Naxçıvan, 13 noyabr, Rauf Kəngərli, AZƏRTAC

Sentyabrın 27-dən bəri keçən dövr həm də ölkə Prezidenti, Müzəffər Ali Baş Komandan İlham Əliyevin hər bir azərbaycanlıda böyük ruh yüksəkliyi yaradan, qələbə əzmini artıran və tariximizin təhrif olunmuş səhifələrinin üstündən xətt çəkərək olduğu kimi ortaya qoyan xalqa müraciətləri, çoxsaylı ölkələrdən gəlmiş jurnalist və siyasətçilərlə görüşləri, verdiyi müsahibələrlə xarakterizə edildi.

Bu sözləri AZƏRTAC-ın Naxçıvan bürosuna müsahibəsində “Şərq qapısı” qəzetinin məsul katibi, tədqiqatçı-jurnalist Muxtar Məmmədov deyib. O bildirib ki, həmin müsahibələrin bir çoxunda jurnalistlərin qərəzliliyi diqqət çəkdi, ünvanlanan sualların əksəriyyəti dünən baş verənlərdən, bu günün reallıqlarından xeyli uzaq idi. Prezidentimiz qərəzliliyi ilə diqqət çəkən həmin suallara verdiyi cavablarla qarşısındakını mat vəziyyətinə saldı, reallıqları olduğu kimi dünyaya göstərdi.

Muxtar Məmmədov qeyd edib ki, xüsusilə Prezidentin Fransanın “Figaro” qəzetinə, ABŞ-ın “Fox News”, Almaniyanın “ARD”, “BBC News” televiziya kanallarına müsahibələrindəki qərəzli suallar hər birimizi dərindən hiddətləndirsə də, ölkə rəhbərinin məntiqli, real həqiqətlərə söykənən cavabları bir o qədər sevindirdi. “Figaro” qəzeti müxbirinin ilk sualını xatırlayırsınızmı? Sualın mahiyyəti belə idi ki, biz sentyabrın 27-də Dağlıq Qarabağa qarşı hücuma keçmişik. Müxbir müharibənin kim tərəfindən başlandığını guya bilmir. Şübhə yoxdur ki, bilir. Elə digər suallarda da heç bir reallığa söykənməyən iddialar, guya regiondakı hadisələrdən xəbərsizlik və özünü gülünc vəziyyətə salan ittihamlar jurnalistin çox aşağı səviyyəli olması barədə qənaət yaratdı.

O bildirib ki, oktyabrın 26-da ABŞ-ın “Fox News” televiziya kanalının təmsilçisi Prezidentə ünvanlandığı suallarda fransalı həmkarını bir az da “qabaqladı”. Jurnalistin digər suallarının da iftiralarla dolu olduğunu bildirən həmsöhbətimiz vurğulayıb ki, informasiya texnologiyalarının yüksək səviyyədə inkişaf etdiyi bir dövrdə dünyada, konkret olaraq, Qarabağda baş verən hadisələri izləməyən çox az insan olduğu halda, dünyanın supergüc dövlətinin məşhur telekanalının təmsilçisi bu hadisələrin necə başladığını, necə davam etdiyini, o qərəzli suallara nə cavab alacağını bilmirdimi? Bilmirdisə, cavabını da aldı!

Muxtar Məmmədov diqqətə çatdırıb ki, Almaniyanın “ARD” televiziya kanalının təmsilçisi də ilk sözündən başlayaraq ittihamlarla dolu olan suallar verirdi. Prezidentin cavabları isə Qarabağ müharibəsində igid əsgərlərimizin işlətdiyi silahların gücündən də artıq idi, həqiqət idi, reallıq idi. Bütün dünyanın həmin müsahibəni izlədiyi şəksizdir. Bununla məşhur telekanalın Azərbaycana qarşı sərgilədiyi mövqe dünya ictimaiyyətinə bir daha bəlli oldu və müxbir qərəzli sualları ilə özünü gülünc vəziyyətə saldı.

Prezidentin belə jurnalistlərə və təmsil etdikləri media orqanlarına, onların rəhbərlərinə, mənsub olduqları ölkələrə ən gözəl cavabının noyabr ayının 10-da xalqa müraciəti olduğunu vurğulayan Muxtar Məmmədov bildirib ki, biz cəbhədə qalib gəldiyimiz kimi, informasiya müharibəsində də qələbə qazandıq. Beləliklə, Azərbaycan Prezidentinin müsahibələri tarixi gerçəklikləri üzə çıxarmaqla yanaşı, siyasi və hərbi Qələbəmizin təminatçısına da çevrildi!