Bakı, 9 yanvar, Məhərrəm Əlioğlu, AZƏRTAC

Yanvarın 9-da Xətai rayonundakı Heydər parkında Cəbrayıl, Şuşa, Laçın rayonlarından olan gənclərin həqiqi hərbi xidmətə yola salınması mərasimi keçirilib.

AZƏRTAC xəbər verir ki, mərasim iştirakçıları əvvəlcə parkda ümummilli lider Heydər Əliyevin abidəsi önünə gül dəstələri qoyublar.

Sonra Azərbaycanın dövlət himni səsləndirilib, ölkəmizin müstəqilliyi və ərazi bütövlüyü uğrunda şəhid olanların xatirəsi bir dəqiqəlik sükutla yad edilib.

Çağırışçılara uğurlar arzulayan Şuşa Rayon İcra Hakimiyyətinin başçısı, “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin sədri Bayram Səfərov gənclərin Vətənin layiqli, fədakar müdafiəçisi olacaqlarına, ulu öndər Heydər Əliyev ideyalarına, eləcə də Prezident, Ali Baş Komandan İlham Əliyevin milli ordumuzun daim möhkəmlənməsi üçün göstərdiyi diqqət və qayğıya əməli işləri, nümunəvi xidmətləri ilə cavab verəcəklərinə əminliyini bildirib.

Səfərbərlik və Hərbi Xidmətə Çağırış üzrə Dövlət Xidmətinin rəis müavini, general-mayor Novruzəli Orucov gəncləri hərbi xıdmətə yola düşmələri münasibətilə təbrik edib. Sürətlə inkişaf edən ölkəmizdə ordu quruculuğunda qazanılan uğurlardan danışan N.Orucov bildirib ki, ordu quruculuğu sahəsində aparılan davamlı işlər nəticəsində bu gün Azərbaycan Silahlı Qüvvələri regionun ən qüdrətli ordusuna çevrilib.

Dövlət Xidmətinin Şuşa rayon bölməsinin rəisi, polkovnik-leytenant Anar Əliyev, “Azərbaycan Əfqanıstan Müharibəsi Veteranları” İctimai Birliyinin sədri Məhəmməd Vəliyev, “Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli də çağırışçılara Vətənin layiqli əsgəri olmağı, torpaqlarımızın keşiyində ayıq-sayıq dayanmağı, ölkəmizin ərazi bütövlüyünü möhkəm qorumağı, hərb işinin sirlərinə mükəmməl yiyələnməyi tövsiyə ediblər.

Çıxış edənlər Azərbaycanda ordu quruculuğu sahəsində həyata keçirilən tədbirlər barədə məlumat veriblər. Bildirilib ki, bu gün Prezident, Ali Baş Komandan İlham Əliyevin rəhbərliyi ilə ordu quruculuğu istiqamətində inamlı addımlar atılır. Bu gün Azərbaycan Silahlı Qüvvələri vahid mərkəzdən idarə olunan güclü maddi-texniki bazaya malikdir. Ordumuz istənilən döyüş tapşırığını yerinə yetirməyə qadir qüvvəyə çevrilib.

Diqqətə çatdırılıb ki, apreldə baş verən hərbi əməliyyatlar dövlətimizin və Ordumuzun gücünü düşmənə və bütün dünyaya bir daha nümayiş etdirdi. Düşmən təxribatlarının qarşısını almaq məqsədilə Silahlı Qüvvələrimizin bölmələrinin keçirdiyi əks-hücum əməliyyatı nəticəsində mühüm əhəmiyyətə malik yüksəkliklər işğaldan azad edildi. Bu döyüşlərdə zabit və əsgərlərimizin göstərdiyi rəşadət xalqımızın yaddaşına həkk olundu. Aprel hadisələri zamanı Silahlı Qüvvələrimizə ən yüksək qiyməti Ali Baş Komandan İlham Əliyev verdi. Prezident İlham Əliyevin diqqət və qayğısı nəticəsində Silahlı Qüvvələrimizin şəxsi heyəti verilən əmrləri böyük ruh yüksəkliyi ilə dəqiq yerinə yetirir.

Valideynlər də çıxışlarında ordu sıralarına yola düşən gənclərə xoş arzularını bildirərək övladlarının hərbi xidmətə yollanmasından iftixar hissi keçirdiklərini deyiblər.

Çağırışçılar Vətənə xidmət etməyə yola düşdüklərindən qürur duyduqlarını və ən böyük arzularının işğal altındakı torpaqlarımızı düşmən tapdağından azad etmək olduğunu bildiriblər.

Sonra gənclər Azərbaycan bayrağının altından keçərək onlar üçün ayrılmış xüsusi avtobuslarla hərbi hissələrə yola salınıblar.