İQTİSADİYYAT


Cəbrayılda 35 kilovoltluq “Hərəkül” yarımstansiyasının yenidən qurulması planlaşdırılır

Bakı, 13 oktyabr, AZƏRTAC

“Azərbaycan Respublikasının işğaldan azad olunmuş ərazilərində müvəqqəti xüsusi idarəetmənin təşkili haqqında” Azərbaycan Respublikası Prezidentinin 2020-ci il 29 oktyabr tarixli Fərmanından irəli gələn məsələlərin icrası ilə əlaqədar olaraq “Azərişıq” ASC tərəfindən Şuşa şəhərini və Xocavənd rayonunu elektrik enerjisi ilə təmin etmək üçün 75 kilometr uzunluğunda hava-kabel xətləri, Şuşa şəhərində 35/10 kilovoltluq 4 meqavolt-amper gücündə “Daşaltı” yarımstansiyası, Laçın rayonunda yerləşən “Güləbird” Su Elektrik Stansiyasından çıxan 10 kilovoltluq hava xətti tikilib istismara verilmiş, Xocavənd rayonunda 35/10 kilovoltluq “Hadrut”, Cəbrayıl rayonunda “Hərəkül”, Zəngilan rayonunda 35/10 kilovoltluq “Alıbəyli” yarımstansiyalarında bərpa işləri aparılıb.

AZƏRTAC xəbər verir ki, bu barədə “Azərişıq” ASC-dən məlumat verilib.

İşğaldan azad olunmuş ərazilərdə 135 kilometrə yaxın müxtəlif gərginlikli hava və kabel xətləri yeni çəkilib və bərpa olunub, komplekt transformator məntəqələri quraşdırılıb, onlarla transformator məntəqəsində təmir və sınaq işləri aparılıb. Görülmüş işlər nəticəsində Şuşa şəhərində, Qubadlı və Zəngilan rayonlarında yerləşən mühüm strateji obyektlər elektrik enerjisi ilə təmin olunub. Ağdam rayonu Mərzili kəndi ərazisində yerləşən Sülhməramlıların Monitorinq Mərkəzinin elektrik təchizatı üçün 110/35/10 kilovoltluq “Ergi” yarımstansiyasından çıxan 35 kilovoltluq “Ergi-1” hava xəttinin 6,5 kilometr hissəsi əsaslı təmir olunub, Mərkəzə 6,7 kilometr uzunluğunda 10 kilovoltluq iki dövrəli hava xətti çəkilib, 10/0,4 kilovoltluq 1000 kilovolt-amper gücündə bir ədəd komplekt transformator məntəqəsi, 500 kilovolt-amper gücündə iki ədəd generator quraşdırılıb, Mərkəzin daxili elektrik təchizatı şəbəkəsi qurulub.

Hazırda Kəlbəcər rayonunun elektrik enerjisi ilə təmin olunması məqsədilə 110/35/10 kilovoltluq “Daşkəsən” yarımstansiyasının, 31 kilometr uzunluğunda 110 kilovoltluq 1-ci və 2-ci Daşkəsən hava xəttinin yenidən qurulması layihəsi hazırlanıb və xəttin tikintisinə başlanılıb. Eyni zamanda, Tərtər rayonunun Suqovuşan qəsəbəsini elektrik enerjisi ilə təmin etmək üçün 110/35/10 kilovoltluq “Tərtər” yarımstansiyasından 35 kilovoltluq ÖİN xətti və 35/10 kilovoltluq 2,5 meqavolt-amper gücündə “Suqovuşan” yarımstansiyası inşa edilib.

Proqram üzrə Ağdam, Kəlbəcər, Laçın rayonlarında 4 ədəd 110 kilovoltluq yarımstansiyanın, Füzuli rayonunda 35 kilovoltluq “Veysəlli”, Qubadlı rayonunda 35 kilovoltluq yeni yarımstansiyanın, Şuşa şəhərində elektrik enerjisinin paylanması üçün 35/0,4 kilovoltluq 9 ədəd yarımstansiyanın, 70 kilometrə yaxın 35 kilovoltluq kabel xətlərinin tikintisi, Zəngilan rayonunda 35 kilovoltluq “Alıbəyli”, Cəbrayıl rayonunda 35 kilovoltluq “Hərəkül” və Xocavənd rayonunda 35 kilovoltluq “Hadrut” yarımstansiyalarının tam yenidən qurulması nəzərdə tutulur. Artıq 2021-ci il oktyabrın 9-da Prezidentin iştirakı ilə “Hadrut” qovşaq yarımstansiyasının təməli qoyulub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.