“Ölkəmizi tanıyaq” devizi ilə təşkil olunmuş maarifləndirici tur-aksiyaların ikinci mərhələsi çərçivəsində Qarabağ bölgəsinə ekskursiya edən Nərimanov və Qaradağ rayonlarının ümumtəhsil məktəblilərinin IX-XI sinif şagirdləri noyabrın 14-də əvvəlcə Füzuli rayonuna gəliblər.

AZƏRTAC xəbər verir ki, məktəblilərin rayonla tanışlığı Horadiz şəhərinin girişindəki Dövlət Bayraq Meydanından başlayıb. Pilləkənlərlə dağın zirvəsində inşa edilən Bayraq Meydanına qalxan şagirdlər buradan Horadiz şəhərini, ətraf əraziləri, həmçinin işğal altında olan dağlarımızı seyr ediblər.

Sonra Heydər Əliyev Parkına gələn qonaqları rayon ictimaiyyətinin nümayəndələri və füzulili məktəblilər qarşılayıblar. Məktəblilərə Füzuli rayonunun tarixi, coğrafi mövqeyi, mədəniyyəti, iqtisadiyyatı barədə məlumat verilib. Diqqətə çatdırılıb ki, işğaldan əvvəl rayonda 1 şəhər, 1 qəsəbə, 82 kənd olub. Füzuli rayonunun mərkəzi 1993-cü il avqustun 23-də, rayon ərazisi bütövlükdə 1993-cü il oktyabrın 23-də işğal olunub. Müharibə zamanı rayon üzrə 735 nəfər şəhid, 1240 nəfər əlil olub, 181 nəfər itkin və girov düşüb. Səkkiz nəfər füzulili Milli Qəhrəman adına layiq görülüb. İşğal nəticəsində rayonun maddi-mədəniyyət abidələri məhv edilib.

1994-cü ilin yanvarında rayonun 21 yaşayış məntəqəsi işğaldan azad olunub. Rayonun işğaldan azad edilmiş ərazilərində infrastrukturun bərpasına başlanılıb. Məcburi köçkünlər üçün 16 qəsəbə salınıb, təhsil, səhiyyə və mədəniyyət müəssisələri, yollar, körpülər, elektrik və suvarma sistemləri, evlər, sosial obyektlər yenidən tikilib və bərpa olunub. Müharibə zamanı dağıdılmış Horadiz bu gün gözəlliyi ilə seçilən abad bir şəhərə çevrilib.

Heydər Əliyev Mərkəzinə gələn tur-aksiya iştirakçıları Ulu Öndərin həyatını, siyasi fəaliyyətini əks etdirən fotoşəkillərlə və sənədlərlə, qədim Azərbaycan dövlətləri haqqında məlumatlarla və həmin dövlətlərin rəmzlərinin lazer görüntüləri ilə tanış olublar.

Horadiz şəhərindəki Tarix-Diyarşünaslıq Muzeyi ilə tanışlıq aksiya iştirakçılarında böyük maraq oyadıb. Məktəblilər ibtidai dövr, tunc dövrü, orta əsrlər, yeni və ən yeni dövrlərə aid bölmələrdə nümayiş etdirilən eksponatlara, Azıx mağarasının, dəmirçi emalatxanasının və etnoqrafik komanın maketlərinə, ibtidai dövrdə istifadə olunan məişət və əmək alətlərinə maraqla baxıblar. Bildirilib ki, nümayiş olunan eksponatlar vaxtilə Füzuli rayonu ərazisində aparılan arxeoloji qazıntılar zamanı aşkar edilib.

Sonra Baş Mil kanalı üzərində inşa edilən Su Elektrik Stansiyasına gələn şagirdlərə elektrik enerjisinin istehsalı prosesi barədə məlumat verilib.

Qaradağ rayon 110 nömrəli tam orta məktəbin müəllimi Günay Rəhimova AZƏRTAC-a müsahibəsində Qarabağ bölgəsinə təşkil edilən ekskursiyaların əhəmiyyətini yüksək qiymətləndirərək deyib: “Tur-aksiya şagirdlərin biliklərinin möhkəmləndirilməsində, onların yeni biliklər əldə etməsində, intellektual səviyyəsinin yüksəlməsində, ən əsası isə vətənpərvər ruhda böyüməsində mühüm əhəmiyyətə malikdir. Aksiya iştirakçıları Füzuli rayonunun işğaldan azad edilmiş hissəsində aparılan quruculuq və inkişafı gözləri ilə gördülər, rayon haqqında geniş məlumatlar əldə etdilər. Tur-aksiyaların təşkil olunması gənc nəslə dövlətimizin göstərdiyi qayğının daha bir nümunəsidir”.

Nərimanov rayonu 202 nömrəli tam orta məktəbin şagirdi Aytac Əliyeva fikirlərini belə ifadə edib: “Ölkəmizin bir sıra regionlarında olmuşdum. Qarabağ bölgəsinə isə ilk dəfədir ki gəlirəm. Bu yerlər haqda təsəvvürlərim tamamilə başqa cür idi. Səfər zamanı cəbhə bölgəsində gedən inkişafı, aparılan geniş tikinti-quruculuq işlərini, insanların torpağa, doğma yurda bağlılığını gördüm. Tarix-Diyarşünaslıq Muzeyində Füzulinin qədim tarixinə aid eksponatlarla tanış oldum. Bir sözlə, səfər zamanı çox şey öyrəndim. Tur-aksiyanın təşkilatçılarına minnətdarlığımı bildirirəm”.