REGİONLAR


Cənub bölgəsində prokurorluq işçilərinin peşə bayramı təntənə ilə qeyd olunub

Astara, 1 oktyabr, Bağır Əliyev, AZƏRTAC

1 oktyabr - Prokurorluq işçilərinin peşə bayramı günü ölkəmizin cənub bölgəsində təntənə qeyd olunub.

AZƏRTAC-ın bölgə müxbiri xəbər verir ki, Astara rayonunun prokurorluq işçiləri əvvəlcə ümummilli lider Heydər Əliyevin abidəsi önünə gül dəstələri düzərək dahi rəhbərin xatirəsini ehtiramla yad edib, Heydər Əliyev Mərkəzində Ulu Öndərin zəngin və mənalı ömür yolunu əks etdirən eksponatlar və fotoşəkillərlə tanış olublar.

Tədbir rayon prokurorluğunun inzibati binasında davam etdirilib.

Astara rayon prokuroru Qabil Qasımov həmkarlarını peşə bayramı münasibətilə təbrik edərək bildirib ki, Azərbaycanda prokurorluq orqanlarının yarandığı gündən 100 il ötür. Qeyd olunub ki, ölkəmiz müstəqilliyini bərpa etdikdən sonra Azərbaycan Respublikasının prokurorluğu qanunun aliliyinin, insan hüquq və azadlıqlarının təmin olunmasına, cinayətkarlıqla mübarizəyə, qanunçuluğun və hüquq qaydasının qorunmasına xidmət edən mütəşəkkil quruma çevrilməklə sivil və demokratik inkişaf yolu keçib. Dövlətçilik ideyalarına sarsılmaz inam və sadiqlik nümayiş etdirən prokurorluq orqanları qanunun aliliyinin təmin olunmasında, cinayətkarlığa qarşı mübarizədə, vətəndaşların hüquqlarının etibarlı müdafiəsində yorulmadan xidmət göstərir.

Bildirilib ki, ümummilli lider Heydər Əliyev prokurorluq orqanlarına həmişə diqqət və qayğı ilə yanaşıb, Azərbaycan Prokurorluğunun əməkdaşlarının sosial durumunun yaxşılaşdırılması istiqamətində mühüm fərman və sərəncamlar imzalayıb. Prokurorluq orqanları Prezident İlham Əliyev tərəfindən həyata keçirilən hüquq islahatları nəticəsində qanunçuluğu və insan azadlığını hərtərəfli təmin edən vətəndaş cəmiyyəti quruculuğu prosesində üzərlərinə düşən vəzifələrin öhdəsindən layiqincə gəlirlər.

X   X   X

Prokurorluq işçilərinin peşə bayramı günü Lənkəranda da qeyd edilib.

Lənkəran Şəhər İcra Hakimiyyətinin başçısı Taleh Qaraşov, hüquq-mühafizə orqanlarının rəhbərləri, prokurorluq işçiləri əvvəlcə Heydər Əliyev Xatirə Parkında ümummilli lider Heydər Əliyevin abidəsi önünə gül dəstələri düzərək, Ulu Öndərin xatirəsini ehtiramla anıblar. Prokurorluğun binasında keçirilən tədbirdə rayon prokuroru Elçin Məmmədov həmkarlarını əlamətdar gün münasibətilə təbrik edərək, respublikanın prokurorluq orqanlarının keçdiyi 100 illik şərəfli yoldan danışıb.

Elçin Məmmədov çıxışında ulu öndər Heydər Əliyevin və Prezident İlham Əliyevin davamlı diqqəti və qayğısı sayəsində ölkəmizdə qanunçuluğun, vətəndaşların hüquq və azadlıqlarının qorunmasında, eləcə də cinayətkarlıqla mübarizədə böyük nailiyyətlərin əldə olunduğunu diqqətə çatdırıb.

Tədbirdə çıxış edənlər prokurorluq işçilərini peşə bayramı münasibətilə təbrik edərək, onlara çətin və şərəfli işlərində xoş arzularını çatdırıblar.

X   X   X

Masallı şəhərindəki Heydər Əliyev Mərkəzində prokurorluq işçilərinin peşə bayramına və prokurorluq orqanlarının yaranmasının 100 illiyinə həsr olunmuş tədbir keçirilib.

Tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək, xatirəsini ehtiramla yad ediblər.

Masallı Rayon İcra Hakimiyyətinin başçısı Rafil Hüseynov tədbirdə çıxış edərək, prokurorluq işçilərini peşə bayramları münasibətilə təbrik edərək, onlara ən xoş arzularını çatdırıb.

Ümummilli lider Heydər Əliyevin 1998-ci il 17 iyul tarixli Sərəncamı ilə ölkəmizdə hər il oktyabrın 1-nin prokurorluq işçilərinin peşə bayramı kimi qeyd edildiyini vurğulayan R.Hüseynov Prezident İlham Əliyevin rəhbərliyi ilə hüquq-mühafizə, ədliyyə, məhkəmə və xüsusi xidmət orqanları, o cümlədən prokurorluq orqanlarının öz inkişafının məzmunca və keyfiyyətcə yeni mərhələsinə qədəm qoyduğunu diqqətə çatdırıb.

Tədbirdə Masallı rayon prokuroru Allahverdi Novruzovun ölkəmizdə prokurorluq orqanlarının yaranmasının 100 illiyi ilə bağlı məruzəsi dinlənilib.

Azərbaycanın prokurorluq sisteminin qabaqcıl kollektivlərindən olan Masallı rayon prokurorluğunun işçilərinin qanunçuluğun bərqərar olmasında, qanunun aliliyinin qorunmasında, əhali arasında hüquqi təbliğatın aparılmasında mühüm işlər gördüyünü qeyd edən A.Novruzov rayonda ictimai-siyasi sabitliyin, dövlətçilik maraqlarının qorunmasında, cinayətkarlığa qarşı kəskin, barışmaz mübarizə aparılmasında, vətəndaşların hüquq və azadlıqlarının müdafiəsi işində daha da fəal olacaqlarını bildirib.

Tədbirdə çıxış edən Masallı Rayon Polis Şöbəsinin rəisi, polis polkovniki Habil Əmiraslanov, şəhər 2 nömrəli məktəbin direktoru Mehriban Əzizova, rayon Veteranlar Şurasının sədri Məmmədağa Şiriyev, Öncəqala kənd ərazi icra nümayəndəsi Xudayar Həsənov və başqaları rayonun prokurorluq işçilərini peşə bayramları günü münasibətilə təbrik ediblər.

Çıxışlarda qeyd olunub ki, Ümummilli Liderin prokurorluq işçilərinə göstərdiyi diqqət və qayğı bu gün Prezident İlham Əliyev tərəfindən uğurla davam etdirilir.

Tədbirin sonunda prokurorluq işçilərinin bir qrupuna fəxri fərmanlar və qiymətli hədiyyələr təqdim olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.