REGİONLAR


Cənub bölgəsində də faşizm üzərində Qələbənin 74-cü ildönümü təntənə ilə qeyd olunub

Astara, 9 may, Bağır Əliyev, AZƏRTAC

Mayın 9-da ölkəmizin cənub bölgəsində faşizm üzərində Qələbənin 74-cü ildönümü təntənə ilə qeyd olunub.

AZƏRTAC-ın bölgə müxbiri xəbər verir ki, Astarada keçirilən bayram tədbirində rayonun rəhbər işçiləri, Milli Məclisin deputatı Rəşad Mahmudov, İkinci Dünya müharibəsinin iştirakçıları, Qarabağ müharibəsi əlilləri, şəhid ailələri və ictimaiyyətin nümayəndələri iştirak ediblər.

Tədbir iştirakçıları şəhərin “Qəhrəmanlar bağı”nda Sovet İttifaqı qəhrəmanları Ziya Bünyadov, Mirzə Cəbiyev və İlya Koverinin, üç “Şöhrət” ordenlilər Ağahəsən Nəhmətov və Rəhmət Hətəmovun, Milli Qəhrəman Yalçın Nəsirovun və Sosialist Əməyi Qəhrəmanı Böyükxanım Əliyevanın büstləri önünə əklillər və gül dəstələri düzərək, xatirələrini ehtiramla yad ediblər.

Tədbir iştirakçıları, həmçinin “Şəhidlər” abidə-kompleksini ziyarət edərək Azərbaycanın suverenliyi və ərazi bütövlüyü uğrunda şəhid olanların xatirəsini anıblar. Burada şəhidlərin ruhuna dualar oxunub.

Mərasimdə qeyd olunub ki, İkinci Dünya müharibəsində Qələbənin əldə edilməsində azərbaycanlı döyüşçülər, o cümlədən astaralılar da qəhrəmalıqlar göstəriblər.

Bildirilib ki, bəşəriyyətə böyük fəlakətlər gətirən bu müharibədə minlərlə azərbaycanlı da iştirak edib, onlardan bir qismi müharibədə həlak olub, digərləri isə qələbədən sonra Vətənə qayıdaraq quruculuq işlərində çalışıblar.

Ulu öndər Heydər Əliyevin hakimiyyətə qayıdışından sonra ölkəmizdə Böyük Vətən müharibəsi veteranlarına diqqət və qayğı artırılıb, onların məişət və sosial problemlərinin həlli ilə əlaqədar konkret tədbirlər görülüb.

Diqqətə çatdırılıb ki, Heydər Əliyevin siyasətini layiqincə davam etdirən Prezident İlham Əliyev hər il Böyük Vətən müharibəsi veteranlarının sosial vəziyyətinin yaxşılaşdırılması ilə bağlı sərəncamlar imzalayır, onları daim diqqətdə saxlayır.

Bildirilib ki, Azərbaycan dövlətinin siyasi sabitlik, inkişaf və tərəqqi yolunda inamlı addımları, dünyanın inkişaf etmiş dövlətləri sırasında yer alması, mütərəqqi dövlətlərin tərəfdaşına çevrilməsi bizi hədsiz qürurlandırır. İnanırıq ki, Ali Baş Komandan İlham Əliyevin rəhbərliyi ilə qüdrətli Azərbaycan ordusu Aprel zəfərini təkrarlamaqla işğal altındakı bütün torpaqlarımızın azadlığına nail olacaq və xalqımız Qələbə bayramını Şuşada, Xankəndində və digər tarixi torpaqlarımızda qeyd edəcək.

Rayonun müharibə iştirakçıları və veteranları onlara göstərilən diqqət və qayğıya görə dövlətimizin başçısına minnətdarlıqlarını bildiriblər.

Qeyd edək ki, İkinci Dünya müharibəsində 5 min 612 nəfər astaralı döyüşçü iştirak edib. Onlardan 1064 nəfəri müharibədə vəfat edib, 827 nəfəri isə itkin düşüb.

X X X

Lənkəran şəhərində İkinci Dünya müharibəsində həlak olanların xatirəsinə ucaldılmış abidə-kompleksinin önündə keçirilən mərasimdə rayonun rəhbər işçiləri, müharibə və əmək veteranları, arxa cəbhənin iştirakçıları, hüquq-mühafizə orqanlarının və ictimaiyyətin nümayəndələri iştirak ediblər.

AZƏRTAC-ın bölgə müxbiri xəbər verir ki, tədbir iştirakçıları “Naməlum əsgər” abidə-kompleksinin önünə əklillər və gül dəstələri düzərək Böyük Vətən müharibəsində həlak olan lənkəranlıların xatirəsini ehtiramla yad ediblər.

Mərasim iki dəfə Sovet İttifaqı Qəhrəmanı, tank qoşunları qvardiya general-mayoru Həzi Aslanovun adını daşıyan Xatirə Parkında davam etdirilib. Tədbir iştirakçıları cəsur həmyerlimizin əzəmətli abidəsi önünə gül dəstələri düzüblər.

Həmin gün əfsanəvi sərkərdə Həzi Aslanovun ev-muzeyinin yaranmasının 50 illik yubileyinə həsr olunmuş tədbir keçirilib. Tədbirdə rayonun rəhbər işçiləri, hüquq-mühafizə orqanlarının əməkdaşları, müharibə veteranları, arxa cəbhə iştirakçıları iştirak ediblər.

Həmçinin Qələbə Günü münasibətilə müharibə veteranları, arxa cəbhə iştirakçıları üçün bayram süfrəsi açılıb.

Tədbirdə çıxış edənlər müharibə veteranlarını və arxa cəbhənin iştirakçılarını əlamətdar gün münasibətilə təbrik edərək onlara ən xoş arzularını çatdırıblar.

Rayonun müharibə veteranları və arxa cəbhə iştirakçıları onlara göstərilən diqqət və qayğıya görə Prezident İlham Əliyevə minnətdarlıqlarını bildiriblər.

Tədbirdə məktəblilərin və bədii özfəaliyyət kollektivlərinin ifasında vətənpərvərlik mövzusunda şeirlər və mahnılar səsləndirilib.

X X X

Qələbə Günü münasibətilə Cəlilabad şəhərindəki “Xatirə Parkı”ndakı “Ana” abidəsi önündə keçirilən tədbirdə İkinci Dünya müharibəsində həlak olan cəlilabadlı döyüşçülərin xatirəsi ehtiramla yad edilib.

AZƏRTAC-ın bölgə müxbiri xəbər verir ki, bayram tədbirində çıxış edənlər Böyük Vətən müharibəsinin iştirakçılarını əlamətdar gün münasibətilə təbrik edərək onlara ən xoş arzularını çatdırıblar.

Qeyd olunub ki, İkinci Dünya müharibəsində faşizm üzərində Qələbənin əldə edilməsində Azərbaycan xalqının əvəzsiz rolu olub. Həmyerlilərimizin döyüş meydanlarında və arxa cəbhədə böyük qərəmanlıqlar göstəriblər.

Tədbirdə çıxış edən müharibə veteranları keçdikləri şərəfli ömür yolundan danışaraq ölkəmizdə, o cümlədən Cəlilabad rayonunda gedən tikinti, yenidənqurma və abadlıq işlərini yüksək qiymətləndirib, gənc nəslə məsləhət və tövsiyələrini çatdırıblar. Onlar Qələbə Gününün ən qısa zamanda Qarabağda qeyd edəcəklərinə əminliklərini ifadə ediblər.

Mərasimdə müharibə veteranlarına hədiyyələr verilib, onlar üçün bayram süfrəsi açılıb.

X X X

Masallı şəhərindəki “Qəhrəmanlar Parkı”nda İkinci Dünya müharibəsində faşizm üzərində Qələbənin 74-cü ildönümü münasibətilə keçirilən tədbirdə rayonun rəhbər işçiləri, müharibə və əmək veteranları, ictimaiyyətin nümayəndələri iştirak ediblər.

AZƏRTAC-ın bölgə müxbiri xəbər verir ki, mərasim iştirakçıları İkinci Dünya müharibəsində həlak olmuş masallıların xatirəsinə ucaldılan abidə-kompleksinin önünə gül dəstələri düzərək xatirələrini ehtiramla yad ediblər.

Tədbirdə çıxış edənlər 74 il əvvəl alman faşizmi üzərində qazanılmış Qələbənin tarixi əhəmiyyətindən danışaraq ölkəmizdə veteranlara göstərilən diqqət və qayğıya görə Prezident İlham Əliyevə minnətdarlıqlarını bildiriblər.

Müharibə veteranları bu gün də Azərbaycanın igid oğullarının düşmən tapdağı altında olan torpaqlarımızı azad etməyə daim hazır olduqlarını diqqətə çatdırıblar.

X X X

Lerikdə də İkinci Dünya müharibəsində alman faşizmi üzərində tarixi Qələbənin 74-cü ildönümü ilə əlaqədar ümumrayon tədbiri keçirilib.

AZƏRTAC-ın bölgə müxbiri xəbər verir ki, tədbir iştirakçıları Lerik şəhərində Böyük Vətən və Qarabağ müharibələrində həlak olanların xatirəsinə ucaldılmış abidə-kompleksinin önünə gül dəstələri düzərək müharibədə həlak olanların xatirəsini ehtiramla yad ediblər.

Toplantıda İkinci Dünya və Qarabağ müharibəsində həlak olanların xatirəsi bir dəqiqəlik sükutla yad edilib.

Bayram tədbirində çıxış edənlər əlamətdar gün münasibətilə müharibə veteranlarını təbrik edib, bu Qələbənin əldə edilməsində Azərbaycan xalqının əvəzsiz rolu, azərbaycanlıların döyüş meydanlarında və arxa cəbhədə göstərdikləri fədakarlıqlar barədə danışıblar.

Qeyd olunub ki, İkinci Dünya müharibəsində Lerik rayonundan cəbhəyə yola salınan 6500 nəfərdən 1584 nəfəri həlak olub, 3314 nəfər yaralanıb.

Bildirilib ki, ulu öndər Heydər Əliyevin yenidən hakimiyyətə qayıdışından sonra 9 May-Qələbə Günü dövlət bayramı səviyyəsində qeyd edilir, hər il Qələbə Günü münasibətilə dövlət büdcəsindən müharibə veteranlarına birdəfəlik maddi yardımlar verilir.

Çıxış edənlər Qələbə Gününün Ali Baş Komandan, Prezident İlham Əliyevin rəhbərliyi ilə yaxın zamanlarda Qarabağ torpaqlarında, qədim Şuşa şəhərində qeyd ediləcəyinə əminliklərini ifadə ediblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.