REGİONLAR
Cənub regionu üzrə peşə təhsili və təlimi sisteminin beynəlxalq standartlara uyğunlaşdırılması layihəsinə start verilib
Bakı, 6 iyun, AZƏRTAC
Avropa İttifaqı, Birləşmiş Millətlər Təşkilatının İnkişaf Proqramı (BMTİP) ilə birgə Azərbaycanda peşə təhsili və inkişaf potensialının gücləndirilməsinə davamlı dəstək göstərəcəklərini bəyan ediblər. Azərbaycanda peşə təhsili və təlimi mərkəzlərinin müasirləşdirilməsi layihəsi çərçivəsində iyunun 6-da Cəlilabadda Cənub regionu üzrə peşə təhsili və təlimi sisteminin beynəlxalq standartlara uyğunlaşdırılması istiqamətində aparılan fəaliyyətlərə start verilib.
BMT-nin Bakı ofisindən AZƏRTAC-a bildirilib ki, layihənin açılış mərasimində çıxış edən BMT-nin İnkişaf Proqramının Azərbaycandakı ofisinin rezident nümayəndəsinin müavini Alessandro Frakassetti biliyə əsaslanan iqtisadiyyatın inkişafında yerli insan resurslarının əhəmiyyətini xüsusilə vurğulayıb. O, həmçinin bildirib ki, “peşə təhsilinin inkişaf etdirilməsi üçün qlobal trendlərə nəzər salmaq və dünya praktikasına istinad etmək lazımdır, bununla bərabər əmək bazarının tələblərinə cavab verən metodik vəsaitlər və yeni kurikulumlar hazırlamaqla cəmiyyətdə məşğulluq imkanlarının genişləndirilməsinə nail olmaq mümkündür”.
Layihə çərçivəsində Cəlilabad Peşə Liseyini kənd təsərrüfatı və istehsalat sektorları peşələri üzrə ixtisaslaşan Lənkəran İqtisadi Rayonu üzrə müasir Regional Model Peşə Təhsili Mərkəzinə çevirməklə, onun maddi-texniki bazası və təlim-tədris imkanlarının gücləndiriləcəyi planlaşdırılır. Bu, yerli əmək bazarının tələblərinə müvafiq olaraq dövlət və özəl sektor arasında tərəfdaşlığın əhəmiyyətini gücləndirəcək və təhsillə məşğulluq arasında körpünün yaradılmasına xidmət edəcək.
Bu layihənin əsas məqsədi yerli icmaların bacarıqlarının artırılması, insan kapitalının inkişaf etdirilməsi və biliyə əsaslanan cəmiyyətin formalaşmasına yardım etməkdən ibarətdir. Buna nail olmaq üçün, layihə çərçivəsində kənd təsərrüfatı və istehsalat sektorları üzrə tələbələrin ixtisaslaşdırılması və onların peşə hazırlığının artırılmasına yardım edən maddi-texniki baza yaradılacaq.
Azərbaycanda texniki-peşə təhsil sisteminin güclü bir modelə çevrilməsi istiqamətində çalışaraq, layihə tərəfdaşlıq və birgə iştirak prinsiplərini dəstəkləyir. Belə ki, təhsil sistemində dayanıqlı inkişafa nail olmaq üçün, layihə çərçivəsində Avropa İttifaqı, BMTİP və onların tərəfdaşları özəl müəssisələr, vətəndaş cəmiyyəti təşkilatları və yerli hökumətlə sıx əməkdaşlıq edəcəklər və məşğulluq və kadr ehtiyatının hazırlanmasını gücləndirmək məqsədilə müvafiq sektorlarla birgə iş qurmağı nəzərdə tuturlar.
"Cəlilabad Peşə Liseyini kənd təsərrüfatı və istehsalat sahələri üzrə ixtisaslaşan müasir Regional Model Peşə Təhsili Mərkəzinə çevirməkdə müvəffəq olmaq üçün hamımız birlikdə çalışmalıyıq", - deyən Avropa İttifaqının Azərbaycandakı nümayəndəliyinin rəhbəri səfir Kestutis Yankauskas layihənin açılış mərasimində çıxış edərək bildirib. Səfir Yankauskas inkişaf naminə tərəfdaşlığın əhəmiyyətinə toxunaraq onu da vurğulayıb ki, yalnız güclü əməkdaşlıq vasitəsilə mövcud potensialı daha da genişləndirmək, bacarıqları inkişaf etdirmək və əlavə sinerji imkanları yaratmaq mümkündür".
Qeyd edək ki, yeni başlamış layihə çərçivəsində Avropa İttifaqı və BMT-nin İnkişaf Proqramı layihənin əsas tərəfdaş və benefisiarları olan Azərbaycan Respublikası Təhsil Nazirliyi və Peşə Təhsili üzrə Dövlət Agentliyi ilə sıx əməkdaşlıq edirlər.
Peşə təhsilinin inkişafına yönəlmiş layihələr və fəaliyyətlər, həmçinin Dayanıqlı İnkişaf Məqsədlərinin həyata keçirilməsi tələbinə cavab verir. Belə ki, layihə, inklüziv və ədalətli təhsil və həyat boyu öyrənmək imkanının təmin olunması, cəmiyyətin həssas təbəqələrindən olan işçi qüvvəsi, o cümlədən gənclər və ucqar kənd ərazilərində yaşayan icma nümayəndələrinin əmək bazarında layiqincə təmsil oluna bilməsi üçün müvafiq şəraitin yaradılmasına da yardım edəcək.
Qeyd edək ki, ötən ay eyni məqsədlə, Gəncədə fəaliyyət göstərən Sənaye üzrə Regional Peşə Kompetensiya Mərkəzinin yaradılmasına start verilib. Cəlilabadda yerləşən Lənkəran İqtisadi Rayonu üzrə müasir Regional Model Peşə Təhsili Mərkəzi ilə birlikdə bu iki müəssisənin məqsədi beynəlxalq standartlara və xüsusilə istehsalat və kənd təsərrüfatı sənayesinin tələblərinə cavab verməklə texniki-peşə təhsilin keyfiyyətini və ümumi rəqabət qabiliyyətini təkmilləşdirməkdən ibarətdir.
Azərbaycanın texniki-peşə təhsil sisteminin müasirləşdirilməsi sahəsində Avropa İttifaqı və BMTİP-nin birgə həyata keçirdiyi bu iki layihə çərçivəsində peşə təhsili mərkəzlərinin yerləşdiyi bölgələrin hüdudlarından kənarda da, yəni Gəncə və Cəlilabadın ətraf rayonlarında da oxşar fəaliyyətlər həyata keçiriləcək.