Bakı, 1 fevral, Səadət Hakıyeva, AZƏRTAC

Azərbaycanda könüllülük hərəkatının tarixi və könüllülük fəaliyyəti bizim milli və ümumbəşəri dəyərlərə nə qədər bağlı olduğumuzu ifadə edir. Azərbaycan Prezidentinin Sərəncamı ilə 2020-ci ilin "Könüllülər ili" elan olunması xalqımızın milli-mənəvi dəyərlərinə, eyni zamanda, gələcəyimiz olan gənclərin əməyinə, fəaliyyətinə verilən qiymətdir. Könüllük hərəkatını “ASAN xidmət”dən ayırmaq mümkün deyil, bunlar sanki bir-birini tamamlayır. “ASAN xidmət” işçiləri öz peşə bayramlarını dekabrın 29-da qeyd edirlər. Dekabrın 30-da “Könüllülər ili” barədə Sərəncam bizim üçün ikiqat bayram oldu və həm də gənclərlə işləyən təşkilatların üzərinə böyük məsuliyyət qoydu. Bu Sərəncam ona yönəlib ki, könüllülük fəaliyyəti geniş təbliğ olunsun, mövcud sistem daha da təkmilləşdirilsin. Düşünürəm ki, “Könüllülər ili”ndə gənclərimizin fəaliyyəti daha da məhsuldar olacaq və onlar dövlətimizə, xalqımıza şərəflə xidmət edəcəklər.

Bu sözləri AZƏRTAC-a müsahibəsində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İnsan resursları və təlim şöbəsinin müdir müavini, “ASAN Könüllülük" Məktəbinin rəhbəri Cahangir Hacıyev deyib.

C.Hacıyev bildirib ki, dövlət başçısı bu yaxınlarda Davos Dünya İqtisadi Forumundakı çıxışında ölkəmizdə gənclərə göstərilən diqqət və qayğıdan, onlar üçün yaradılan imkanlardan danışdı. Gənc nəslin əsas ideyası və ideologiyasının məhz suverenlik, müstəqillik olduğunu vurğulayan Prezidentin fikirləri auditoriyada böyük maraq doğurdu. Prezident dedi ki, Azərbaycan gəncləri küçələrdə deyil, universitetlərdə, məktəblərdədir, startap biznesindədir, gənclər hökumət məsələlərinə fəal cəlb olunublar. Biz çox nəhəng könüllülər hərəkatına başlamışıq və on minlərlə insan ictimai xidmətlər sektorunda könüllülər qismində təlimlərdə iştirak edib. Sonra da biz yaxşı nəticələr göstərənləri hökumət təşkilatlarına işə götürürük. Bu, dövlət başçısının gənclərimizə verdiyi yüksək qiymətdir.

Gənclərimizin böyük potensiala malik olduğunu bildirən C.Hacıyev könüllülük institutunun, könüllülük platformasının bu potensialı artırmaq üçün ən yaxşı vasitə olduğunu qeyd edib. O, dövlət qurumlarının bu işdə öncül rol oynadıqlarını diqqətə çatdırıb. Bildirib ki, əvvəllər könüllülülərlə qeyri-hökumət təşkilatları və beynəlxalq qurumlar məşğul olurdular. Bu gün Azərbaycan könüllülüyün yeni modelini yaradıb. Könüllülər hazırda dövlət qurumlarına cəlb olunur və onların potensialından istifadə edilir. Bu, bir tərəfdən vətəndaş cəmiyyəti olaraq könüllülük hərəkatını inkişaf etdirir, digər tərəfdən dövlət qurumları bir araya gələrək ümumi inkişafa öz töhfələrini verirlər. Bu, çox vacib amildir və ötən ildən etibarən istər dövlət qurumlarında, istərsə də yerli icra hakimiyyəti orqanlarında, məhkəmə orqanlarında gənclərin fəaliyyəti üçün münbit şərait yaradılıb. Gənclərimiz məhz bu münbit şəraitdə inkişaf edir, təcrübə qazanır və gələcək karyeralarını qurmağa çalışırlar.

Könüllülərin ekoloji mühitin qorunmasında da fəallıq göstərdiklərini deyən C.Hacıyev deyib: “Ekoloji mühit dayanıqlı inkişaf məqsədlərindən biri kimi mühüm əhəmiyyət kəsb edir. Bu istiqamətdə Heydər Əliyev Fondunun vitse-prezidenti Leyla Əliyevanın fəaliyyəti təqdirəlayiqdir. Onun rəhbərlik etdiyi “IDEA” İctimai Birliyi vasitəsilə mütəmadi olaraq bu istiqamətdə mühüm əhəmiyyətli layihələr həyata keçirilir. Könüllülər bu layihələrdə çox fəaldırlar. Mən deyərdim ki, könüllülük həm də insanın həyat tərzidir.