CƏMİYYƏT
“Caspian Energy Club” Dövlət Əmək Müfəttişliyi Xidmətinin təmsilçilərinin iştirakı ilə “B2G” Forumu keçirib
Bakı, 15 oktyabr, AZƏRTAC
“Caspian Energy Club”ın Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin rəisi Fuad Heydərov və nazirliyin Əmək siyasəti şöbəsinin müdiri Əbülfət Məhərrəmov ilə birgə təşkil etdiyi ənənəvi onlayn “B2G” Forumu çərçivəsində yeni növ koronavirus (COVID-19) pandemiyası dövründə yerli və xarici şirkətlərin rəhbər və nümayəndələrinin sual və təklifləri müzakirə olunub.
Bu barədə AZƏRTAC-a “Caspian Energy Club”un sədri və baş icraçı direktoru Telman Əliyev məlumat verib.
Tədbir Azərbaycanın ərazi bütövlüyü uğrunda döyüşlərdə şəhid olanların xatirəsinin bir dəqiqəlik sükutla yad edilməsi ilə başlayıb.
Forumda çıxış edən F.Heydərov bildirib ki, xüsusi karantin rejimi dövründə dövlət sektorunda çalışan 900 min işçidən təxminən 80 faizi işə çıxmasa da, onların əməkhaqqı ödənilib: “Özəl sektor üzrə 760 min nəfərin işsizlik riskinin qarşısı alınıb. Həmçinin özəl sektorda pandemiyadan zərər çəkmiş sahələrdə işləyən 600 min nəfərə dövlət dəstəyi göstərilib.
Cari ildə məşğulluğun qorunması ilə yanaşı, xüsusən də əmək müqavilələrində artım tempinin hətta pandemiya dövründə də davam etməsi və bu artımın böyük əksəriyyətinin özəl sektora aid olması müsbət sosial-iqtisadi məqamlardan biri oldu. Əlavə edim ki, cari ildə Əmək və Əhalinin Sosial Müdafiəsi Nazirliyinin Mərkəzləşmiş Elektron İnformasiya Sisteminin “Əmək müqaviləsi bildirişi” altsistemində özəl sektor tərəfindən daxil edilən əmək müqavilələri bildirişlərinin sayında 120 minə yaxın (19 faiz) artım olub. Əməkhaqqı fondu isə 8 faiz artıb. Bu, eyni zamanda, ölkədə qeyri-formal məşğulluqdan formal məşğulluğa keçidin sürətlənməsində sahibkarların əhəmiyyətli rolunu göstərir və ona görə də bu sahədə onlardan gözləntilər çoxdur.
Pandemiya dövründə aparılan islahatlarda sahibkarlarla sosial dialoqa əsaslanan əməkdaşlığa xüsusi önəm verilir və bu amil ümumən əmək bazarının inkişafında hədəflərə nail olunması üçün vacibdir”.
Sonra çıxış edən Ə.Məhərrəmov qeyd edib ki, “Azərbaycan Respublikasının Əmək Məcəlləsində dəyişikliklər edilməsi haqqında” irihəcmli Azərbaycan Respublikası Qanununun layihəsi hazırlanıb: “Bu layihə həm beynəlxalq təcrübəni, həm yerli təcrübəni, qanunvericilikdə boşluqların aradan qaldırılmasını, dispozitiv və imperativ norma və qaydalara dəqiqlik gətirilməsini ehtiva edir. Layihə Azərbaycan Respublikasında Sosial və İqtisadi Məsələlər üzrə Üçtərəfli Komissiyada da müzakirə edilib. Layihədə bir sıra məsələlər ilə yanaşı, Əmək Məcəlləsinə “distant (məsafədən) iş”, “teleiş” anlayışlarının əlavə edilməsi və bununla əlaqədar digər maddələrin tənzimlənməsi məsələsinə də baxılır. Koronavirus pandemiyasına qarşı mübarizə dövründə fəaliyyətinə icazə verilməyən sahələrdə əmək fəaliyyətinin “distant (məsafədən) iş” və ya “teleiş” formasında təşkil edilməsi işəgötürənlərə tövsiyə edilib.
Hərbi vəziyyətlə əlaqədar olaraq işçilər hərbi toplanışa və ya hərbi xidmətə çağırıldıqda işçilərin təminatları barədə Əmək Məcəlləsində və digər qanunvericilik aktlarında bir sıra normalar nəzərdə tutulub ki, işəgötürənlər tərəfindən bu normalara riayət edilməsi mühüm əhəmiyyət kəsb edir”.
Daha sonra forum iştirakçılarının sualları cavablandırılıb və təkliflər dinlənilib.
Telman Əliyev Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti ilə birlikdə daimi ikitərəfli işçi qrupun yaradılması ilə bağlı təklif irəli sürüb və bildirib ki, ikitərəfli işçi qrup mütəmadi olaraq aktual sual, təklif və problemləri dövlət xidməti ilə müzakirə etməyə və operativ cavab verməyə imkan verəcək.
Onun sözlərinə görə, sıralarında dünyanın 50 ölkəsindən 5 mindən artıq şirkət və təşkilatı birləşdirən “Caspian Energy Club” 2002-ci ilin iyununda yaradılıb. “Biznes-hökumət” dialoqunun fəal iştirakçısı olan “Caspian Energy Club”un əsas məqsədi Azərbaycanda və “Caspian Energy Club”un fəaliyyət göstərdiyi digər ölkələrdə investisiya və işgüzar mühitin yaxşılaşdırılmasından, həmçinin B2G, B2B və B2C formatlarında dialoqların stimullaşdırılmasından və onlarda fəal iştirak etməkdən ibarətdir.
Biznes-netvorkinq üçün beynəlxalq platforma olan “Caspian Energy Club” mütəmadi olaraq müxtəlif tədbirlər təşkil edir. “Caspian Energy Club”un mənzil-qərargahı Bakıda yerləşir, Gürcüstan və Qazaxıstanda rəsmi nümayəndəlikləri, həmçinin dünyanın müxtəlif ölkələrində səlahiyyətli nümayəndələri var.
Tədbirin sonunda “Caspian Energy Club”ın sədri klub üzvlərindən və sahibkarlardan Silahlı Qüvvələrə Yardım Fonduna vəsait keçirərək dəstək olmalarını, həmçinin şəhid ailələrinə, orduda döyüşən əsgər və zabit ailələrinə imkan dairəsində maliyyə dəstəyi göstərmələrini xahiş edib.
“Bütün xarici partnyor və tərəfdaş şirkətlərin rəhbərləri, əməkdaşları və nümayəndələri Azərbaycanın ərazi bütövlüyü naminə apardığı mübarizəsi, Qarabağ münaqişəsi, işğal altında olan və işğaldan azad edilən torpaqlar haqqında obyektiv və düzgün məlumatlandırılmalıdır. Azərbaycan həqiqətlərini dünyaya çatdırmalıyıq”, - deyə T.Əliyev qeyd edib.