CƏMİYYƏT
“Ceyrançöl təmizləmə layihəsi”nin üçüncü mərhələsinin təqdimatı olacaq
Bakı, 22 sentyabr, AZƏRTAC
Sentyabrın 26-da Ceyrançöl təmizləmə layihəsinin üçüncü mərhələsinin təqdimatı olacaq. Bununla əlaqədar Azərbaycan Respublikası Ərazilərinin Minalardan Təmizlənməsi üzrə Milli Agentlik (ANAMA) “Ceyrançöl layihəsinin üçüncü mərhələsinin təqdimatı, gələcəkdə Azərbaycanda icra olunacaq etimad fondu layihələrinin perspektivləri” mövzusunda tədbir keçirəcək.
Agentlikdən AZƏRTAC-a bildiriblər ki, Azərbaycan-Gürcüstan sərhədi boyunca ölkənin şimal-qərb hissəsində yerləşən Ceyrançöl ərazisi 1955-1991-ci illər ərzində keçmiş sovet hərbi ordusunun sınaq və təlim ərazisi kimi intensiv surətdə istifadə edilib. Layihənin birinci mərhələsi çərçivəsində 28 ay (2012-ci ilin aprelindən 2014-cü ilin iyulunadək) ərzində 64 kvadratkilometr olan ümumi sahənin 19 kvadratkilometrlik hissəsi tam təmizlənib. Əməliyyatlar nəticəsində 14 min 654 partlamamış hərbi sursat və tank əleyhinə 173 mina tapılaraq zərərsizləşdirilib.
Layihənin ikinci mərhələsinə 2014-cü il iyulun 8-də start verilib. İyirmi dörd ay davam edən bu mərhələ çərçivəsində 23 milyon 584 min 545 kvadratmetrlik ərazi təmizlənib. 1553 döyüş məqsədli partlamamış hərbi sursat və minlərlə metal qırıntıları tapılaraq zərərsizləşdirilib. İyirmi iki kvadratkilometr ərazini əhatə edən üçüncü mərhələ 2017-ci ilin yanvarında başlayıb və 2018-ci il ərzində başa çatdırılması nəzərdə tutulub.
ANAMA-NATO/NSPA Sülh Naminə Tərəfdaşlıq Etimad Fondunun “Ceyrançöl təmizləmə layihəsi”nin üçüncü mərhələsində 21 milyon 395 min 505 kvadratmetr ərazinin təmizlənməsi NATO tərəfindən rəsmən təsdiq olunub. Türkiyə Respublikası bu layihə üzrə aparıcı ölkə rolunu öz üzərinə götürüb. Azərbaycan Hökuməti layihənin ölkə üçün əhəmiyyətini nəzərə alaraq, layihənin ümumi dəyərinin 50 faizi dəyərində maliyyə vəsaiti ayırıb.
Ceyrançöl təmizləmə layihəsinin üçüncü mərhələsinin təqdimat mərasimi sentyabrın 26-da keçiriləcək.
Tədbirdə dövlət və hökumət rəsmilərinin, NATO Baş Katibinin Qafqaz və Mərkəzi Asiya üzrə xüsusi nümayəndəsinin, NATO/NSPA-nın rəsmi nümayəndələrinin, Azərbaycanda akkreditə olunmuş diplomatik korpusların təmsilçilərinin iştirakı gözlənilir.