REGİONLAR
Cənub bölgəsində İkinci Dünya müharibəsində Qələbənin 72-ci ildönümü təntənə ilə qeyd olunub
Lənkəran, 9 may, AZƏRTAC
Mayın 9-da ölkəmizin cənub bölgəsində İkinci Dünya müharibəsində alman faşizmi üzərində tarixi Qələbənin 72-ci ildönümü təntənə ilə qeyd olunub.
Lənkəran şəhərində İkinci Dünya müharibəsində həlak olanların şərəfinə ucaldılmış abidə-kompleksinin önündə keçirilən mərasimdə rayon rəhbərliyi, müharibə və əmək veteranları, arxa cəbhə iştirakçıları, hüquq-mühafizə orqanlarının və ictimaiyyətin nümayəndələri iştirak ediblər.
AZƏRTAC xəbər verir ki, tədbir iştirakçıları abidə-kompleksin önünə əklillər və gül dəstələri düzərək Böyük Vətən müharibəsində həlak olan lənkəranlıların xatirəsini ehtiramla yad ediblər.
Mərasim Gənclər Mərkəzində bayram süfrəsi arxasında davam edib.
Bayram sevincini veteranlarla bölüşən şəhər icra hakimiyyətinin başçısı Taleh Qaraşov ölkəmizdə onlara göstərilən yüksək dövlət qayğısından danışıb, müharibə veteranlarına ən xoş arzularını çatdırıb.
Qeyd olunub ki, bəşəriyyətə böyük fəlakətlər gətirən İkinci Dünya müharibəsi zamanı digər millətlərlə çiyin-çiyinə minlərlə azərbaycanlı da iştirak edib, onlardan bir qismi həlak olub, digər qismi isə Qələbədən sonra Vətənə qayıdaraq tikinti-quruculuq işərində çalışıb.
Bildirilib ki, ulu öndər Heydər Əliyevin ikinci dəfə hakimiyyətə qayıdışından sonra Böyük Vətən müharibəsi veteranlarına diqqət və qayğı artırılıb, onların sosial-məişət problemlərinin həlli ilə əlaqədar bir sıra layihələr icra olunub.
Diqqətə çatdırılıb ki, Heydər Əliyevin siyasətini uğurla davam etdirən Prezident İlham Əliyev hər il müvafiq sərəncamları ilə Böyük Vətən müharibəsi veteranlarının sosial vəziyyətinin yaxşılaşdırılmasını təmin edir, onları daim diqqətdə saxlayır.
Taleh Qaraşov çıxışında işğal altında olan torpaqlarımızın dövlətimizin başçısının rəhbərliyi ilə yaxın zamanlarda azad olunacağına və Qələbə bayramının Şuşada, Xankəndidə, digər tarixi məkanlarımızda qeyd ediləcəyinə əminliyini bildirib.
Tədbirdə çıxış edən müharibə veteranları onlara göstərilən diqqət və qayğıya görə dövlətimizin başçısı İlham Əliyevə minnətdarlıqlarını bildiriblər.
Bayram tədbiri rayonun bədii özfəaliyyət kollektivlərinin rəngarəng konsert proqramı ilə davam edib.
X X X
9 May - Qələbə Günü münasibətilə Cəlilabad şəhərindəki “Ana” abidəsi önündə keçirilən tədbirdə İkinci Dünya müharibəsində həlak olan cəlilabadlı döyüşçülərin xatirəsi ehtiramla yad edilib. Mərasim iştirakçıları abidə önünə gül dəstələri düzüblər.
Cəlilabad Rayon İcra Hakimiyyətinin başçısı Əziz Əzizov Böyük Vətən müharibəsinin iştirakçılarını əlamətdar gün münasibətilə təbrik edərək onlara ən xoş arzularını çatdırıb.
Tədbirdə çıxış edən müharibə veteranları keçdikləri şərəfli ömür yolundan danışıblar. Veteranlar Qələbə Gününün tezliklə Qarabağda qeyd edəcəklərinə əminliklərini bildiriblər.
Sonda müharibə veteranlarına hədiyyələr təqdim edilib.
X X X
Masallı şəhərindəki “Qəhrəmanlar Parkı”nda İkinci Dünya müharibəsində faşizm üzərində Qələbənin 72 illiyi münasibətilə keçirilən mərasimdə rayon rəhbərliyi, müharibə və əmək veteranları, ictimaiyyətin nümayəndələri iştirak ediblər.
AZƏRTAC xəbər verir ki, mərasim iştirakçıları İkinci Dünya müharibəsində həlak olmuş masallılıların xatirəsinə ucaldılan abidə-kompleksinin önünə gül dəstələri düzərək xatirələrini ehtiramla yad ediblər.
Tədbirdə çıxış edən Masallı Rayon İcra Hakimiyyətinin başçısı Rafil Hüseynov, Səfərbərlik və Hərbi Xidmətə Çağırış üzrə Dövlət Xidmətinin Masallı rayon şöbəsinin rəisi Rəsul Quliyev və başqaları 72 il əvvəl alman faşizmi üzərində qazanılmış Qələbənin tarixi əhəmiyyətindən danışaraq ölkəmizdə veteranlara göstərilən diqqət və qayğıya görə Prezident İlham Əliyevə minnətdarlıqlarını bildiriblər.
Müharibə veteranları bu gün də Azərbaycanın igid oğullarının düşmən tapdağı altında olan torpaqlarımızı azad etməyə daim hazır olduqlarını diqqətə çatdırıblar.
X X X
Lerikdə İkinci Dünya müharibəsində alman faşizmi üzərində tarixi Qələbənin 72-ci ildönümünə həsr olunmuş konfrans keçirilib.
Tədbir iştirakçıları əvvəlcə Lerik şəhərində Böyük Vətən və Qarabağ müharibələrində həlak olanların xatirəsinə ucaldılmış abidə-kompleksinin önünə gül dəstələri düzərək müharibədə həyatını itirmiş insanların xatirəsini ehtiramla yad ediblər.
Rayon icra hakimiyyətinin başçısı Rövşən Bağırov əlamətdar gün münasibətilə müharibə veteranlarını təbrik edib. İkinci Dünya müharibəsində faşizm üzərində Qələbənin qazanılmasında Azərbaycan xalqının əvəzsiz rolu, azərbaycanlıların döyüş meydanlarında və arxa cəbhədə göstərdikləri fədakarlıqlar barədə danışıb.
Qeyd olunub ki, İkinci Dünya müharibəsində Lerik rayonundan cəbhəyə yola salınan 6500 nəfərdən 1584 nəfərin həlak olub, 3314 nəfər yaralanıb.
Bildirilib ki, Azərbaycan xalqının tələbi ilə ulu öndər Heydər Əliyev hakimiyyətə qayıtdıqdan sonra 9 May - Qələbə Günü dövlət bayramı səviyyəsində qeyd edilir. Qələbə Günü münasibətilə hər il dövlət büdcəsindən müharibə veteranlarına birdəfəlik maddi yardımlar verilir.
Konfransda Səfərbərlik və Hərbi Xidmətə Çağırış üzrə Dövlət Xidmətinin Lerik rayon şöbəsinin rəisi, mayor Fəxrəddin Mirzəliyev, Qarabağ müharibəsi əlili Veysəl Məlikov, Lerik Rayon Veteranlar Təşkilatının sədri Hidayət Bəşirov, müharibə veteranlarından Daşdəmir Paşayev, Salam Cabbarov, əmək veteranlarından Həmzə Vəliməmmədov, Musa Bədəlov çıxış edərək faşizm üzərində qazanılmış Qələbə ilə Azərbaycan xalqının da fəxr etdiyini, bu günün unudulmaz tarixə çevrildiyini bildiriblər.
Çıxış edənlər Qələbə Gününün Ali Baş Komandan, Prezident İlham Əliyevin rəhbərliyi ilə yaxın zamanlarda Qarabağ torpaqlarında, qədim Şuşa şəhərində qeyd ediləcəyinə əminliklərini bildiriblər.