REGİONLAR
Cənub bölgəsində “Bayraq yürüşü”ndə minlərlə sakin iştirak edib
Lənkəran, 9 noyabr, Bağır Əliyev, AZƏRTAC
Ölkəmizin cənub bölgəsində Dövlət Bayrağı Gününə həsr olunmuş “Bayraq yürüşü”ndə minlərlə sakin iştirak edib.
AZƏRTAC-ın bölgə müxbiri xəbər verir ki, Astara şəhərindəki Park-Bulvar Kompleksinin girişindən “Bayraq yürüşü”nə başlayan yüzlərlə rayon sakini Dövlət Bayrağının ucaldıldığı meydanda yürüşü başa çatdırıblar.
Meydanda keçirilən tədbirdə çıxış edən rayon icra hakimiyyətinin məsul işçisi Mərasim Hacıyev bildirib ki, Prezident İlham Əliyevin Sərəncamı ilə noyabrın 9-u ölkəmizdə hər il Dövlət Bayrağı Günü kimi qeyd olunur.
Bildirib ki, Azərbaycan Respublikasının Dövlət bayrağı dövlətimizin suverenliyinin rəmzidir. 1918-ci il noyabrın 9-da Azərbaycan Xalq Cümhuriyyəti Hökumətinin iclasında qəbul edilmiş və 1920-ci ilin aprel ayınadək dövlət bayrağı statusuna malik olan bu bayraq 1990-cı il noyabrın 17-də xalqımızın ümummilli lideri Heydər Əliyevin təşəbbüsü və rəhbərliyi ilə keçirilən sessiyada Naxçıvan Muxtar Respublikasının dövlət bayrağı olaraq təsdiq edilib. 1991-ci il fevralın 5-də Azərbaycan Respublikasının Ali Soveti “Azərbaycan Respublikasının Dövlət bayrağı haqqında” Qanun qəbul edərək onu Dövlət bayrağı elan edib.
Diqqətə çatdırılıb ki, Azərbaycan Respublikası Prezidentinin “Azərbaycan Respublikasının paytaxtı Bakı şəhərində Dövlət bayrağı meydanının yaradılması haqqında” 2007-ci il 17 noyabr tarixli Sərəncamı Dövlət bayrağının dövlət rəmzləri sırasında xüsusi yerini müəyyən edir. 2007-ci il dekabrın 30-da Bakının Bayıl qəsəbəsində Prezident İlham Əliyev tərəfindən Dövlət Bayrağı Meydanının təməli qoyulub, 2010-cu il sentyabrın 1-də təntənəli açılışı olub. Bu meydanda dalğalanan Azərbaycan Bayrağı dünyada ən böyük və ən uca bayraqdır.
Bu gün Azərbaycan bayrağının dünyanın mötəbər beynəlxalq təşkilatlarının iqamətgahlarında əzəmətlə dalğalanması müstəqil dövlətimizin böyük tarixi nailiyyətidir. Hər bir Azərbaycan vətəndaşı bununla qürur duyur, iftixar hissi keçirir.
Astara rayonunda əzəmətli dövlət bayrağının ucaldıldığı Bayraq Meydanının açılışında Prezident İlham Əliyevin iştirak etdiyini vurğulayan M.Hacıyev bunun əlamətdar hadisə kimi heç vaxt unudulmayacağını və astaralıların bununla qürur duyduğunu bildirib.
Ümumrayon tədbiri konsert proqramı ilə davam edib.
* * *
Lənkəran Şəhər İcra Hakimiyyətinin, Yeni Azərbaycan Partiyası Lənkəran şəhər təşkilatının və Lənkəran Dövlət Universitetinin birgə təşkilatçılığı ilə Dövlət Bayrağı Gününə həsr olunmuş ümumrayon tədbirinin iştirakçıları Heydər Əliyev prospektinə toplaşmışdılar.
AZƏRTAC-ın bölgə müxbiri xəbər verir ki, Dövlət himninin səsləndirilməsi ilə başlayan tədbirdə çıxış edən şəhər icra hakimiyyətinin başçısı Taleh Qaraşov əlamətdar gün münasibətilə rayon sakinlərinə təbriklərini çatdırıb.
Azərbaycanın dövlət bayrağının yaranma tarixi və rəmzi mənası, dövlət atributu kimi bayrağın cəmiyyət həyatındakı rolu barədə danışan T.Qaraşov hər bir vətəndaşı dövlət bayrağına təzim etməyə, onu bütün varlığı ilə sevməyə və ona sədaqət göstərməyə çağırıb.
Sonra minlərlə rayon sakini üçrəngli bayraqlarla Heydər Əliyev prospekti ilə şəhərin Bayraq meydanınadək yürüş ediblər.
Yürüş boyunca iştirakçılar “Üç rəngli bayrağımız heç zaman enməz!”, “Şəhidlər ölməz, Vətən bölünməz!”, “Dövlət müstəqilliyimiz əbədi, dönməz və sarsılmazdır!”, “Yaşasın müstəqil və azad Azərbaycan!” şüarları səsləndiriblər.
* * *
Lerik Rayon İcra Hakimiyyəti, Gənclər və İdman İdarəsinin birgə təşkilatçılığı ilə keçirilən “Bayraq yürüşü” şəhərin Dövlət Bayrağı Meydanında başlayıb və Heydər Əliyev Meydanında şəhər sakinlərinin sürəkli alqışları ilə başa çatıb.
AZƏRTAC-ın bölgə müxbiri xəbər verir ki, yürüş iştirakçıları Bayraq Muzeyində nümayiş etdirilən eksponatlarla tanış olublar.
Burada keçirilən toplantıda çıxış edən rayon icra hakimiyyətinin başçısı Rövşən Bağırov bildirib ki, Azərbaycanın dövlətçilik rəmzlərindən biri Dövlət bayrağıdır. Azərbaycanın üçrəngli bayrağı həm də müstəqilliyimizi təcəssüm etdirən rəsmi dövlət rəmzlərindən biridir. Hər bir Azərbaycan vətəndaşı milli bayrağımıza, gerbimizə, himnimizə ehtiram göstərir və bunu özünün müqəddəs borcu kimi qəbul edir.
Bu il Azərbaycan Xalq Cümhuriyyətinin yaranmasının 100 illiyi ərəfəsində Heydər Əliyev Fondunun vəsaiti hesabına Lerikdə qısa müddət ərzində Bayraq Muzeyinin inşa edildiyini və Prezident İlham Əliyevin oktyabrın 15-də rayona növbəti səfəri zamanı onun xeyir-duası ilə istifadəyə verildiyini diqqətə çatdırıb.
Tədbir Lerik şəhər 1 nömrəli texniki fənlər təmayüllü liseyin və şəhər 3 nömrəli tam orta məktəbin şagirdlərinin ifasında Dövlət bayrağına həsr olunmuş bədii kompozisiya ilə davam edib.
* * *
Masallıda Dövlət Bayrağı Gününə həsr olunmuş ümumrayon tədbirində çıxış edən icra hakimiyyətinin başçısı Rafil Hüseynov rayon sakinlərini əlamətdar gün münasibətilə təbrik edib.
AZƏRTAC-ın bölgə müxbiri xəbər verir ki, Azərbaycan bayrağının millətimizin və dövlətimizin simvolu olduğunu, bu il Azərbaycanın Dövlət bayrağının, Azərbaycan Xalq Cümhuriyyətinin 100 illiyinin qeyd olunduğunu vurğulayan R.Hüseynov bu dövrün bizim üçün çox şərəfli dövr olduğunu diqqətə çatdırıb.
Qeyd olunub ki, bu gün ən yüksək zirvələrdə dalğalanan üçrəngli bayrağımız Azərbaycan dövlətinin gücünü və xalqımızın milli birliyini nümayiş etdirir. Azərbaycan Xalq Cümhuriyyətinin süqutundan sonra yaranan Azərbaycan SSR-in bayrağı 5 dəfə dəyişdirilsə də, üçrəngli milli bayrağımız xalqımızın qəlbində hər zaman yaşayıb.
Masallı Rayon Ağsaqqallar Şurasının sədri Ələşrəf Niftiyev, “ASAN xidmət” mərkəzinin vətəndaşların qəbulu işinin təşkili sektorunun baş məsləhətçisi Orxan Dadaşov, Aprel döyüşçüsü Əziz Cankişizadə və başqaları çıxışlarında qeyd ediblər ki, Aprel döyüşlərində əsgərlərimiz şəhid olsalar da, onların hədəfləri işğal altındakı ərazilərimizdə üçrəngli bayrağı qaldırmaq olub.
Tədbir Masallı Dövlət Regional Kollektivinin tələbələrinin hazırladığı ədəbi-bədii kompozisiyanın nümayişi, rayonun özfəaliyyət kollektivlərinin çıxışları ilə başa çatıb.
* * *
Dövlət Bayrağı Günü münasibətilə Cəlilabadda veloyürüş keçirilib.
AZƏRTAC-ın bölgə müxbiri xəbər verir ki, tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad ediblər.
Cəlilabad şəhərindəki Heydər Əliyev Seyrəngahının qarşısından start götürən veloyürüşün iştirakçıları şəhərin Heydər Əliyev prospektindən keçərək “Finiş” nöqtəsinə - Bayraq Meydanına çatıblar.
Veloyürüşdə Azərbaycan Velosiped İdmanı Federasiyasının (AVİF), Respublika Olimpiya Velosiped Məktəbinin nümayəndələri, həmçinin velosiped sürmək həvəskarı olan rayon sakinləri iştirak ediblər.
Yürüşün təşkilində fəal iştirakına görə AVİF-in baş katibi Fərhad Əliyevə və Respublika Olimpiya Velosiped Məktəbinin direktoru Faiq Qurbanova rayon icra hakimiyyəti başçısının fəxri fərmanları təqdim edilib.
Veloyürüşdən sonra bayram tədbiri Heydər Əliyev Mərkəzində davam etdirilib.
Toplantıda çıxış edən Cəlilabad Rayon İcra Hakimiyyətinin başçısı Namiq Zeynalov bildirib ki, üçrəngli bayrağımızın dövlət rəmzi kimi bərpası ümummilli lider Heydər Əliyevin adı ilə bağlıdır. Dövlət bayrağı milli suverenliyin simvolu kimi ölkəmizin bütün vətəndaşları üçün müqəddəs dövlətçilik rəmzlərindən birinə çevrilib.
Azərbaycan Xalq Cümhuriyyətinin yadigarı olan üçrəngli bayrağımız azadlıq məfkurəsinə, milli-mənəvi dəyərlərə və ümumbəşəri ideallara sadiqliyimizi nümayiş etdirir. Bir dəfə yüksələn bayraq bir daha enməyəcək!
Bayram tədbiri “Mənim ulu bayrağım” adlı bədii-kompozisiya, musiqi və rəqs kollektivlərinin konsert proqramı ilə davam edib.