İQTİSADİYYAT


“COVID-19 profilaktikası məqsədilə şənlik mərasimlərinin keçirilməsinə dair tələblər” barədə maarifləndirmə aparılır

Bakı, 15 iyul, AZƏRTAC

Azərbaycan Respublikası Nazirlər Kabinetinin yanında Operativ Qərargahın qərarına əsasən, 2021-ci il iyulun 1-dən müəyyən edilmiş şərtlər nəzərə alınmaqla şənlik mərasimlərinin (toy, nişan, ad günü və sair) keçirilməsinə icazə verilib.

Dövlət Vergi Xidmətindən AZƏRTAC-a bildirilib ki, bu tədbirlərin təşkili zamanı koronavirus infeksiyasına qarşı mübarizə tədbirləri görmək, yeni həyat tərzinin qaydalarına uyğun və şərtlərin tələb etdiyi kimi davranış nümayiş etdirmək mütləqdir. Operativ Qərargahın müəyyən etdiyi qayda və şərtlərə əməl olunması şənlik mərasimində iştirak edən şəxslərin sağlamlığının qorunması üçün müvafiq mühitin yaradılmasını təmin edir. Qeyd olunan mərasimlərdə koronavirus infeksiyasına qarşı tələblərə nəzarət məqsədilə müvafiq dövlət qurumları tərəfindən müntəzəm olaraq monitorinqlər keçirilir.

İqtisadiyyat Nazirliyi yanında Dövlət Vergi Xidməti tərəfindən şənlik mərasimlərinin keçirilməsi üçün müəyyən edilmiş qaydalarla bağlı maarifləndirmə işləri də aparılır. Qurum tərəfindən “COVID-19 profilaktikası məqsədilə şənlik mərasimlərinin keçirilməsinə dair tələblər” adlı maarifləndirici flayer hazırlanıb. Burada 50 nəfərədək və 50-150 nəfər iştirakçısı olan şənlik mərasimləri üçün müəyyən edilmiş qaydalar qeyd olunur. Məclis iştirakçılarının, tədbirin keçirildiyi məkan sahibinin və şənlik mərasiminin təşkilatçısının öhdəlikləri izah olunur. Bundan başqa, qanunvericilikdə müəyyən edilmiş məsuliyyət tədbirləri barədə də məlumat verilir. Məqsəd ictimaiyyətin maarifləndirilməsi və koronavirus infeksiyasına qarşı təsirli vasitələrdən istifadəni genişləndirməkdir.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.