Si Cinpinin qeyd etdiyi kimi, nə qədər ki, bütün ölkənin xalqı birlikdə çalışır, cəsarətlə mübarizə aparır və çətinliklərin öhdəsindən birlikdə gəlir, biz şübhəsiz epidemiya xəstəliklərinin qarşısının alınmasında, nəzarətində və mübarizəsində hərtərəfli qələbə qazana biləcəyik.