Cari ilin dörd ayında neft məhsullarının istehsalında artım qeydə alınıb

Bakı, 19 may, AZƏRTAC

Cari ilin dörd ayında neft məhsullarının istehsalı sahəsində istehsalın ümumi dəyəri 1443,7 milyon manat olmaqla, əvvəlki ilin müvafiq dövrü ilə müqayisədə 18,1 faiz artıb.

AZƏRTAC Dövlət Statistika Komitəsinin hesabatına istinadla xəbər verir ki, neft məhsullarının istehsalında sürtkü yağlarının istehsalı 46,5 faiz, neft koksunun istehsalı 45,8 faiz, avtomobil benzininin istehsalı 31,1 faiz, qazoylların (dizel yanacağının) istehsalı 26,1 faiz artıb, neft bitumu istehsalı 43,2 faiz, mazut istehsalı isə 91,5 faiz azalıb.