İDMAN
Cavid Qarayev: Cari ildə Bakı Olimpiya Stadionu idman ictimaiyyətinin diqqət mərkəzində olub
Bakı, 31 dekabr, AZƏRTAC
Bu il xarici media və idman təşkilatlardan fəaliyyətimizə böyük maraq var idi. Dublin şəhərindəki Stadion İdarəetmə üzrə Avropa Sammitində və Amsterdamda “Avro-2020” üzrə iş görüşündə Bakı Olimpiya Stadionunun (BOS) infrastrukturuna dair təqdimatlar olub. BOS Rusiyanın “Matç TV” telekanalı, Finlandiyanın MTV3 kanalı və fransız prodüser mərkəzi T2MP tərəfindən çəkilib. Hazırda stadionumuz da daxil olmaqla, Avropanın 5 ən yaxşı stadionu haqqında sənədli film hazırlanır.
AZƏRTAC xəbər verir ki, bu sözləri BOS-un direktoru Cavid Qarayev deyib.
C.Qarayev bildirib ki, BOS il boyu UEFA Millətlər Liqasında (Kosovo, Malta və Farer adaları komandaları ilə) “A” milli komandamızın ev matçlarını, həmçinin UEFA Avropa Liqasının qrup mərhələsində “Qarabağ”ın (“Arsenal”, “Vorksla” və “Sportinq” klublarına qarşı) oyunlarını qəbul edib və idman ictimaiyyətinin diqqət mərkəzində olub. BOS bu il digər tədbirləri də təşkil etməkdə fəal iştirak edib. Belə ki, UEFA-nın kütləvi futbolu üzrə dörd futbol federasiyasının nümayəndələrinin iştirakı ilə seminar, hakimlər üçün normativ imtahanı, İdman Araşdırmalar Mərkəzinin ilin yekunları ilə bağlı mərasimi, məktəblilər üçün stadion turları təşkil olunub.
“Bu il digər idman tədbirləri də keçirilib. Heydər Əliyev Fondunun təşəbbüsü və “Sport Marketing Group” təşkilatı ilə keçirilən ənənəvi Bakı marafonunun finiş nöqtəsi və azarkeşlər zonası məhz BOS-da olub. Bu ilin mayında SOCAR və “Olimpiya” döyüş klubunun dəstəyi ilə keçirilmiş “WFCA-48” MMA üzrə çempionatı da azarkeşlər üçün populyar idi. Stadionun məşq meydançalarında futbol klublarının (“Zirə”, “Səbail”, “Keşlə”, “Kəpəz”) və gənclərdən ibarət milli komandaların təlim-məşq bazaları təşkil olunub. Əsas meydançada, rəsmi matçlara əlavə olaraq, Belarus, Qırğızıstan milli komandaları ilə yoldaşlıq görüşlər təşkil edilib. Yaxın gələcəkdə təbii örtüklü üçüncü məşq meydançası istifadəyə veriləcək. Atletik infrastrukturumuz atletlər və para-atletlər tərəfindən məşqlər üçün istifadə edilib”, - deyə C.Qarayev əlavə edib.
Qeyd edib ki, 2018-ci il dünya çempionatı baxımından dünya futbolu üçün vacib bir il idi. “Futbola stadionda baxarlar” prinsipini rəhbər tutaraq, hər kəs üçün əsas matçları böyük ekranda göstərdik. Gələn il əsas məqsədimiz isə mayın 29-da keçiriləcək UEFA Avropa Liqasının final matçının uğurlu keçirilməsidir. Bu futbol bayramına hazırlıq şəraitində, BOS komandası UEFA Avropa Liqasının Yerli Əməliyyat Komitəsi və AFFA ilə birlikdə UEFA nümayəndə heyətini inspeksiya səfəri ilə qəbul edib və Avropa Şurasının Daimi Komitəsinin nümayəndələrinə təhlükəsizlik təqdimatı edib. Əsas hədəf auditoriyalarından biri – KİV üçün – Milli Mətbuat Günü ilə bağlı futbol turniri təşkil olundu və dekabrda Avropa Liqasına həsr olunmuş intellektual kubok keçirilib.